રાજકોટના જંગલેશ્વરમાં મેગા ડિમોલિશનની તૈયારીના જુઓ આકાશી દ્રશ્યો: ભારે હૈયે ઘર છોડવા લોકો મજબૂર, પોલીસનાં ધાડેધાડાં ઊતર્યાં
રાજકોટના સૌથી સંવેદનશીલ વિસ્તારમાં જેની ગણના થાય છે તે જંગલેશ્વરમાં સોમવારથી મહાપાલિકા દ્વારા ડિમોલિશનની કાર્યવાહી કરવામાં આવનાર છે. જો કે તે પહેલાં અસરગ્રસ્તો દ્વારા હાઈકોર્ટના દ્વાર ખટખટાવી ડિમોલિશનની કાર્યવાહી સામે સ્ટે મેળવવા માટે દાદ માંગવામાં આવી હતી પરંતુ શુક્રવારે થયેલી સુનાવણી દરમિયાન કોર્ટ દ્વારા સ્ટે આપવામાં ન આવતા હવે તંત્ર દ્વારા સોમવારથી આજી નદીના પટ્ટામાં 992 અને 40 મીટરના ટાઉન પ્લાનિંગ રોડ ઉપર ઉભા થયેલા 497 મળી કુલ 1489 મકાન, દુકાન, નાના-મોટા ઓટા સહિતના દબાણો ઉપર બૂલડોઝર ફેરવવાનું શરૂ કરવામાં આવશે.
રાજકોટના જંગલેશ્વર સહિતના વિસ્તારોમાં 1400થી વધુ ગેરકાયદેસર મિલકતો પર બુલડોઝર ફેરવવા માટે રાજકોટ મહાનગરપાલિકા અને પોલીસ તંત્ર સજ્જ બન્યું છે, જેના ભાગરૂપે આજે 21 ફેબ્રુઆરી, શનિવારના રોજ ભક્તિનગર સર્કલ પાસેની શેઠ હાઈસ્કૂલમાં કોર્પોરેશનના 1200 અને પોલીસ વિભાગના 1500થી વધુ અધિકારીઓ-કર્મચારીઓનો જંગી કાફલો એકત્ર થયો છે.
અનેક લોકોએ સહકાર આપી મકાન ખાલી કર્યા
મ્યુનિસિપલ કમિશનર અને વિજિલન્સ સહિતની ટીમો દ્વારા સવારથી સાંજ સુધી જંગલેશ્વરની 78 જેટલી સોસાયટીઓ અને ગલીઓમાં 7 અલગ-અલગ રૂટ પર ફૂટ પેટ્રોલિંગ હાથ ધરીને દબાણકારોને સ્વેચ્છાએ ઘર ખાલી કરવા સમજાવવામાં આવી રહ્યા છે. આ મેગા ડિમોલિશન ઓપરેશન પૂર્વે કોઈ અનિચ્છનીય ઘટના ન બને તે માટે સમગ્ર વિસ્તારમાં ચુસ્ત પોલીસ બંદોબસ્ત ગોઠવી દેવામાં આવ્યો છે. અનેક જગ્યાએ લોકોમાં તંત્ર સામે રોષ જોવા મળી રહ્યો છે તો બીજી તરફ લોકો તંત્રની કામગીરીમાં સહકાર આપી રહ્યા છે અને સ્વેચ્છાએ મકાન ખાલી કરી રહ્યા છે તો લોકો જાતે જ મકાન પણ તોડી રહ્યા છે.
700 થી 800 મેન પાવર તેમજ પોલીસ સાથે દબાણો દૂર કરાશે: મ્યુ.કમિશનર
દબાણ હટાવવાની કામગીરી મામલે RMC કમિશનર તુષાર સુમરા દ્વારા જણાવવામાં આવ્યું હતું કે 23મી ફેબ્રુઆરીના રોજ જંગલેશ્વર વિસ્તારમાં નદી પટ્ટ ના તેમજ ટીપી રોડ પરના દબાણો દૂર કરવાની કામગીરી કરવામાં આવશે આ માટેની કાર્યવાહી શરૂ કરી દેવામાં આવી છે. 700 થી 800 મેન પાવર તેમજ પોલીસ સાથે દબાણો દૂર કરાશે. હાલ જે લોકો પોતાના મકાન તોડી રહ્યા છે તેમજ ખાલી કરી રહ્યા છે તે માટે ટ્રેક્ટર સહિતના સાધનો આપી રહ્યા છે જેથી સામાન શિફ્ટ થઈ શકે અને વિસ્તાર ખાલી કરાવી શકાય. ઘણા લોકો સહકાર આપી મકાન ખાલી કરી રહ્યા છે. ડિમોલિશન સ્થળે કંટ્રોલ પણ ત્યાં જ બનાવવામાં આવ્યો છે. આ કામગીરીમાં મોટી સંખ્યામાં અધિકારીઓ તેમજ પોલીસ કાફલો જોડાયો છે.
