જમીનના ટુકડાની લાલચમાં બે પિતરાઈ ભાઈઓએ એકની એક બહેનને પતાવી દીધી: ઉનાના નેસડા ગામની ઘટના,પોલીસે હત્યારાઓને દબોચ્યા
ગીર સોમનાથ જિલ્લાના ઉના તાલુકાના નેસડા ગામે ભાઈ-બહેનના પવિત્ર સંબંધોને કલંકિત કરતી ઘટના સામે આવી છે. માત્ર 12 વીઘા જમીન પચાવી પાડવાની લાલચમાં બે નરાધમ પિતરાઈ ભાઈઓએ પોતાની જ બહેનની કરપીણ હત્યા કરી નાખી છે. પોલીસે 7 દિવસની સઘન તપાસ બાદ આ રહસ્યમય મર્ડર પરથી પડદો ઉંચકી બંને આરોપી ભાઈઓની ધરપકડ કરી છે.
આ અંગેની વિગતો મુજબ, મૃતક યુવતી મનસુબેન હમાભાઈ ગોહિલ (ઉ.વ. 25) તેના માતા-પિતાના અવસાન બાદ એકલી રહેતી હતી અને વારસામાં મળેલી 12 વીઘા જમીનની એકમાત્ર વારસદાર હતી. મનસુબેનને ગામના જ અને સુરત ખાતે હીરાનું કામ કરતા સતુભાઈ ખસીયા સાથે પ્રેમસંબંધ હતો. મનસુબેનની મિલકત પર ડોળો માંડીને બેઠેલા પિતરાઈ ભાઈઓ વિક્રમ વિરાભાઈ ગોહિલ અને મનુ કનુભાઈ ગોહિલને આ સંબંધ મંજૂર નહોતો.
વિક્રમે મનસુબેનને વિશ્વાસમાં લઈ તેના લગ્ન પ્રેમી સતુ સાથે કરાવી આપવાની લાલચ આપી હતી. આ વિશ્વાસના જોરે તેણે અડધી જમીન પોતાના નામે પણ કરાવી લીધી હતી. ગત 20મી તારીખે લગ્નની મિટિંગના બહાને વિક્રમ મનસુબેનને પોતાના ઘરે લઈ ગયો હતો, જ્યાં બંને ભાઈઓએ મળીને તેનું ગળું દબાવી હત્યા કરી દીધી હતી.
હત્યા બાદ પાપ છુપાવવા ભાઈઓએ બહેનને ‘હાર્ટ એટેક’ આવ્યો હોવાનું નાટક રચ્યું હતું. કોઈને જાણ કર્યા વગર માત્ર 7-8 લોકોની હાજરીમાં લાશને ટ્રેક્ટરમાં નાખી ઉના સ્મશાને લઈ ગયા હતા અને અડધા જ કલાકમાં અંતિમ સંસ્કાર પતાવી દીધા હતા. જોકે, પ્રેમી સતુને શંકા જતાં તેણે પોલીસને જાણ કરી હતી. પોલીસે એફએસએલની મદદ અને ઊંડાણપૂર્વકની તપાસ કરતા સામે આવ્યું કેઆ કુદરતી મૃત્યુ નહીં પણ હત્યા હતી. જે બાદ પોલીસે આરોપીઓ સામે ગુનો નોધી ધરપકડ કરી હતી.
એક ભાઈએ હાથ-પગ પકડ્યા, બીજાએ ગળું દબાવ્યું
પોલીસ તપાસમાં બહાર આવ્યું છે કે, મનસુબેનને મોતને ઘાટ ઉતારવા માટે બંને ભાઈઓએ પહેલાથી કાવતરું રચ્યું હતું. આરોપી વિક્રમ બહેનનું ગળું દબાવી રહ્યો હતો ત્યારે મનુએ તેના હાથ-પગ પકડી રાખ્યા હતા જેથી તે પ્રતિકાર ન કરી શકે. માત્ર 30 મિનિટમાં સ્મશાન વિધિ પતાવી દેવી એ જ આરોપીઓ માટે શંકાનું મુખ્ય કારણ બન્યું હતું
