આવક ટૂંકીને ખર્ચ ‘તગડો’ : રાજકોટ સહીત રાજ્યભરમાં આવકવેરાની ઢગલાભર નોટિસ નીકળતા ગભરાટ

રાજકોટ સહિત રાજ્યભરમાં જે લોકોનાં ‘તગડા’ ખર્ચા હોવાં છતાં મર્યાદિત આવક દર્શાવી છે તેવા હજારોને લોકોને આઇ.ટી.એ નોટિસ ફટકારી છે.એક તરફ હજુ આઈ.ટી. રિટર્ન ફાઇલ કરવાની પક્રિયા ધીમી ગતિએ શરૂ થઈ છે ત્યાં હવે નોટિસનાં જવાબ દેવા તૈયાર રહેવું પડશે.

સૂત્રોએ કહ્યું હતું કે,આવકવેરા વિભાગ હવે એવા લોકો પર નજર રાખી રહ્યું છે જેઓ વધુ ખર્ચ કરે છે પણ આવક ઓછી દર્શાવે છે. આ માટે, તે બેંકો અને અન્ય સંસ્થાઓ પાસેથી મોટી રકમના વ્યવહારો વિશે માહિતી એકત્રિત કરી રહ્યું છે. તાજેતરમાં આવા સેંકડો ખાતા રડાર હેઠળ આવ્યા છે. તેમની વિગતોની તપાસ કરવામાં આવી રહી છે. હાલમાં, વિભાગે આવા શંકાસ્પદ ખાતાધારકોને નોટિસ ફટકારી છે.

કરચોરીના કેસ પકડવા માટે, બેંકો, રજિસ્ટ્રાર અને અન્ય નાણાકીય સંસ્થાઓ પાસેથી વિગતો લેવામાં આવી રહી છે. આધુનિક પદ્ધતિનો ઉપયોગ કરીને ડેટા વિશ્લેષણ કરવામાં આવી રહ્યું છે. ઇન્કમટેક્સનાં ઉચ્ચ અધિકારીએ જણાવ્યું હતું કે, વિભાગ તેમના દરેક વ્યવહાર પર નજર રાખી રહ્યું છે. જો તેઓ કોઈપણ રીતે ગુપ્ત રીતે વ્યવહાર કરવાનો પ્રયાસ કરે છે, તો એકત્રિત કરેલી માહિતીથી તેઓ પકડી શકાય છે. જો કોઈ મોટી રકમનું રોકાણ કરે છે, મિલકત ખરીદે છે, અથવા ક્રેડિટ કાર્ડ પર તેની આવક કરતાં વધુ ખર્ચ કરે છે, તો તે વિભાગના રડાર હેઠળ આવશે.

આ પણ વાંચો : ગંભીરા બ્રિજ દુર્ઘટના : લટકતી ટેન્કરને ઉતારવા બલૂન ટૅક્નોલૉજીનો ઉપયોગ,કેવી રીતે કામ કરે છે આ ટેક્નોલોજી, જુઓ વિડીયો

આ સંસ્થાઓ દર વર્ષે વિભાગને ખરીદી અને વેચાણ અહેવાલો આપે છે, જે તમારા મોટા વ્યવહારો વિશે માહિતી આપે છે. રાજયમાંથી આવા અનેક શંકાસ્પદ ખાતા મળી આવ્યા છે. પ્રાપ્ત વિગતોને આવકવેરા રિટર્ન, ટીડીએસ, જીએસટી અને વિદેશી વ્યવહારો સાથે મેચ કરવામાં આવી રહી છે. હાલમાં, આવા ખાતાધારકોને નોટિસ જારી કરવામાં આવી છે અને તેમનો પક્ષ રજૂ કરવા માટે સમય આપવામાં આવ્યો છે. જો તેમનો જવાબ સાચો નહીં મળે, અને તેઓ કરચોરીમાં સંડોવાયેલા જણાશે,તો તેમની સામે કાર્યવાહી કરવામાં આવશે.