VIDEO : ‘માહીરાટ’ની રાંચીમાં મુલાકાત : કેપ્ટન કુલની ગ્રાન્ડ ડિનર પાર્ટીમાં કોહલી-પંત પહોંચ્યા, થાલા કોહલી માટે બન્યો ડ્રાઈવર
ભૂતપૂર્વ ભારતીય કેપ્ટન એમએસ ધોનીએ વિરાટ કોહલી અને ઋષભ પંતને રાંચી સ્થિત પોતાના ઘરે ડિનર માટે આમંત્રણ આપ્યું હતું. કોહલી અને પંત ભારત અને દક્ષિણ આફ્રિકા વચ્ચેની પહેલી વનડે મેચ માટે રાંચીમાં છે. ટીમ ઈન્ડિયા અને દક્ષિણ આફ્રિકા વચ્ચે ત્રણ મેચની શ્રેણીની પહેલી વનડે મેચ રવિવાર, 30 નવેમ્બર, 2025 ના રોજ જેએસસીએ ઇન્ટરનેશનલ સ્ટેડિયમ કોમ્પ્લેક્સ ખાતે રમાશે. ત્યારે ટેસ્ટમાં સાઉથ આફ્રિકન ટીમ સામે 0-2થી હાર મળ્યા બાદ ટીમ ઈન્ડિયા રાંચી પહોંચી. અહીં વિરાટ કોહલી, રિષભ પંત સહિત ઘણા ભારતીય ખેલાડીઓ મહેન્દ્ર સિંહ ધોનીના રાંચી સ્થિત ઘરે પહોંચ્યા, જ્યાં પૂર્વ કેપ્ટને એક હાઇ-પ્રોફાઇલ ગેટ-ટુગેધર પાર્ટીનું આયોજન કર્યું હતું.
“માહીરાટ એક સાથે”
ગુરુવારે મોડી રાત્રે રાંચીમાં ભારતીય ક્રિકેટ ચાહકોએ એક હૃદયસ્પર્શી ક્ષણ જોઈ. એક વાયરલ વીડિયોમાં ભૂતપૂર્વ ભારતીય કેપ્ટન મહેન્દ્ર સિંહ ધોની તેના જૂના સાથી અને સ્ટાર બેટ્સમેન વિરાટ કોહલી એક કારમાં જતાં જોવા મળે છે. રાત્રિભોજન પછી, ધોની અને કોહલી એક સાથે કારમાં જતા જોવા મળ્યા. કેટલાક અહેવાલોમાં દાવો કરવામાં આવ્યો હતો કે ધોની પોતે કોહલીને ટીમ હોટલમાં છોડી ગયો હતો, જોકે આ વાતની પુષ્ટિ થઈ નથી. તેમ છતાં, વીડિયોમાં કોહલીનું સ્મિત અને ધોનીની સાદગી ચાહકો માટે પ્રિય યાદો પાછી લાવી. તે યુગની યાદો જ્યારે બંને ભારતીય ક્રિકેટમાં સુવર્ણ પ્રકરણ લખી રહ્યા હતા. સ્ટાર સ્પોર્ટ્સે પણ આ વીડિયો શેર કર્યો છે, જેમાં તેને ‘રી-યુનિયન ઓફ ધ યર” કેપ્શન આપ્યું છે. પંત અને રુતુરાજ પણ ધોનીના ઘરે રાત્રિભોજન માટે પ્રવેશતા જોવા મળ્યા હતા.
કિંગ કોહલીની વાપસી અને અપેક્ષા
ઓસ્ટ્રેલિયાના તાજેતરના પ્રવાસની શરૂઆત ખરાબ રહી હતી, પરંતુ કોહલીએ અંતિમ મેચમાં અણનમ 74* રન બનાવીને પોતાના ફોર્મના સંકેતો દર્શાવ્યા હતા. રોહિત શર્માએ પણ સદી ફટકારી હતી. દક્ષિણ આફ્રિકા સામે કોહલીનો પ્રભાવશાળી રેકોર્ડ છે. તેણે દક્ષિણ આફ્રિકા સામે 31 મેચમાં 65.39 ની સરેરાશથી 1504 રન બનાવ્યા છે. કોહલીએ પાંચ સદી અને આઠ અડધી સદી ફટકારી છે. કુલ 305 વનડેમાં, વિરાટે 14,255 રન બનાવ્યા છે, અને 51 સદી સાથે, તે આ ફોર્મેટમાં ખેલાડી દ્વારા સૌથી વધુ સદી ફટકારવાનો રેકોર્ડ ધરાવે છે.
ગિલ અને ઐયર સીરિઝનો ભાગ નથી
આ સીરિઝમાં ભારતના બે મુખ્ય ખેલાડીઓ – નિયમિત ODI કેપ્ટન શુભમન ગિલ અને ઉપ-કેપ્ટન શ્રેયસ ઐયર – ઈજાને કારણે બહાર હોવાથી, કોહલીની જવાબદારી વધી ગઈ છે. કોલકાતામાં દક્ષિણ આફ્રિકા સામેની પહેલી ટેસ્ટ દરમિયાન ગિલને ગરદનમાં ઈજા થઈ હતી અને હાલમાં તે મુંબઈમાં વધુ તબીબી પરીક્ષણો કરાવી રહ્યો છે. ભારતને ઉપ-કેપ્ટન શ્રેયસ ઐયરની પણ ખોટ સાલશે, જે ઈજાને કારણે મેદાનની બહાર છે. સિડનીમાં ઓસ્ટ્રેલિયા સામેની ત્રીજી વનડે દરમિયાન એલેક્સ કેરીનો શાનદાર કેચ લેતી વખતે ઐયર ઈજાગ્રસ્ત થયો હતો.
ભારતીય ટીમઃ રોહિત શર્મા, યશસ્વી જયસ્વાલ, વિરાટ કોહલી, તિલક વર્મા, કેએલ રાહુલ (કેપ્ટન અને વિકેટકીપર), ઋષભ પંત (વિકેટકીપર), વોશિંગ્ટન સુંદર, રવીન્દ્ર જાડેજા, કુલદીપ યાદવ, નીતિશ કુમાર રેડ્ડી, હર્ષિત રાણા, રુતુરાજ સિંહ, કૃષ્ણા ગાયકવાડ, કૃષ્ણા અરવિંદ, રુતુરાજ સિંહ.
