રાજકોટના આમ્રપાલી અન્ડરબ્રિજની હાલત પણ રેલનગર અન્ડરબ્રિજ જેવી જ! વગર વરસાદે પાણીની રેલમછેલ
રાજકોટ મહાપાલિકાની સ્થાપનાના 52મા વર્ષની ઉજવણીના ભાગરૂપે મ્યુઝિકલ નાઈટ, મેયર એવોર્ડ સહિતના કાર્યક્રમનું આયોજન કરવામાં આવ્યું જેમાં આખા તંત્રને `ધંધે’ લગાડી દેવામાં આવ્યું છે ત્યારે લોકો પણ કહેવા લાગ્યા છે કે તંત્રને કાર્યક્રમોનું આયોજન કરવાનું સૂઝે છે પરંતુ અમને પડતી અગવડતા દેખાતી નથી. તંત્ર દ્વારા રેલનગર અન્ડરબ્રિજ બનાવવામાં આવ્યો છે પરંતુ ત્યાં વગર વરસાદે પાણી નીકળતું હોય અડધા કરોડનો ખર્ચ કરવા છતાં હજુ પાણી નીકળવાનું બંધ થયું નથી ત્યાં હવે આમ્રપાલી અન્ડરબ્રિજ કે જેને બન્યાને વધુ વર્ષ વીત્યા પણ નથી ત્યાં જ તેની હાલત રેલનગર અન્ડરબ્રિજ જેવી જ થઈ જવા પામી હોવાનું ચિત્ર સામે આવ્યું છે.
આમ્રપાલી અન્ડર બ્રિજમાં છેલ્લા ઘણા સમયથી દિવાલવાટે પાણી રસ્તા પર આવી રહ્યું હોવા છતાં તંત્રવાહકોના ધ્યાને આ સમસ્યા આવી રહી નથી પરંતુ લોકોને એટલી હદે હાલાકી પડી રહી છે કે તેનો પાર રહેતો નથી. ખાસ કરીને અહીં દિવસમાં ઘણીવાર વાહન સ્લિપ થઈ રહ્યા છે. આ ઉપરાંત દૂર્ગંધને કારણે નીકળવું પણ મુશ્કેલ બની જાય છે. આશ્ચર્યની વાત એ છે કે અહીંથી અનેક નેતાઓ પસાર થવા છતાં તેમના ધ્યાને આ પાણી આવી રહ્યું નથી. જો કે તેઓ કારમાં જ અવર-જવર કરતા હોવાથી તેમને રસ્તા પરનું પાણી નજરે પણ ક્યાંથી પડે ?
મહાપાલિકા દ્વારા કાન ફાડી નાખે તે હદે સ્વચ્છતાના બણગા ફૂંકવામાં આવી રહ્યા છે પરંતુ સ્વચ્છતા જાણે કે આમ્રપાલી અન્ડરબ્રિજને લાગુ ન પડતી હોય તે પ્રકારે દિવાલ અને રેલિંગ ઉપર પાનની પીચકારી જોવા મળી રહી છે પરંતુ તેને સાફ રાખવાનું કોઈને સૂઝી રહ્યું નથી સાથે સાથે વાહનચાલકો અહીં પાનની પીચકારી જ ન મારે તે પ્રકારની વ્યવસ્થા કરાઈ રહી નથી. મહત્ત્વનું એ પણ છે કે ચોખ્ખાઈ રાખવાની જવાબદારી માત્રને માત્ર તંત્રની જ નહીં બલ્કે શહેરીજનોની પણ છે એટલા માટે ગંદકી ફેલાય તે પ્રકારે બેફામ બનીને પાન-ફાકી થૂકવા ન જોઈએ.
આમ્રપાલી અન્ડરબ્રિજમાં ગ્રાઉટિંગ કરવામાં આવશેઃ સિટી ઈજનેર
આ અંગે સેન્ટ્રલ ઝોનના સિટી ઈજનેર અતુલ રાવલનો સંપર્ક કરવામાં આવતાં તેમણે જણાવ્યું હતું કે રેલનગરની જેમ જ આમ્રપાલી અન્ડરબ્રિજમાં પણ ગ્રાઉટિંગ કરવામાં આવશે જેનાથી પાણી નીકળવાની માત્રામાં ઘટાડો થઈ જશે. વોટર લેવલ ઉંચું હોવાને કારણે લીકેજ થઈને પાણી દિવાલવાટે બહાર આવી રહ્યું છે. જો કે જેવી ઠંડી શરૂ થશે એટલે આ પાણી સૂકાઈ જશે આમ છતાં પાણી નીકળે જ નહીં તે માટે ટૂંક સમયમાં રિપેરિંગ શરૂ કરી દેવાશે.
