VIDEO : બોલિવૂડ સિંગર સચેત-પરંપરાએ રાજકોટમાં ગાંઠિયા-જલેબી, થેપલાની મોજ માણી: આજે સાંજે મ્યુઝિકલ નાઈટમાં રાજકોટિયન્સને ડોલાવશે
આજે બુધવારે રાજકોટ મહાપાલિકાની 52મી વર્ષગાંઠ નિમિત્તે તંત્રવાહકો દ્વારા બોલિવૂડની વિખ્યાત ગાયક જોડી સચેત-પરંપરા ટંડનની મ્યુઝિકલ નાઈટનું આયોજન કરવામાં આવ્યું છે. રેસકોર્સમાં રાત્રે આઠ વાગ્યાથી આ બોલિવૂડ મ્યુઝિકલ નાઈટ શરૂ થશે જેમાં એક-એકથી ચડિયાતા બોલિવૂડ ગીત ઉપરાંત આલ્બમ સાંભળી લોકોને કડકડતી ઠંડીમાં ઝૂમવા માટે મજબૂર બનવું પડશે. જો કે આ માટે મહાપાલિકા દ્વારા ગાયક જોડી અને તેની ટીમને 37 લાખ જેટલું ચૂકવણું કરવામાં આવનાર હોવાનું જાણવા મળ્યું છે. ત્યારે આજે સવારે સચેત-પરંપરા રાજકોટ આવી પહોંચ્યા હતા.
આજે રાજકોટને સચેત-પરંપરાની જોડી ડોલાવશે. ત્યારે મનપાના કાર્યક્રમને લઈને સચેત- પરંપરા રાજકોટ આવી પહોંચ્યા હતા. રાજકોટમાં કોઇ બૉલીવુડની હસ્તી આવે અને કાઠિયાવાડી રંગ ન લાગે એવું તો બને નહીં. રાજકોટ કિસાનપરા ચોકમાં આવેલ ટી સ્ટ્રીટમાં ફાફડા ગાંઠીયા થેપલા જલેબીની મજા સચેત-પરંપરાએ માણી હતી. નાસ્તો કરીને કહ્યું રાજકોટ તમને ખૂબજ પ્રેમ કરી છીએ જેનો વિડીયો પણ સોશિયલ મીડિયામાં વાયરલ થઈ રહ્યો છે.
આ પણ વાંચો :RMCને 51 વર્ષ પૂરાઃ સુવિધા ઓછી, દુવિધા વધુ મળી! સમસ્યા ગણી ન શકાય,સુવિધા ગણવી હોય તો આંગળીના વેઢે જ ગણી શકાય
આજે રાજકોટને ડોલાવશે સચેત-પરંપરાની જોડી
સચેત-પરંપરા ટંડનની જોડી દ્વારા જા રાંઝણ રાંઝણ (ફિલ્મ દો પતિ), હમસફર (સૈયારા), બેખયાલી (કબીરસિંહ), મેરે સોણિયા (કબીર સિંહ), શિવ તાંડવ (આલ્બમ), રામ સિયા રામ (આદિપુરુષ), ઓ માઈયા મેનુ યાદ આવે (જર્સી), મલંગ સજના (આલ્બમ) સહિતના ગીતની પ્રસ્તુતી કરવામાં આવશે.
મહાનુભાવોને મેયર એવોર્ડથી સન્માનિત કરવામાં આવશે
આ દરમિયાન વિવિધ ક્ષેત્રમાં મહત્ત્વપૂર્ણ યોગદાન આપનાર મહાનુભાવોને મેયર એવોર્ડથી સન્માનિત કરવામાં આવશે સાથે સાથે દિવાળી ઉત્સવ દરમિયાન રંગોળી સ્પર્ધાના વિજેતાઓને ઈનામ વિતરણ પણ કરવામાં આવશે. કાર્યક્રમનું ઉદ્ઘાટન કૃષિ મંત્રી જીતુભાઈ વાઘાણીના હસ્તે કરાશે. કાર્યક્રમ અંતર્ગત મહાપાલિકા દ્વારા તડામાર તૈયારી શરૂ કરાઈ હતી જેનું નિરીક્ષણ કરવા માટે મેયર નયનાબેન પેઢડિયા, ડેપ્યુટી મેયર નરેન્દ્રસિંહ જાડેજા, સ્ટેન્ડિંગ કમિટી ચેરમેન જયમીન ઠાકર, મ્યુનિસિપલ કમિશનર તુષાર સુમેરા, શાસક પક્ષ નેતા લીલુબેન જાદવ, દંડક મનિષભાઈ રાડિયા, સમાજ કલ્યાણ સમિતિ ચેરમેન સુરેન્દ્રસિંહ વાળા સહિતે સ્થળની રૂબરૂ મુલાકાત લીધી હતી.
