રાજકોટમાં પાર્કિંગ મફતમાં શા માટે શક્ય નથી? સ્ટેન્ડિંગ કમિટી ચેરમેન જયમીન ઠાકરે કરી મહત્ત્વની સ્પષ્ટતા

રાજકોટ મહાપાલિકા દ્વારા ટ્રાફિક સમસ્યાના નિવારણ માટે રાજ્ય સરકાર દ્વારા બનાવવામાં આવેલી પાર્કિંગ પોલિસીનો અમલ કરીને અલગ-અલગ વિસ્તારમાં 62 પે એન્ડ પાર્ક સાઈટ બનાવાઈ છે જેમાંથી 24 સાઈટ હજુ પણ ખાલી પડેલી છે. દરમિયાન ગત સપ્તાહે મળેલી સ્ટેન્ડિંગ કમિટીની સંકલન બેઠકમાં વોર્ડ નં.7ના કોર્પોરેટર ડૉ.નેહલ શુક્લ દ્વારા શહેરમાં દરેક સાઈટ પર વિનામૂલ્યે પાર્કિંગ કરવા દેવાની છૂટ આપવા અને તેના બદલામાં જે પણ ખર્ચ થાય તે ભોગવવા પોતે તૈયાર હોવાની `ઓફર’ આપતા થોડી ક્ષણ માટે બેઠકમાં સોપો પડી ગયો હતો. આ મુદ્દો ઘણો જ ચગી જતા સ્ટેન્ડિંગ કમિટી ચેરમેન જયમીન ઠાકર દ્વારા મહત્ત્વપૂર્ણ સ્પષ્ટતા કરવામાં આવી હતી કે પે એન્ડ પાર્કનો કોન્ટ્રાક્ટ મહાપાલિકા દ્વારા કમાણી માટે નહીં પરંતુ સુવિધા માટે આપવામાં આવે છે અને આ જરૂરી પણ છે.

આ પણ વાંચો :14 સર્કલનો પારકા પૈસે ‘વિકાસ’ કરશે રાજકોટ મનપા : જાણો કયા સર્કલનું કેટલું અપસેટ પ્રિમીયમ

સ્ટેન્ડિંગ કમિટી ચેરમેન જયમીન ઠાકરે `વોઈસ ઓફ ડે’ સાથેની વાતચીતમાં જણાવ્યું કે સ્ટેન્ડિંગ કમિટીના સભ્ય ડૉ.નેહલ શુક્લ દ્વારા જે ઓફર અપાઈ છે તેનું પાલન કરવું શક્ય નથી. આ મુદ્દે તેમણે એક નહીં બલ્કે ચાર કારણ પણ આપ્યા હતા જેમાં પ્રથમ કારણ એ હતું કે મહાપાલિકા એ નફો કરવા માટે નહીં પરંતુ લોકોને સુવિધા આપતી સંસ્થા છે. બીજું કારણ એ કે ટેન્ડર પ્રક્રિયા વગર જ કોઈ કોન્ટ્રાક્ટ આપવો સરકારની પોલિસીની વિરુદ્ધ છે. ત્રીજું કારણ એ કે નફો કરવા માટે જ ટેન્ડર આપવું એ વ્યાજબી નથી અને ચોથું કારણ એ કે પે એન્ડ પાર્કિંગનો કોન્ટ્રાક્ટ કોઈ વેપારી એસોસિએશન કે સંસ્થા સંભાળે તે વાત માત્ર કહી શકાય પરંતુ તેનો અમલ થવો ઘણો જ કપરો છે.

આ પણ વાંચો :RMCના એક અધિકારીએ બૂટની લેસ બાંધતાં બાંધતાં કહ્યું, અમે તો કાર્યક્રમોથી થાક્યા, બીજા અધિકારીએ કહ્યું, મારે તો 54 વર્ષે જ નિવૃત્તિ…! વાંચો કાનાફૂસી

તેમણે ઉદાહરણ પણ આપ્યું કે કોઈ એજન્સી આવીને એમ કહે કે 100 કરોડ રૂપિયાનું ડામર કામ તે 80 કરોડ રૂપિયામાં કરી આપવા માટે તૈયાર છે પરંતુ શરત એટલી કે ટેન્ડર નહીં કરવાનું ! શું આ પ્રકારની ઓફર મહાપાલિકા ક્યારેય સ્વીકારી શકે ? બિલકુલ નહીં. જો દરેક સાઈટ પર પાર્કિંગ મફત કરવામાં આવે તો ટ્રાફિક સમસ્યા વકરવા સિવાય બીજું કશું મળશે નહીં. તેમણે ભારપૂર્વક જણાવ્યું કે પે એન્ડ પાર્કની એક પણ સાઈટ એવી નથી કે જ્યાં અપસેટ પ્રાઈસ કરતા વધુ આવક ન થઈ હોય આમ છતાં હજુ પણ કહીશ કે મહાપાલિકા પે એન્ડ પાર્કનો કોન્ટ્રાક્ટ કમાણી માટે નથી આપતી.