સૌરવ ગાંગુલીની કારનો દુર્ગાપુર એકસપ્રેસ-વે પર અકસ્માત, પૂર્વ કેપ્ટનનો આબાદ બચાવ, વાંચો સમગ્ર ઘટના

પૂર્વ ભારતીય ક્રિકેટર સૌરવ ગાંગુલીને લઈને એક મોટા સમાચાર સામે આવ્યા છે. દુર્ગાપુર એક્સપ્રેસ વે પર સૌરવ ગાંગુલીની કારનો અકસ્માત થયો છે. અહેવાલો અનુસાર સૌરવ ગાંગુલી ગુરુવારે એક કાર્યક્રમમાં હાજરી આપવા માટે બર્દવાન જઈ રહ્યા હતા. ત્યારે દુર્ગાપુર એક્સપ્રેસ વે પર તેમના કાફલાની સામે અચાનક ટ્રક આવી ગઈ હતી, જેના કારણે ડ્રાઈવરને બ્રેક મારવી પડી હતી.

પ્રાપ્ત માહિતી અનુસાર દંતનપુર પાસે એક ટ્રક અચાનક તેમના કાફલા સામે આવી ગયો હતો, જેથી સૌરવ ગાંગુલીના કાર ડ્રાઇવરે અચાનક બ્રેક લગાવવી પડી હતી. તેના લીધે પાછળ આવી રહેલી ગાડીઓ પરસ્પર ટકરાઇ હતી અને તેમાં એક ગાડી સૌરવ ગાંગુલીની કાર સાથે પણ ટકરાઇ હતી.

આ અકસ્માતમાં સૌરવ ગાંગુલી અને તેમના કાફલામાં સામેલ કોઇપણ વ્યક્તિને ઇજા પહોંચી નથી. પરંતુ સૌરવ ગાંગુલીના કાફલાની બે ગાડીઓને નુકસાન પહોંચ્યું છે. અકસ્માત બાદ સૌરવ ગાંગુલીને લગભગ 10 મિનિટ સુધી રસ્તા પર રાહ જોવી પડી હતી, ત્યારબાદ તે કાર્યક્રમ માટે રવાના થયા હતા અને બર્દવાન યુનિવર્સિટીમાં તેમણે આયોજિત કાર્યક્રમમાં ભાગ લીધો હતો.