Vav Assembly By Election 2024 : વાવ બેઠક પર કોંગ્રેસે ગુલાબસિંહ રાજપૂતને આપી ટિકીટ, વિજય મૂહુર્તમાં ભરશે ઉમેદવારી ફોર્મ
ગુજરાતની વાવ વિધાનસભા બેઠક પર યોજાનારી પેટાચૂંટણી માટે કોંગ્રેસે પોતાના ઉમેદવારની જાહેરાત કરી દીધી છે. પાર્ટીએ અહીંથી ગુલાબ સિંહને પોતાનો ઉમેદવાર બનાવ્યો છે. કોંગ્રેસના મહાસચિવ કેસી વેણુગોપાલે એક પત્ર જારી કરીને આ જાણકારી આપી છે.તેમણે આ પત્રમાં લખ્યું છે કે, “કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ ગુજરાતમાં વાવ વિધાનસભા બેઠક પર યોજાનારી પેટાચૂંટણી માટે કોંગ્રેસના ઉમેદવાર તરીકે ગુલાબ સિંહ રાજપૂતના નામને મંજૂરી આપી દીધી છે.”
ગુજરાતમાં પેટાચૂંટણી ક્યારે ?
જો કે ગુજરાતમાં 2 વિધાનસભા બેઠકો ખાલી છે, પરંતુ તાજેતરમાં ચૂંટણી પંચે માત્ર એક બેઠક એટલે કે વાવ પર પેટા ચૂંટણી યોજવાની જાહેરાત કરી હતી. ચૂંટણી પંચના સમયપત્રક અનુસાર વાવ વિધાનસભા બેઠક માટે 13 નવેમ્બરે મતદાન થશે, જ્યારે તેનું પરિણામ 23 નવેમ્બરે જાહેર કરવામાં આવશે. કોંગ્રેસના ગેનીબેન ઠાકોર અહીંથી ધારાસભ્ય હતા, પરંતુ આ વર્ષે યોજાયેલી લોકસભાની ચૂંટણીમાં બનાસકાંઠા બેઠક પરથી જીત્યા બાદ તેમણે ધારાસભ્ય પદેથી રાજીનામું આપી દીધું હતું. ત્યારથી આ સીટ ખાલી છે.
શું છે વાવ વિધાનસભા બેઠકનું સમીકરણ ?
વાવ વિધાનસભા બેઠક કોંગ્રેસનો ગઢ રહી છે. 2017 અને 2022માં અહીં યોજાયેલી વિધાનસભાની ચૂંટણીમાં ગેનીબેન ઠાકોર કોંગ્રેસની ટિકિટ પર જીત્યા હતા. ગેનીબેન ઠાકોરે ફરી એકવાર અહીંથી પાર્ટીની જીતનો વિશ્વાસ વ્યક્ત કર્યો છે. એક વિડિયો જાહેર કરતાં તેમણે કહ્યું કે ગત ચૂંટણીની જેમ આ વખતે પણ તમામ સમાજના લોકો મળીને મતદાન કરીને કોંગ્રેસને જીતાડશે.
