ભાજપમાં ‘ટીમ વિશ્વકર્મા’ને અપાઈ રહ્યો છે આખરી ઓપ : રાજસ્થાનની ટીમ જાહેર થયા બાદ હવે ગુજરાતની ટીમ અંગે ચર્ચા ફરી શરુ
બિહારની ચૂંટણીમાંથી હળવા થયેલાં ભાજપના મોવડી મંડળે હવે સંગઠન તરફ ફરી ધ્યાન કેન્દ્રિત કર્યું છે. આ કામગીરીના ભાગ રૂપે રાજસ્થાન પ્રદેશ ભાજપની ટીમ જાહેર કરી દેવામાં આવી છે અને હવે ગુજરાતની યાદીને પણ આખરી ઓપ આપવામાં આવી રહ્યો હોવાનું સુત્રોએ જણાવ્યુ છે.
પ્રદેશ ભાજપના સુત્રો અનુસાર, ગુજરાત ભાજપની ટીમ મોટા ભાગે ફાઈનલ થઇ ગઈ છે અને મોવડી મંડળની મંજુરીની રાહ જોવાઈ રહી છે. ગુજરાતમાં પ્રદેશ પ્રમુખ તરીકે જગદીશ વિશ્વકર્માની નિમણુક થઇ ગઈ છે અને તેમણે કામ પણ શરુ કરી દીધુ છે પણ તેમને હજુ સુધી પોતાની ટીમ મળી નથી. આ સુત્રોએ કહ્યુ હતુ કે, પ્રદેશની ટીમ જાહેર થઇ જાય પછી આગામી સ્થાનિક સ્વરાજ્યની ચૂંટણી ઉપર ધ્યાન કેન્દ્રિત કરવામાં આવશે.
આ ઉપરાંત રાજકોટ સહિતના શહેરોમાં શહેર પ્રમુખની પસંદગી થઇ ગઈ છે અને સ્થાનિક ટીમ માટે પ્રદેશ સ્તરે સેન્સ પણ લેવાઈ ગઈ છે તેથી તેની જાહેરાત પણ ગમે ત્યારે થઇ શકે છે.
હવે રાજસ્થાન ભાજપની ટીમ જાહેર થઇ ગઈ છે ત્યારે ટૂંક સમયમાં ગુજરાત ભાજપની ટીમ પણ જાહેર થવાની શક્યતા જણાતા કાર્યકરો અને આગેવાનોમાં ઉત્તેજના વધી ગઈ છે. મોવડી મંડળે રાજસ્થાન ભાજપના પ્રમુખ મદન રાઠોડની ટીમમાં ૯ ઉપપ્રમુખ, ૪ મહામંત્રી, ૭ મંત્રી, ૭ પ્રવક્તા, એક ખજાનચી, એક સહ ખજાનચી, એક કાર્યાલય મંત્રી, એક પ્રકોષ્ઠ પ્રભારી તથા સોશિયલ મીડિયા, આઈ.ટી, અને મીડિયા માટે એક -એક પ્રભારીને મુક્યા છે.
