કચ્છના સામખિયાળી-માળિયા નેશનલ હાઇવે અકસ્માતની હારમાળા : ટ્રક, ટેમ્પો, બસ સહિત 7 વાહનો અથડાયા,એકનું ઘટનાસ્થળે મોત
રાજ્યમાં અવારનવાર અકસ્માતની ઘટના બનતી હોય છે. ત્યારે ફરી એકવાર કચ્છમાં ગમખ્વાર અકસ્માત સર્જાયો છે. કચ્છના સામખિયાળી માળીયા નેશનલ હાઇવે પર એકસાથે સાત વાહનો વચ્ચે અકસ્માત સર્જાતા 1 વ્યક્તિનું ઘટનાસ્થળે જ મોત નીપજ્યું છે. અકસ્માતના પગલે ટ્રાફિકજામના દ્રશ્યો સર્જાયા હતા. અકસ્માતની જાણ થતાં સ્થાનિક પોલીસનો કાફલો ઘટનાસ્થળે દોડી આવ્યો હતો અને વાહનોને દૂર કરી હાઇવે પરથી માર્ગ ખુલ્લો કરાવ્યો હતો.
આ અકસ્માત બાદ પાછળથી આવતી અન્ય એક ટ્રક અને ટ્રેલર પણ અથડાયા હતા. અકસ્માતના કારણે સુરજબારી તરફના માર્ગે 4થી 5 કિલોમીટર લાંબો ટ્રાફિક જામ સર્જાયો હતો. સ્થાનિક પોલીસ અને હાઈવે પેટ્રોલિંગની ટીમે ટ્રાફિક નિયંત્રણની કામગીરી હાથ ધરી હતી.
અકસ્માત ગ્રસ્ત ટ્રકનું નિરીક્ષણ કરી રહેલા ચાલકને પાછળથી આવેલા ટેમ્પોએ ટક્કર મારી હતી. આ ટક્કરમાં ટ્રક ચાલકનું ઘટનાસ્થળે જ મૃત્યુ થયું હતું. મૃતદેહને પોસ્ટમોર્ટમ માટે લાકડિયા સરકારી હોસ્પિટલમાં ખસેડવામાં આવ્યો છે. સામખિયાળી પોલીસે આ મામલે તપાસ શરૂ કરી છે. પોલીસના જણાવ્યા મુજબ આ ઘટનામાં એક એસટી બસ પણ અકસ્માતનો ભોગ બની છે. કુલ સાત જેટલા વાહનો આ અકસ્માતમાં સંડોવાયા છે.
