શું થયું નીટ અંગે ? કેવો નિર્ણય લેવાયો ? જુઓ

ભારતની સૌથી મોટી મેડિકલ એન્ટ્રન્સ ટેસ્ટ એટલે કે નીટ, યુજી પરીક્ષાને લઈને ચાલી રહેલા વિવાદ પર કેન્દ્ર સરકારે સુપ્રીમ કોર્ટમાં નિવેદન આપ્યું હતું. કેન્દ્રએ સુપ્રીમ કોર્ટને જણાવ્યું હતું કે ગ્રેસ માર્ક્સ આપવામાં આવેલા તમામ 1,563 ઉમેદવારોના સ્કોર-કાર્ડ રદ કરવાનો નિર્ણય લેવામાં આવ્યો છે. હવે તે 1563 વિદ્યાર્થીઓને ફરીથી પરીક્ષા આપવાનું કહેવામાં આવશે. સુપ્રીમ કોર્ટે કહ્યું કે આ તમામ ઉમેદવારોને ફરીથી ટેસ્ટ આપવા માટે તરત જ નોટિફિકેશન જારી કરવામાં આવે. ત્યારબાદ એવી જાહેરાત થી હતી કે 23 જૂને ફરી પરીક્ષા લેવાશે અને 30 જૂને પરિણામ અપાશે. આમ નીટનો નિવેડો આવી ગયો હતો.

કેન્દ્ર સરકારે સુપ્રીમ કોર્ટને જણાવ્યું હતું કે ગ્રેસ માર્કસ મેળવનાર તમામ 1563 વિદ્યાર્થીઓને સાચા સ્કોરકાર્ડ (કોઈપણ ગ્રેસ માર્ક્સ વિના) આપવામાં આવશે અને તેમને પરીક્ષામાં ફરીથી હાજર રહેવાનો વિકલ્પ આપવામાં આવશે. વિદ્યાર્થીઓ માટે ફરીથી પરીક્ષામાં હાજર રહેવું વૈકલ્પિક છે. જો તેઓ ફરીથી પરીક્ષામાં હાજર ન થાય, તો 5 મે, 2024 ના રોજ યોજાયેલી પરીક્ષા 2024માં તેમને મળેલા માર્કસને તેમનો સ્કોર ગણવામાં આવશે.

કાઉન્સેલિંગ ક્યારે થશે?

સુપ્રીમ કોર્ટમાં સુનાવણી દરમિયાન, નેશનલ ટેસ્ટિંગ એજન્સીએ જણાવ્યું કે 23 જૂને 1,563 વિદ્યાર્થીઓ માટે ફરીથી પરીક્ષા લેવામાં આવશે. રિ-ટેસ્ટના પરિણામો 30 જૂન, જાહેર કરવામાં આવશે. રિ-ટેસ્ટ પછી, નીટના તમામ ઉમેદવારોનું કાઉન્સેલિંગ 6 જુલાઈથી શરૂ થશે. મેરિટ અને વિભાગ (જેમ કે MBBS, BDS અથવા અન્ય)ના આધારે તમામ ઉમેદવારોનું કાઉન્સેલિંગ આગળની તારીખો પર ચાલુ રહેશે.

એનટીએએ નિર્ણય લીધો

કેન્દ્ર સરકાર તરફથી હાજર રહેલા એડવોકેટ કનુ અગ્રવાલે જસ્ટિસ વિક્રમ નાથ અને જસ્ટિસ સંદીપ મહેતાની ખંડપીઠને જણાવ્યું હતું કે નેશનલ ટેસ્ટિંગ એજન્સી દ્વારા 12 જૂનના રોજ ‘વિદ્યાર્થીઓના ડરને દૂર કરવા’ માટે રચવામાં આવેલી પેનલ દ્વારા નિર્ણય લેવામાં આવ્યો હતો. તેમણે કહ્યું કે પેનલનું માનવું છે કે સમયના નુકસાનના આધારે 1563 વિદ્યાર્થીઓને વળતર માર્કસ આપવાને કારણે આવી સ્થિતિ ઊભી થઈ છે.

ગ્રેસ માર્ક્સ માત્ર એવા પ્રશ્નો પર આપવાના હતા જેના જવાબ ઉમેદવારો દ્વારા આપવામાં આવ્યા ન હતા. તમામ પાસાઓની તપાસ કર્યા પછી, સમિતિએ નક્કી કર્યું કે 1563 વિદ્યાર્થીઓના સ્કોરકાર્ડ રદ કરવાની ભલામણ કરવી યોગ્ય રહેશે અને તેઓને તેમના સાચા ગુણ (ગ્રેસ માર્કસ વિના) વિશે જાણ કરવામાં આવશે.

શિક્ષણ મંત્રીએ શું કહ્યું ?

દરમિયાનમાં કેન્દ્રના શિક્ષણ મંત્રી ધર્મેન્દ્ર પ્રધાને આ બારામાં એમ કહ્યું હતું કે સમગ્ર બાબત પર અમારી નજર રહી છે અને આમાં કોઈ પ્રકારનો ભ્રષ્ટાચાર થયો નથી અને કોઈ પેપર લીક થયું નથી. આ બધી બાબતો પર ખોટા આક્ષેપ થઈ રહ્યા છે. એમણે તો એમ પણ કહ્યું હતું કે નેશનલ ટેસ્ટિંગ એજન્સીએ સારું કામ કર્યું છે.