ઓપન એઆઈ અને સેમ ઓલટમેન, કેવા નાટકીય વળાંક આવ્યા ? જુઓ
ઓપન એઆઈના એક પગલાંથી દુનિયાભરમાં ચર્ચા શરૂ થઈ ગઈ હતી અને તેની સાથે જોડાયેલી બાબતમાં નાટકીય વળાંક આવી ગયો હતો. સેમ ઓલટમેનને તાત્કાલિક સીઇઑના પદ પરથી હટાવી દેવામાં આવ્યા હતા. બોર્ડે અચાનક આ નિર્ણય લીધો હતો અને ગૂગલ મીટ પર સેમ ઓલ્ટમેનને તેની જાણકારી આપી હતી. સેમને હટાવ્યા બાદ કંપનીના પ્રેસિડેન્ટએ પણ રાજીનામું આપી દીધુ હતું.ત્યારબાદ ફરી સેમની ઓપન એઆઈમાં વાપસી થઈ હોવાના અહેવાલો બહાર આવ્યા હતા. મતભેદો દૂર થઈ ગયા છે. ઘીના ઠામમાં ઘી પડી ગયું છે.
કંપનીએ તેની માહિતી સોશિયલ મીડિયા પ્લેટફોર્મ X પર આપી હતી. હકીકતમાં સેમ ઓલ્ટમેનને સીઈઓના પદ પરથી હટાવી દીધા બાદ કંપનીના ઘણા કર્મચારીઓએ રાજીનામુ આપવાની ધમકી આપી હતી. ત્યારબાદના ઘટનાક્રમમાં સેમને પાછા કંપનીમાં લઈ લેવાની ફરજ પડી હતી. સેમ માઇક્રોસોફ્ટમાં જોડાઈ રહ્યા છે તેવા અહેવાલો પણ બહાર આવ્યા હતા.
કંપનીએ લખ્યું કે, અમે એક નવા બોર્ડની સાથે કંપનીના સીઈઓ તરીકે સેમ ઓલ્ટમેનની વાપસી માટે એક એગ્રીમેન્ટ ઈન પ્રિન્સિપલ પર પહોંચ્યા છીએ. અન્ય ડિટેલ્સ માટે અમે સંપર્ક કરી રહ્યા છીએ. આ દરમિયાન ધીરજ બનાવી રાખવા માટે આભાર વ્યક્ત કરીએ છીએ.
આ અઠવાડિયાની શરૂઆતમાં એટલે કે, સોમવારે જ માઇક્રોસોફ્ટે સેમ ઓલ્ટમેનને નવા પદ પર નિયુક્ત કરવાની માહિતી આપી હતી. માઈક્રોસોફ્ટના સીઈઓ સત્ય નડેલાએ X પર તેની ડિટેલ્સ શેર કરી હતી.
