રાજકોટમાં 8 થી 11 જાન્યુઆરી દરમિયાન યોજાશે વાઇબ્રન્ટ એક્ઝિબિશન : સૌરાષ્ટ્ર -કચ્છના 50 હજારથી વધુ ઉદ્યોગકારો આપશે હાજરી
ગુજરાત સરકાર દ્વારા આગામી તા.8થી તા.11 જાન્યુઆરી દરમિયાન રાજકોટની મારવાડી યુનિવર્સિટી ખાતે સૌરાષ્ટ્ર અને કચ્છ વિસ્તાર માટે વાઇબ્રન્ટ ગુજરાત રિજનલ કોન્ફરન્સની બીજી આવૃત્તિની જાહેરાત કરી છે, આ કોન્ફરન્સની સાથે જ, 8 થી 11 જાન્યુઆરી, 2026 દરમિયાન વાઇબ્રન્ટ ગુજરાત રિજનલ એક્ઝિબિશન પણ યોજાશે જેમાં જાપાન અને કેનેડાનું ડેલિગેશન પણ ભાગ લેનાર છે. પાંચ દિવસીય આ કોન્ફરન્સ અને એક્ઝિબિશનમાં અંદાજે 50 હજાર જેટલા એમએસએમઈ ઉદ્યોગકારો ભાગ લેશે અને કરોડોના એમઓયુ કરવામાં આવશે.
વાઇબ્રન્ટ ગુજરાત રિજનલ કોન્ફરન્સની સૌરાષ્ટ્ર અને કચ્છ માટે રાજકોટ ખાતે આયોજિત કોન્ફરન્સમાં સિરામિક્સ, એન્જિનિયરિંગ, બંદરો અને લોજિસ્ટિક્સ, મત્સ્ય ઉદ્યોગ, પેટ્રોકેમિકલ્સ, કૃષિ અને ફૂડ પ્રોસેસિંગ, ખનિજો સહિતના મુખ્ય વિકાસ ક્ષેત્રો પર ધ્યાન કેન્દ્રિત કરશે. સૌરાષ્ટ્ર અને કચ્છ વિસ્તાર માટે યોજાનારી કોન્ફરન્સ અત્રેની મારવાડી યુનિવર્સીટી ખાતે યોજવામાં આવશે જેમાં 6 અત્યાધુનિક ડોમ સાથે 20,000 ચોરસ મીટરથી વધુના વિસ્તારને આવરી લેવામાં આવશે, અહીં ક્ષેત્રીય પ્રદર્શન, નવીનીકરણ પ્લેટફોર્મ અને બિઝનેસ નેટવર્કિંગ તકોનો સમાવેશ થશે.
આ એક્ઝિબિશનમાં એગ્રો, ફૂડ પ્રોસેસિંગ અને ફિશરીઝ, રિન્યુએબલ એનર્જી, એન્જિનિયરિંગ, બંદરો અને લોજિસ્ટિક્સ, હાથશાળ અને હસ્તકલા,રસાયણો અને પેટ્રોકેમિકલ્સ, બેંકો અને નાણાકીય સંસ્થાઓ,શિક્ષણ સંસ્થાઓ સહિત ઉચ્ચ વિકાસ ક્ષેત્રોની અગ્રણી કંપનીઓ અને સંસ્થાઓ ભાગ લેશે. આ ઉપરાંત, ઊર્જા અને પેટ્રોકેમિકલ્સ વિભાગ, કૃષિ વિભાગ, ગુજરાત ઊર્જા વિકાસ એજન્સી, ગુજરાત ખનિજ વિકાસ નિગમ, વન વિભાગ, ગુજરાત મેરીટાઇમ બોર્ડ, શિક્ષણ વિભાગ, ગુજરાત પ્રદૂષણ નિયંત્રણ બોર્ડ, પ્રવાસન વિભાગ અને સ્ટાર્ટઅપ ઇન્ક્યુબેટર્સ જેવા અનેક મુખ્ય સરકારી વિભાગો અને એજન્સીઓ પણ આ એક્ઝિબિશનમાં ભાગ લેશે.
ક્રાફ્ટ વિલેજ અને બહોળી સંખ્યામાં એમએસએમઈની ભાગીદારીથી આ વિસ્તારની સમૃદ્ધ કૌશલ્ય પરંપરા અને ઉદ્યોગસાહસિકતા ઉજાગર થશે. વાયબ્રન્ટનું મુખ્ય આકર્ષણ વેન્ડર ડેવલપમેન્ટ પ્રોગ્રામ, રિવર્સ બાયર-સેલર મીટ અને ઉદ્યમી મેળો હશે, જેનો ઉદ્દેશ્ય માર્કેટમાં નવી તકો ઊભી કરવાનો અને સ્થાનિક એમએસએમઈ કારીગરો તેમજ હાથશાળ અને હસ્તકલા વ્યવસાયોને વૈશ્વિક ખરીદદારો સાથે જોડવામાં મદદ કરવામાં આવશે. સાથે જ દૈનિક લકી ડ્રૉ પણ યોજવામાં આવશે.
રિજિનલ વાયબ્રન્ટ કોન્ફરન્સમાં એવોર્ડ અપાશે
રાજકોટ ખાતે જાન્યુઆરી માસમાં યોજાનાર સૌરાષ્ટ્ર-કચ્છ રિજિનલ વાયબ્રન્ટ કોન્ફરન્સમાં દેશ વિદેશના ડેલિગેશન ભાગ લેનાર છે અને કોન્ફરન્સ સ્થળે એક્ઝિબિશનનું પણ આયોજન કરવામાં આવ્યું છે ત્યારે આ કોન્ફરન્સ દરમિયાન એમએસએમઈ ઉદ્યોગો માટે અલગ -અલગ પાંચ કેટેગરીમાં કુલ 10 એવોર્ડ આપવામાં આવશે જેમાં માઈક્રો ઉદ્યોગ અને સ્મોલ કેટેગરીમાં એસસી, એસટી, મહિલા, યુવા ઉદ્યોગકાર અને જનરલ કેટેગરી એમ પાંચ કેટેગરીમાં દસ શ્રેષ્ઠ ઉદ્યોગકારને એવોર્ડ એનાયત કરવામાં આવશે.
