પ્લેટફોર્મ એક્સ પર હવે તમારે બોજો સહન કરવાનો છે ? જુઓ
મસ્કે શું દાખલ કર્યો નવો નિયમ ?
જ્યારથી ઈલોન મસ્ક એક્સ ના માલિક બન્યા ત્યારથી તે એક્સ પરથી વધુ પૈસા કમાવવા પર ધ્યાન કેન્દ્રિત કરી રહ્યા છે. જેમાં સૌપ્રથમ ઈલોન મસ્કએ એક્સની પેઇડ સેવાઓ શરૂ કરી અને બ્લુ ટિક ફી આધારિત બનાવી દીધી હતી. બ્લ્યુ ટીક પહેલા ફ્રીમાં મળતી હતી અને તેના માટે કેટલીક શરતો હતી. હવે લાઇક કરવા અને રિપ્લાઈ કરવા માટે પણ નાણાં ચૂકવવા પડશે. આ નવો નિયમ દાખલ કરવામાં આવ્યો છે. કોઈ પોસ્ટને બૂકમાર્ક કરવા માટે પણ નાણાં આપવા પડશે.
ઈલોન મસ્કે નવા યુઝર્સ માટે મોટો પ્લાન બનાવ્યો છે. મસ્કએ કહ્યું છે કે X પર આવનારા નવા યુઝરે પોસ્ટ કરવા માટે પૈસા ચૂકવવા પડશે અને તે નજીવી રકમ હશે, જોકે હજુ સુધી તેણે ફી કેટલી રહેશે તે બાબતે કોઈ સ્પષ્ટતા કરી નથી. એમણે પોતે જ આ નિયમ અંગે પોસ્ટ મૂકી હતી.
ઈલોન મસ્કનું માનવું છે કે ફી લાદ્યા બાદ બોટ્સ અને ફેક એકાઉન્ટની પોસ્ટમાં ઘટાડો થશે, કારણ કે હાલમાં કોઈપણ નવું એકાઉન્ટ બનાવીને કોઈની તરફેણમાં પોસ્ટ કરી રહ્યું છે. ઈલોન મસ્કે કહ્યું છે કે બોટને રોકવાનો આ એકમાત્ર રસ્તો છે.
એક્સની નવી નીતિ અનુસાર, હવે તમારે એક્સ પર પોસ્ટ કરવા, કોઈની પોસ્ટને લાઈક કરવા, કોઈ પોસ્ટને બુકમાર્ક કરવા અને પોસ્ટનો રિપ્લાય આપવા માટે નાણા ચૂકવવા પડશે. તમે માત્ર એક જ એકાઉન્ટને ફ્રીમાં ફોલો કરી શકશો. પ્લેટફોર્મ પર સ્પામ રોકવા માટે આ નીતિનું લાંબા સમયથી પરીક્ષણ કરવામાં આવી રહ્યું છે.
