સાબુ-શેમ્પૂથી લઈને ટૂથપેસ્ટ પર દેખાશે ‘વેજ-નોનવેજ’ની નિશાની

શાકાહારી મૂળના ઉત્પાદનો પર લીલો અને બિનશાકાહારી મૂળના ઉત્પાદનો પર લાલ અથવા ભૂરો ડોટ ફરજિયાત; ગ્રાહકોને મળશે સ્પષ્ટ માહિતી

હવે સાબુ, શેમ્પૂ, ટૂથપેસ્ટ, કોસ્મેટિક્સ અને અન્ય ટોયલેટરી ઉત્પાદનો ખરીદતી વખતે ગ્રાહકો સરળતાથી જાણી શકશે કે ઉત્પાદન શાકાહારી મૂળનું છે કે બિનશાકાહારી મૂળનું. કેન્દ્ર સરકારે ‘લીગલ મેટ્રોલોજી (પેકેજ્ડ કોમોડિટીઝ) નિયમો, 2011’માં સુધારો કરીને આવા ઉત્પાદનોના પેકેટ પર વેજ અને નોનવેજ દર્શાવતી નિશાની ફરજિયાત બનાવી છે. આ સુધારો સોમવારથી અમલમાં આવી ગયો છે.

નવા નિયમો મુજબ શાકાહારી મૂળના ઉત્પાદનોના પેકેટ પર લીલા રંગનો ડોટ દર્શાવવો પડશે, જ્યારે બિનશાકાહારી મૂળના ઉત્પાદનો માટે લાલ અથવા ભૂરા રંગનો ડોટ ફરજિયાત રહેશે. આ નિશાની પેકેટના મુખ્ય ડિસ્પ્લે પેનલના ઉપરના ભાગમાં સ્પષ્ટ રીતે દર્શાવવાની રહેશે, જેથી ગ્રાહકોને ખરીદી કરતી વખતે ઉત્પાદનની પ્રકૃતિ વિશે તરત જ જાણકારી મળી શકે.

કેન્દ્ર સરકારના જણાવ્યા મુજબ આ પગલાનો મુખ્ય હેતુ ગ્રાહકોને વધુ પારદર્શક માહિતી ઉપલબ્ધ કરાવવાનો અને તેમની પસંદગી મુજબના ઉત્પાદનો પસંદ કરવામાં સહાય કરવાનો છે. અત્યાર સુધી આવા વેજ-નોનવેજ ચિહ્નો મુખ્યત્વે ખાદ્યપદાર્થો પર જ ફરજિયાત હતા, પરંતુ હવે સાબુ, શેમ્પૂ, ટૂથપેસ્ટ, કોસ્મેટિક્સ અને અન્ય વ્યક્તિગત ઉપયોગની વસ્તુઓ માટે પણ આ વ્યવસ્થા લાગુ કરવામાં આવી છે.

નવી જોગવાઈ અમલમાં આવતા ઉત્પાદક કંપનીઓએ તેમના પેકેજિંગમાં જરૂરી ફેરફારો કરવા પડશે. સરકારનું માનવું છે કે આ નિયમથી ગ્રાહકોને ઉત્પાદનોના મૂળ વિશે વધુ સ્પષ્ટતા મળશે અને ખરીદીના નિર્ણયમાં સરળતા રહેશે.