ચેતેશ્વર પૂજારાના સાળાનો આપઘાત : 26-11ના રોજ મંગેતરે દુષ્કર્મની ફરિયાદ નોંધાવી હતી, એક વર્ષ બાદ એ જ દિવસે જીવ દીધો
રાજકોટના રહેવાસી ભારતીય ટીમના પૂર્વ ક્રિકેટર ચેતેશ્વર પૂજારાના યુવાન સાળા જીત રસિકભાઈ પાબારી
(ઉ.વ.30)એ ઘરે ગળેફાંસો ખાઈને આપઘાત કરી લેતા ભારે ચકચાર મચી જવા પામી છે. ગત વર્ષે જે દિવસે (તા.26-11-24ના રોજ) જીત વિરૂધ્ધ તેની જ મંગેતરે નોંધાવેલા દુષ્કર્મના આરોપની ફરિયાદના એક વર્ષ બાદ એ જ દિવસે (તા.26-11-25) જીવ ટૂંકાવી નાખ્યો છે. આત્મઘાતી પગલું ભરવા પાછળનું કારણ શું તે હજુ પોલીસ તપાસ કે આવી કોઈ બાબત ઓનપેપર જાહેર થઈ નથી જેથી રહસ્ય અકબંધ જેવું બન્યું છે. જો કે ડિપ્રેશનના કારણે જીવ દીધો હોવાની વાત કે ચર્ચા ચાલી રહી છે.
શહેરના કાલાવડ રોડ નજીક અમીન માર્ગ પાસેના પોશ વિસ્તાર નૂતનનગરમાં રહેતા જામજોધપુરના વતની રસિકભાઈ પાબારીને સંતાનમાં બે પુત્રી, એક પુત્ર જીત જેમાં મોટી પુત્રી પૂજાના લગ્ન ભારતીય ટીમના પૂર્વ ક્રિકેટર બેટ્સમેન ચેતેશ્વર પૂજારા સાથે થયા હતા. પુત્ર જીતની સગાઈ રાજકોટમાં જ નજીકના વિસ્તારમાં રહેતા પરિવારની પુત્રી સાથે થઈ હતી. જો કે જીતની મંગેતરે ગત વર્ષે જીત વિરૂધ્ધ દુષ્કર્મના આરોપસર ફરિયાદ નોંધાવતા સંબંધોમાં ખટાશ આવી હતી. પોલીસના વર્તુળોની પ્રાથમિક વિગતો મુજબ જીત તેના રૂમમાં રાત્રે હતો. આજે સવારે નવેક વાગ્યા બાદ પણ જાગ્યો ન હોય કે આવી કોઈ મૂવમેન્ટ ન હોવાથી તેના રૂમમાં જોવા જતાં જીત લોખંડની ગ્રીલ સાથે પ્લાસ્ટિકની દોરી બાંધીને ફાંસો ખાધેલી હાલતમાં લટકતો હતો. જીતને તાત્કાલીક બેશુધ્ધ હાલતમાં સારવાર અર્થે કાલાવડ રોડ પર વોકહાર્ટ હોસ્પિટલમાં લઈ જવાયો હતો. જ્યાં તબીબોએ ચકાસી મૃત જાહેર કરતાં હાજર પરિવારજનો અન્ય સગાસ્નેહીઓમાં આભ ફાટી પડ્યું હતું.
બનાવના પગલે માલવિયાનગરનો પોલીસ કાફલો દોડી આવ્યો હતો. એક્ઝિ.મેજિસ્ટ્રેટની હાજરીમાં જરૂરી કાયદાકીય કાર્યવાહી પંચનામું કરાયું હતું. ચેતેશ્વરના પત્ની પૂજા સહિતના સભ્યોમાં કાળો કલ્પાંત થઈ પડ્યો હતો. પાબારી પરિવારે એકનો એક યુવાન પુત્ર તેમજ બે બહેનોએ એકલૌતા ભાઈને ગુમાવતા પાબારી પરિવાર તેમજ સગા-સ્નેહીઓમાં પણ ભારે અરેરાટી મચી ગઈ છે. કોઈ સ્યુસાઈડ મળી ન હતી તેમજ આપઘાત કરવા પાછળનું કોઈ કારણ પણ હજુ બહાર ન આવતા અંતિમ પગલું ભરવા પાછળનું રહસ્ય અકબંધ જેવું રહ્યું છે.
