રાજકોટમાં હેલ્મેટનું ભૂત ફરી ધૂણ્યું! DCPએ કહ્યું, કચેરીમાં આવતા અરજદારોએ પણ હેલ્મેટ પહેરવું જ પડશે
રાજકોટમાં દરેક વાહનચાલકે હેલ્મેટ ફરજિયાત પહેરવું જ પડશે તેવો નિર્ણય લઈ પોલીસ દ્વારા સપ્ટેમ્બર મહિનામાં એક જ દિવસમાં 3500થી વધુ વાહનચાલકોને દંડ ફટકારી દેવાતા દેકારો બલી ગયો હતો. રાજકોટનો દેકારો છેક ગાંધીનગર સુધી સંભળાતાં પોલીસને `માપ’માં રહી દંડની વસૂલાત કરવાનો આદેશ છૂટતાં રસ્તા ઉપર ઉભા રહીને દંડ વસૂલવાનું બંધ કરવામાં આવ્યું હતું પરંતુ ઓનલાઈન દંડ તો ચાલુ જ રાખવામાં આવ્યો છે ત્યારે આજથી ત્રણ દિવસ સુધી હેલ્મેટનું ભૂત ફરી ધૂણવાનું છે. ત્રણ દિવસ સુધી પોલીસ દ્વારા શહેરની દરેક સરકારી કચેરીઓમાં ત્રણ કલાક સુધી ગોઠવાઈને ચેકિંગ કરવામાં આવનાર હોવાનું જાણવા મળ્યું છે.
પોલીસની અલગ-અલગ ટીમ આજે સવારે 10 વાગ્યાથી મહાનગરપાલિકા, કલેક્ટર, બહુમાળી, પોલીસ કમિશનર, પોલીસ હેડક્વાર્ટર સહિતના સ્થળે ઉભી રહી જશે અને હેલ્મેટ પહેર્યા વગર, વાહનમાં નંબરપ્લેટ લગાવ્યા વગર તેમજ કારમાં કાળા કાચ રાખીને આવનારા કર્મચારીઓ અને અધિકારીઓને દંડ ફટકારશે. જો કે દર વખતની જેમ આ વખતે પણ કર્મચારીઓ અને અધિકારીઓ ઓછા પરંતુ અરજદારો જરૂર દંડાશે તે નિશ્ચિત છે.
એકંદરે આ પ્રકારની ડ્રાઈવ કરી પોલીસ દ્વારા હેલ્મેટનો નિયમ અમલમાં જ છે તેની `યાદી’ આપવા માટે ગોઠવાશે. ત્રણ દિવસ સુધી આ ડ્રાઈવ ચાલનાર હોવાથી કચેરીઓમાં આવતા તમામ લોકોએ હેલ્મેટ પહેરી રાખવું પડશે અન્યથા પોલીસ સાથે રકઝક થયા વગર રહેશે નહીં તે નિશ્ચિત છે.
ડીસીપીએ કહ્યું, કચેરીમાં આવતા અરજદારોએ પણ હેલ્મેટ પહેરવું જ પડશે
ડીસીપી (ટ્રાફિક) હરપાલસિંહ જાડેજાએ `વોઈસ ઓફ ડે’ સાથેની વાતચીતમાં જણાવ્યું કે આ ડ્રાઈવ સરકારી કચેરીઓ તેમજ સરકારી કર્મચારીઓ પૂરતી જ છે કેમ કે જો સરકારી કર્મીઓ અને અધિકારીઓ નિયમનું પાલન કરશે તો શહેરીજનો પણ પાલન કરતા રહેશે. જો કે સાથે સાથે તેમણે એમ પણ ઉમેર્યું કે પોલીસની ડ્રાઈવ દરમિયાન સરકારી કચેરીએ આવતા અરજદારોએ પણ હેલ્મેટ પહેરવું જ પડશે, નંબરપ્લેટ લગાવવી જ પડશે અન્યથા તેમને પણ દંડ કરાશે જ. પોલીસ દ્વારા માત્ર અરજદારોને જ `ટાર્ગેટ’ કરવા એવો ઈરાદો નથી પરંતુ અરજદારો પણ નાગરિક જ હોય તેમણે પણ નિયમનું પાલન કરવું પડશે.
