અમેરિકાનો શિક્ષણ વિભાગ સંપૂર્ણ બંધ કરી દેવા ટ્રમ્પે આપ્યો આદેશ

અમેરિકાના પ્રમુખ ડોનાલ્ડ ટ્રમપે શિક્ષણ વિભાગ બંધ કરવાની કાર્યવાહી શરૂ કરી દીધી છે.તેમણે ગુરુવારે
શિક્ષણ સચિવ લિન્ડા મેકમોહનને શિક્ષણ વિભાગને બંધ કરવાની પ્રક્રિયા શરૂ કરવાનો આદેશ આપતાં એક્ઝિક્યુરિટી ઓર્ડર ઉપર હસ્તાક્ષર કરી વહેલામાં વહેલી તકે શિક્ષણ વિભાગ બંધ કરી દેવાની સૂચના આપી હતી. શિક્ષણમાં સરકારી હસ્તક્ષેપ ઘટાડવા તેમજ સ્થાનિક નિયંત્રણને પ્રોત્સાહન આપવા માટે આ નિર્ણય લેવાયો હોવાનું તેમણે જણાવ્યું હતું.

ટ્રમ્પે તેમના ચૂંટણી પ્રચાર દરમિયાન ફેડરલ શિક્ષણ વિભાગને બંધ કરી દેવાનું વચન આપ્યું હતું. શિક્ષણ વિભાગના કારણે નોકરશાહીનો અવરોધ સર્જાતો હોવાનો તેમણે આક્ષેપ કર્યો હતો અને શિક્ષણનું સંચાલન રાજ્યો અને સ્થાનિક સમુદાયોને સોંપવાની હિમાયત કરી હતી. 1979 માં સ્થપાયેલા શિક્ષણ વિભાગની નબળી કામગીરીને કારણે આંતરરાષ્ટ્રીય સ્તરે અમેરિકાના શિક્ષણનું સ્તર ઘટ્યું હોવાનું ટ્રમ્પે જણાવ્યું હતું. તેમણે શિક્ષણ વિભાગની કામગીરીને ‘ ખર્ચાળ છેતરપિંડી ‘ ગણાવી હતી અને એ વિભાગ બંધ કરી જંગી સરકારી ખર્ચ બચાવવાનો હેતુ વ્યક્ત કર્યો હતો.

કૉંગ્રેસની મંજૂરી આવશ્યક કાનૂની પડકાર સંભવિત

શિક્ષણ વિભાગ કાયદા દ્વારા સ્થાપિત એક ફેડરલ એજન્સી હોવાને કારણે તેને સંપૂર્ણપણે બંધ કરવા માટે કોંગ્રેસની મંજૂરી જરૂરી છે. જો કે રિપબ્લિકન પાર્ટી પાસે હાલમાં કોંગ્રેસમાં બહુમતી હોવાથી, આ પ્રસ્તાવને આગળ ધપાવવાની સંભાવના છે. બીજી તરફ ડેમોક્રેટ્સ અને શિક્ષણ સમર્થકો આ નિર્ણયનો સખત વિરોધ કરતા હોવાને કારણે લાંબી ચર્ચા અને મતદાનની પ્રક્રિયા થઈ શકે છે. વિપક્ષી નેતાઓ અને શિક્ષણ સંગઠનો આ નિર્ણયને કોર્ટમાં પડકારી શકે છે, જેના કારણે અમલમાં વિલંબ થઈ શકે છે.