રેલવેએ ગર્ડર મુકવા મંજૂરી ન આપતાં રાજકોટના સાંઢિયા પુલ નિર્માણમાં ફરી વિઘ્ન : જાન્યુ.સુધીમાં કામ પૂર્ણ થશે કે કેમ? તંત્ર ધંધે લાગ્યું
રાજકોટના ઐતિહાસિક સાંઢિયા પુલનું કામ પૂરપાટ ઝડપે ચાલી રહ્યું હતું પરંતુ જ્યારે જ્યારે રેલવે વિભાગની મંજૂરી લઈને કામ કરવાનું હોય ત્યારે વિઘ્ન આવ્યા વગર રહેતું ન હોવાથી બ્રિજના આ કામમાં પણ વિલંબ થવો નિશ્ચિત બની ગયો છે. મહાપાલિકાએ રેલવેની હદમાં આવતા બ્રિજના ભાગમાં સ્ટીલના ગર્ડર મુકવા માટે મંજૂરી માંગી હતી પરંતુ હજુ સુધી તે ન મળતા ફરી કામ ખોરંભે ચડી જશે તે નિશ્ચિત બની ગયું છે. એકંદરે જાન્યુઆરીના અંત સુધીમાં કામ પૂર્ણ થઈ જવાની સ્ટેન્ડિંગ કમિટી ચેરમેન તેમજ ઈજનેરે જાહેરાત કરી હતી પરંતુ હવે રેલવેની મંજૂરીના વાંકે કામ પૂર્ણ થવામાં વિલંબ થઈ શકે છે.
આ અંગે વધુમાં જાણવા મળ્યા પ્રમાણે 74.32 કરોડના ખર્ચે તૈયાર થઈ રહેલા સાંઢિયા બ્રિજના સેન્ટ્રલ પોર્શન મતલબ કે વચ્ચેના ભાગમાં સ્ટીલના ગર્ડર મુકવા સુધીનું કામ પૂર્ણ થઈ ચૂક્યું છે. આ ગર્ડર મુકવા માટે રેલવે વિભાગની મંજૂરી જરૂરી હોય તેના માટે તંત્ર દ્વારા ત્રણ મહિના પહેલાં લેખિતમાં પત્ર લખી દેવામાં આવ્યો હતો પરંતુ હજુ સુધી આ મંજૂરી ન મળતાં તે મળ્યા બાદ જ કામ આગળ વધી શકશે.
બીજી બાજુ રેલવે દ્વારા પણ જ્યારે ગર્ડર મુકવાની કામગીરી ચાલી રહી હોય ત્યારે બ્લોક મતલબ કે ટ્રેન પસાર ન થાય તે જોવું જરૂરી બની જતું હોવાને કારણે મંજૂરી આપવામાં આવી ન હોય ફરી કોકડું ગુંચવાઈ ગયું છે. એકંદરે જાન્યુઆરી સુધીમાં તો કામ પૂર્ણ થાય તેવી શક્યતા નહીંવત્ બની ગયાનું જાણવા મળી રહ્યું છે.