મૃતક જીતને સોશિયલ મીડિયા મારફતે 10 વર્ષ પૂર્વે 2014માં યુવતી સાથે કોન્ટેક્ટ થયો હતો. બન્ને ફ્રેન્ડ બન્યા હતા, સાત વર્ષ બાદ તા.8-10-21ના રોજ બન્નેના ત્રણ માસ બાદ ગોળધાણા (સગાઈ નક્કી થઈ) અને તા.27-10-22ના રોજ બન્નેની સગાઈ થઈ હતી. બે વર્ષ સગાઈ રહ્યા બાદ ગત વર્ષે તા.26-11ના રોજ મંગેતરે જીત વિરૂધ્ધ દુષ્કર્મની ફરિયાદ નોંધાવી હતી જેમાં જીતે તેના ઘરે પરાણે શરીર સંબંધ બાંધ્યા બાદ ફોટો, વીડિયોના આધારે દબાવતો હોવાના પણ આરોપ મુક્યા હતા. જો કે દુષ્કર્મ આરોપમાં જીતને આગોતરા જામીન મળી ગયા હતા. હાઈકોર્ટમાંથી ફરિયાદ સંબંધે સ્ટે મળ્યો હતો. અંતર્ગત રીતે જાણવા મળ્યા મુજબ જીત પાબારી કેસ સંબંધે મુદત કે આવા કોઈ કામસર બે દિવસ પૂર્વે કોર્ટમાં ગયો હતો. યુવાન ડિપ્રેશનમાં રહેતો હતો અને આવા કારણે જીતે આપઘાત કરી લીધો હતો કે આત્મઘાતી પગલું ભરવા પાછળ કંઈ અન્ય કારણ છે ? તે પોલીસ તપાસમાં બહાર આવશે. પરિવારજનો શોકમગ્ન હોવાથી વિસ્તૃત પૂછતાછ કે નિવેદન ન લઈ શકાયા હોવાથી કારણ સ્પષ્ટ ન થયાનું પોલીસનું કથન છે.
પોલીસને મોબાઇલ ફોનની રાહ!
જીતના આપઘાત અંગે કોઈપણ પોલીસને પરિવાર પાસેથી જાણવા મળ્યું નથી. મોબાઈલ ફોનમાં કોઈની સાથે છેલ્લે વાત કરી? કોઈ સાથે ચેટ કરી હતી કે કેમ? અથવા તો કોઈ વિશે કોઈ પોસ્ટ કરી હોય ? કોઈનો મેસેજ આવ્યો હોય કે કોઈએ કોલ કર્યો હોય, મોબાઈલમાં કોલ રેકોર્ડિંગ કે અન્ય કોઈ બાબત મળી આવે તો તપાસનીશ પોલીસને સ્યુસાઈડ સંદર્ભે કોઈ કડી મળી શકે. ક્યા કારણોસર પગલું ભર્યું તે દિશામાં પોલીસ આગળ વધી શકે. હાલના તબક્કે તો પોલીસને મૃતકનો મોબાઈલ ફોન હાથ લાગ્યો નથી. પરિવાર શોકાતૂર હોવાથી પૂછતાછ મોબાઈલ મળે ત્યારબાદ તેમાંથી કોઈ કારણ મળી શકે તેવી આશા છે.
ચેતેશ્વર ગૌહાટી મેચમાં હતો, રાજકોટ દોડી આવ્યો
ગૌહાટીમાં ભારત તથા સાઉથ આફ્રિકા વચ્ચેની મેચમાં ચેતેશ્વર કોમેન્ટેટર તરીકેસેવા આપવા માટે ગયો હતો અને તે ગૌહાટી હતો. સમાચાર મળતાની સાથે ચેતેશ્વર તાબડતોબ રાજકોટ આવવા નીકળી ગયો હતો.
