અલ્લુ અર્જુનના વકીલોએ શા માટે કોર્ટમાં લીધું શાહરુખ ખાનનું નામ ?? Raees ફિલ્મ અને વડોદરા સાથે જોડાયેલો કેસ શું છે ??

‘પુષ્પા 2’ એક્ટર અલ્લુ અર્જુનની ધરપકડ બાદ દેશભરમાં ખળભળાટ મચી ગયો હતો. જ્યાં અભિનેતાનો પરિવાર અને તેના ચાહકો ચિંતિત છે, ત્યારે ફિલ્મ ઈન્ડસ્ટ્રીના અલગ-અલગ સ્ટાર્સ તેના સમર્થનમાં ઉભા જોવા મળે છે. હૈદરાબાદના સંધ્યા થિયેટરમાં નાસભાગમાં એક મહિલાના મોતના મામલામાં અલ્લુ અર્જુનની ધરપકડ કરવામાં આવી હતી. હાલ તેલંગાણા હાઇકોર્ટ દ્વારા તેને જામીન પણ આપી દેવામાં આવ્યા છે ત્યારે કોર્ટમાં દલીલ કરતી વખતે અલ્લુ અર્જુનના વકીલે શાહરૂખ ખાન સાથે જોડાયેલા એક કેસનો ઉલ્લેખ કર્યો હતો. ચાલો જાણીએ શું છે એ કેસ.


પુષ્પા સ્ટાર અલ્લુ અર્જુન વિરુદ્ધ નોંધાયેલા કેસમાં હાઈકોર્ટમાં ચાલી રહેલી સુનાવણી દરમિયાન શાહરૂખ ખાન સાથે જોડાયેલી આવી જ એક ઘટના સામે આવી હતી. અલ્લુ અર્જુનના વકીલો નિરંજન રેડ્ડી અને અશોક રેડ્ડીએ તેની ધરપકડ પર સોમવાર સુધી સ્ટે માંગ્યો હતો અને કહ્યું હતું કે 2017માં ફિલ્મ ‘રઈસ’ના પ્રમોશન દરમિયાન વડોદરા સ્ટેશન પર થયેલી નાસભાગમાં શાહરૂખ ખાનના એક પ્રશંસકનું મૃત્યુ થયું હતું, પરંતુ ગુજરાત હાઈકોર્ટ અને સુપ્રીમ કોર્ટે તેમને રાહત આપી હતી. આ આધારે અલ્લુ અર્જુનના વકીલોએ પણ તેમના અસીલ માટે રાહતની માંગ કરી હતી.

વકીલે કોર્ટમાં શાહરૂખ ખાનને નિર્દોષ જાહેર કરવાનો ચુકાદો પણ વાંચ્યો હતો. તેમાં એવું લખવામાં આવ્યું હતું કે નાસભાગમાં મૃત્યુ પામેલા વ્યક્તિના મૃત્યુનો સીધો સંબંધ અભિનેતા સાથે હોય તો જ અભિનેતાને આરોપી બનાવવામાં આવશે. અમારા કિસ્સામાં અભિનેતા પહેલા માળે હતો. મહિલા ગ્રાઉન્ડ ફ્લોર પર હતી. અભિનેતા 9.40 વાગ્યે ત્યાં ગયો હતો. આરોપ લગાવવામાં આવ્યો છે કે આ બધુ નીચેના વિસ્તારમાં થયું અને મહિલા અને બાળક ત્યાં ફસાઈ ગયા. પોલીસને પણ ખબર હતી કે કલાકારો ત્યાં આવી રહ્યા છે. પોલીસે અભિનેતાને આવતા રોક્યા ન હતા. થિયેટરે અભિનેતાને આવવાની ના પાડી ન હતી. કલાકારો માત્ર ફિલ્મ જોઈ રહ્યા હતા. તે સમયે શાહરૂખ ખાન પણ કંઈક કરી રહ્યો હતો. અહીં કલાકારો માત્ર ફિલ્મ જોઈ રહ્યા હતા.

શું છે અલ્લુ અર્જુન સાથે જોડાયેલો મામલો?

4 ડિસેમ્બરે સાંજે હૈદરાબાદના સંધ્યા થિયેટરમાં ફિલ્મ ‘પુષ્પા 2’નું સ્પેશિયલ સ્ક્રીનિંગનું આયોજન કરવામાં આવ્યું હતું. એવું કહેવામાં આવ્યું હતું કે અલ્લુ અર્જુન અહીં તેની ફિલ્મ જોવા આવશે. આવી સ્થિતિમાં ફેન્સની ભીડ તેમના ફેવરિટ સ્ટારને જોવા માટે થિયેટરની બહાર પહોંચી હતી. ભીડને કાબૂમાં લેવા માટે પોલીસે લાઠીચાર્જ પણ કરવો પડ્યો હતો. અલ્લુ અર્જુન આખરે આ ભીડને મળવા પહોંચ્યો. અભિનેતાને જોવા લોકો દોડી આવ્યા હતા અને નાસભાગ મચી ગઈ હતી. આ નાસભાગમાં રેવતી નામની 35 વર્ષની મહિલાનું મોત થયું હતું.

આ મામલામાં મૃતક મહિલાના પરિવારે અભિનેતા અલ્લુ અર્જુન, તેની સુરક્ષા ટીમ અને થિયેટર મેનેજમેન્ટ સામે પોલીસ ફરિયાદ નોંધાવી હતી. અલ્લુ અર્જુન વિરુદ્ધ હૈદરાબાદના ચિક્કડપલ્લી પોલીસ સ્ટેશનમાં ભારતીય ન્યાય સંહિતા (BNS)ની કલમ 105 અને 118 (1) હેઠળ કેસ નોંધવામાં આવ્યો હતો. અલ્લુ અર્જુન અને તેની ટીમે પણ મહિલાના મૃત્યુ પર શોક વ્યક્ત કર્યો હતો. અભિનેતાએ મહિલાના પરિવારને મળવાની અને તેમને 25 લાખ રૂપિયાની મદદ કરવાની વાત પણ કરી હતી.

શાહરૂખ ખાન સામેનો કેસ શું હતો ??

શાહરૂખ ખાનના કેસની વાત કરીએ તો, સુપરસ્ટાર વિરુદ્ધ આઈપીસીની કલમ 336, 337 અને 338 સહિત રેલવે એક્ટ 1989 હેઠળ કેસ નોંધવામાં આવ્યો હતો. આ વિવાદ ત્યારે વધ્યો જ્યારે નેતા જીતેન્દ્ર સોલંકીએ શાહરૂખ ખાન સામે કેસ કર્યો હતો. આમાં તેણે નાસભાગ અને વ્યક્તિના મૃત્યુ માટે અભિનેતાની પ્રમોશનલ પ્રવૃત્તિને જવાબદાર ગણાવી હતી. શાહરૂખ ખાને પણ કોર્ટના ચક્કર લગાવવા પડ્યા હતા. આ મામલાને મોટો વળાંક આપતા કોર્ટે કહ્યું હતું કે જો શાહરુખ ખાન માફી પત્ર લખે તો આ મામલો ઉકેલાઈ શકે છે. સોશિયલ મીડિયા પર પણ આ બાબતને લઈને ઘણો હોબાળો થયો હતો, જેમાં શાહરૂખ ખાનની પીઆર ટીમ પર સવાલો ઉઠાવવામાં આવ્યા હતા. અંતે કોર્ટે અભિનેતાને રાહત આપી હતી.