જીવના જોખમે સ્મગલિંગ: અમદાવાદ એરપોર્ટ પર અબુ ધાબીથી પેટમાં સોનું છુપાવી લાવનાર યુવક ઝડપાયો, એક્સ-રે બાદ 89 લાખનું સોનું કઢાયું
અમદાવાદ ઇન્ટરનેશનલ એરપોર્ટ પર કસ્ટમ્સ વિભાગના એર ઇન્ટેલિજન્સ યુનિટ (AIU) એ સોનાની દાણચોરીના એક અજીબોગરીબ કિસ્સાનો પર્દાફાશ કર્યો છે. અબુ ધાબીથી આવેલી ફ્લાઈટમાં એક ભારતીય મુસાફર પોતાના પેટમાં સોનાની કેપ્સ્યૂલ્સ ગળીને છુપાવી લાવ્યો હોવાનું સામે આવ્યું છે. સુરક્ષા એજન્સીઓએ આરોપી પાસેથી અંદાજે રૂ. 21.89 લાખની કિંમતનું શુદ્ધ સોનું જપ્ત કરી તેની ધરપકડ કરી છે.
ઘટનાની વિગતો મુજબ, 19 ફેબ્રુઆરીએ અબુ ધાબીથી એર અરેબિયાની ફ્લાઈટ દ્વારા અમદાવાદ ઉતરેલા ‘શાહરુખ’ નામના મુસાફર પર કસ્ટમ્સને શંકા ગઈ હતી. ‘APIS પ્રોફાઇલિંગ’ દ્વારા મળેલી ચોક્કસ બાતમીના આધારે જ્યારે તેની કડક પૂછપરછ કરવામાં આવી, ત્યારે તેણે કબૂલાત કરી હતી કે તેણે પોતાના શરીરમાં સોનાની કેપ્સ્યુલ્સ છુપાવી છે.
મેજિસ્ટ્રેટની મંજૂરી બાદ આરોપીને તાત્કાલિક સિવિલ હોસ્પિટલમાં દાખલ કરવામાં આવ્યો હતો. એક્સ-રે રિપોર્ટમાં તેના પેટમાં શંકાસ્પદ વસ્તુઓ હોવાની પુષ્ટિ થઈ હતી. ડોક્ટરોની દેખરેખ હેઠળ તેના શરીરમાંથી કુલ 4 શંકાસ્પદ ગોળાઓ બહાર કાઢવામાં આવ્યા હતા. જેમાંથી 135.200 ગ્રામ વજનનું 24 કેરેટ શુદ્ધ સોનું મળી આવ્યું હતું, જેની બજાર કિંમત રૂ. 21,89,564 આંકવામાં આવી છે. નવાઈની વાત એ છે કે, ચોથો ગોળો લોખંડનો હોવાનું બહાર આવ્યું હતું.
કસ્ટમ્સ એક્ટ હેઠળ સોનું જપ્ત કરી આરોપી શાહરુખની ધરપકડ કરવામાં આવી છે. એર ઇન્ટેલિજન્સ યુનિટ હવે એ તપાસ કરી રહ્યું છે કે આ દાણચોરી પાછળ કઈ મોટી ગેંગનો હાથ છે.
