ક્યાંથી છેડા ભેગા થશે ? રાજકોટમાં રૂ.10,000થી વધુ બાકીવેરાના 50 હજાર બિલ પરત, હવે વોર્ડ ઓફિસર કરશે `શોધખોળ’
રાજકોટ મહાપાલિકાની વેરા વસૂલાત શાખાને આ વર્ષે 454 કરોડ રૂપિયાની વેરા વસૂલાતનો મસમોટો લક્ષ્યાંક આપવામાં આવ્યો છે જેની સામે આજ સુધીમાં 300 કરોડ જેટલો વેરો ભરાઈ ગયો છે જ્યારે બાકીના 154 કરોડ ભેગા કરવા માટે રીતસરની દોડધામ ચાલી રહી છે. આ બધાની વચ્ચે રૂા.10 હજારથી વધુનો બાકીવેરો હોય તેવા 50,000 બિલ મહાપાલિકાને પરત મળતાં હવે આ તમામની `શોધખોળ’ કરવા માટે વોર્ડ ઓફિસરોને દોડાવવામાં આવશે !
વેરા વસૂલાત શાખા દ્વારા 10 હજારથી વધુ રકમ બાકી હોય તેવા દોઢ લાખ મિલકતધારકોને ત્રણ વખત એસ.એમ.એસ, ત્રણ વખત વૉટસએપ ઉપર બાકીવેરાની `યાદી’ આપવામાં આવવા ઉપરાંત સ્પીડ પોસ્ટ મારફતે રૂબરૂ વેરા બિલ પણ મોકલવામાં આવ્યા હતા. કુલ દોઢ લાખ પૈકી 50,000 બિલ પરત આવ્યા છે.
આ પાછળનું કારણ એ છે કે અમુક બાકીદાર ઘેર હાજર ન હોવાથી કોઈએ બિલનો સ્વીકાર કર્યો ન્હોતો. આ ઉપરાંત અમુક મિલકતધારકો અન્ય સ્થળે રહેવા ચાલ્યા ગયા હોવાથી બિલ તેમને પહોંચ્યું ન્હોતું. એકંદરે સાત વખત વેરાબિલની યાદી આપવા છતાં 50,000 લોકોનો વેરો હજુ ચોપડે બાકી બોલતા આ તમામને શોધવા માટે વોર્ડ ઓફિસરોને જવાબદારી સોંપી શોધખોળ કરવામાં આવશે.