27 ફેબ્રુઆરીએ વધુ સુનાવણી કરવામાં આવશે
બીજી બાજુ કલેક્ટર તંત્ર જંગલેશ્વરમાં જ્યાં ડિમોલિશન કરવાનું છે તે ફાઈનલ પ્લોટમાં વસતાં લોકોને વૈકલ્પિક આવાસ અથવા પુન:વસન કરાવવાની માંગ અંગે હાઈકોર્ટમાં આગામી 27 ફેબ્રુઆરીએ વધુ સુનાવણી કરવામાં આવશે.
હાઈકોર્ટ દ્વારા ડિમોલિશન ઉપર કોઈ પ્રકારની રોક લગાવવામાં ન આવતાં મહાપાલિકાએ પણ રાજકોટના ઈતિહાસમાં થનારા સૌથી મોટા ડિમોલિશન માટેની તૈયારીઓ પૂર્ણ કરી લીધી છે. તંત્ર દ્વારા દબાણકર્તાઓને સમયાંતરે લેખિત નોટિસ આપી ડિમોલિશન અંગે માહિતગાર કરવામાં આવ્યા હતા સાથે સાથે પોતાની રીતે જ દબાણો દૂર કરવા માટે પણ પૂરતો સમય આપવામાં આવ્યો હતો. માર્ગરેખા તેમજ નદી પટ્ટાની હદ અંગે સ્પષ્ટ માર્ગદર્શન આપવામાં આવ્યું હોવા છતાં અમુક સ્થળે ગેરકાયદેસર દબાણ યથાવત હોવાથી હવે તંત્ર તેને તોડવાનું શરૂ કરશે.
મહાપાલિકા દ્વારા 19-2-2026થી અલગ-અલગ ટીમ બનાવી જ્યાં ડિમોલિશન થવાનું છે ત્યાં લોકોને દબાણ દૂર કરવા કહેવામાં આવી રહ્યું છે. એકંદરે તંત્ર દ્વારા અલગ-અલગ સાત ઝોનમાં 1130થી વધુ અધિકારીઓ-કર્મચારીઓની ટીમ બનાવવામાં આવી છે. આ ઉપરાંત ડિમોલિશન દરમિયાન સ્થળ ઉપર વિશેષ કંટ્રોલરૂમ ઉભો કરવામાં આવશે. બીજી બાજુ હાઈકોર્ટ તરફથી કોઈ જ `રાહત’ ન મળતાં અનેક દબાણકર્તાઓએ જાતે જ મકાન સહિતના દબાણ ખાલી કરવાનું શરૂ કરી દીધું હોવાનું જાણવા મળ્યું છે.
ડિમોલિશન કરવા માટે તંત્રની તૈયારી
બૂલડોઝર આડા સૂઈ જવું કે બીજા કોઈ છમકલા કરનારની ખેર નથી: પોલીસની ખાસ તૈયારી
સ્વાભાવિક પણે કોઈનું ઘર તૂટતું હોય તો રોષ થાય જ, આવું જ કંઈક ડિમોલિશન સમયે પણ થવાની શક્યતાને ધ્યાનમાં રાખી પોલીસ દ્વારા ખાસ તૈયારી કરી લેવામાં આવી છે. સ્થળ ઉપર ક્રાઈમ બ્રાન્ચ, એસઓજી સહિતની ૧૦થી વધુ ટીમ ઉપરાંત રાજકોટનો મહત્તમ પોલીસ કાફલો તૈનાત રહેશે ત્યારે આ સમયે બૂલડોઝર આડા સૂઈ જવું કે અન્ય કોઈ પ્રકારના છમકલા કરનારા તત્ત્વોની ખેર નહીં રહે તે વાત નિશ્ચિત છે.
સવારે સાત વાગ્યાથી ડિમોલિશન શરૂ થઈ જશે
મહાપાલિકાના સૂત્રોએ જણાવ્યું કે સોમવારે સવારે સાત વાગ્યાથી ડિમોલિશનની કાર્યવાહી શરૂ કરી દેવામાં આવશે. એક સાથે ૧૪૮૯ દબાણ દૂર કરવાના હોવાથી કદાચ એક દિવસમાં ડિમોલિશન પૂરું થાય તેવી શક્યતા ન જણાતી હોય તંત્ર દ્વારા બેથી ત્રણ દિવસ સુધી આ કાર્યવાહી કરાય તેવી શક્યતા પણ રહેલી છે.
