‘પેટપૂજા’થી ટેક્સચોરી: સોફ્ટવેરનો ઉપયોગ કરનાર રેસ્ટોરન્ટસ સાણસામાં! રાજકોટનાં નાના રેસ્ટોરન્ટ, કેફે-5 સ્ટાર હોટેલને પણ મળી નોટિસ
બીરિયાનીથી લઈને કાઠિયાવાડી મેનુ સુધીની પેટપૂજા તો ગ્રાહકો કરી રહ્યા હતા, પરંતુ બિલોના આંકડામાં ‘જાદુ’ કરીને સરકારની તિજોરીને ખોખલી કરવાની રમત પણ સાથે ચાલી રહી હતી. દેશભરના અનેક હોટેલ અને રેસ્ટોરન્ટ દ્વારા “પેટપૂજા” POS સોફ્ટવેરનો ઉપયોગ કરીને બિલિંગમાં ગડબડ કરી ટેક્સચોરી કરવામાં આવી હોવાની શંકા સામે આવતા આવકવેરા વિભાગે કડક કાર્યવાહી શરૂ કરી છે.
સૂત્રોના જણાવ્યા મુજબ રાજકોટ, જામનગર સહિત ગુજરાતના અનેક શહેરોના રેસ્ટોરન્ટ માલિકો હવે આવકવેરા વિભાગની રડારમાં આવી ગયા છે. ઘણા સંચાલકોને સમન્સ અને નોટિસો પાઠવાઈ છે, જ્યારે કેટલાક સ્થળોએ સીધી દરોડાની કાર્યવાહી પણ હાથ ધરાઈ છે.
અમદાવાદ અને ગોંડલમાં આવેલી ઓનેસ્ટ, લઝીઝ અને ખોડિયાર જેવી જાણીતી રેસ્ટોરન્ટ પર આવકવેરા વિભાગે દરોડા પાડી લાખોની ટેક્સચોરી ઝડપી હોવાનું જાણવા મળ્યું છે. તપાસ દરમિયાન બિલિંગ સિસ્ટમ અને વેચાણના આંકડામાં ગેરરીતિઓ સામે આવતાં વિભાગે કડક પગલાં ભર્યા છે.
સૂત્રો મુજબ રાજકોટમાં નાની ઢાબા જેવી રેસ્ટોરન્ટથી લઈને ફાઈવ સ્ટાર હોટેલ સુધીના ઘણા સંચાલકો હવે આઈ.ટી.ના સાણસામાં આવી ગયા છે. પેટપૂજા સોફ્ટવેર દ્વારા વેચાણના આંકડા છુપાવી સરકારને નુકસાન પહોંચાડનાર સંચાલકો સામે કડક કાર્યવાહી થવાની શક્યતા વ્યક્ત થઈ રહી છે.તપાસ આગળ વધતા આવનારા દિવસોમાં વધુ રેસ્ટોરન્ટ અને હોટેલોના નામ બહાર આવે તેવી સંભાવના છે, જેથી હોટેલ ઉદ્યોગમાં ખળભળાટ મચી ગયો છે.
આ પણ વાંચો:ધો.3નાં વિદ્યાર્થીઓનો શૈક્ષણિક સર્વે: રાજકોટ સહિત રાજયની 490 સ્કૂલોમાં ‘પરખ’ દ્વારા સર્વેક્ષણ કરવામાં આવશે
પેટપૂજા એપ શું છે?
“પેટપૂજા” એક ક્લાઉડ આધારિત રેસ્ટોરન્ટ મેનેજમેન્ટ POS સોફ્ટવેર છે, જેનો ઉપયોગ નાના ઢાબાથી લઈને મોટા રેસ્ટોરન્ટ અને હોટેલ સુધી વ્યાપકપણે થાય છે. આ સોફ્ટવેર દ્વારા બિલિંગ, ઇન્વેન્ટરી, ઓનલાઈન ઓર્ડર, ગ્રાહક ડેટા, રિપોર્ટિંગ અને પગારપત્રકનું સંચાલન સરળ બને છે.પરંતુ અધિકારીઓના જણાવ્યા મુજબ કેટલાક કિસ્સાઓમાં વેચાણના આંકડામાં ફેરફાર કરી ટેક્સચોરી કરવા માટે આ પ્લેટફોર્મનો દુરુપયોગ થતો હોવાની આશંકા સામે આવી છે.
