કથિત પત્રકારને વીડિયો આપનાર ‘મીસ્ટર ઈન્ડિયા’ની શોધખોળ : જો તમે પણ ભોગ બન્યા છો તો આ નંબર પર કરો સંપર્ક

રાજકોટના ગાંધીગ્રામ વિસ્તારમાં આવેલી સ્કૂલના સંચાલકની ચેમ્બર કે જ્યાં તેઓ સ્ત્રીમિત્ર સાથે હોય તેવા વીડિયો મેળવી 25 લાખની ખંડણી માંગ્યાના ચકચારી કિસ્સામાં ક્રાઈમ બ્રાન્ચે બે કથિત પત્રકાર તેમજ એક યુવક સહિત ત્રણ શખસોને દબોચી લીધા બાદ પૂછપરછમાં વધુ ખુલાસા થવા પામ્યા હતા. એકંદરે પકડાયેલો કથિત પત્રકાર કે જે સોશ્યલ રિપોર્ટ નામનું સાંધ્ય દૈનિક ચલાવી રહ્યો છે તેની પાસે આ વીડિયો આખરે આવ્યો ક્યાંથી તે દિશામાં પોલીસે તપાસ કરતાં એક ભરવાડ શખસે આશિષને આવો એક નહીં બલ્કે છથી સાત વીડિયો આપ્યા હોવાનું રિમાન્ડ દરમિયાન આશિષે જ કબૂલ્યું હતું.

આશિષ ડાભીએ પોલીસને જણાવ્યું કે તે અલગ-અલગ વૉટસએપ ગ્રુપમાં ન્યુઝ પ્લેટ મુકતો હોવાથી આ ગ્રુપમાં તેને વીડિયો આપનાર ભરવાડ શખસ પણ સામેલ હતો. આ પછી એ શખસે આશિષ ડાભીનો મોબાઈલ ઉપર સંપર્ક સાધ્યો હતો. આ પછી બન્ને વચ્ચે રૂબરૂ મુલાકાત થઈ ત્યારે એ શખસે આશિષને આવા છથી સાત વીડિયો આપ્યા હતા. જો કે આ વ્યક્તિનું નામ શું હતું, તે ક્યાં રહે છે તે સહિતની વિગતો આશિષ પાસે ન હોવાનું રટણ કર્યું હતું પરંતુ પોલીસને આ વાત ગળે ઉતરી રહી નથી.

સૂત્રોએ જણાવ્યું કે જોગાનુજોગ ગણો કે જાણીજોઈને ગણો પોલીસે જ્યારે આશિષની ધરપકડ કરી બરાબર ત્યારે જ તેનો ફોન ખરાબ થઈ ગયો હોય તે શરૂ થયા બાદ વીડિયો આપનાર ભરવાડ શખસનો મોબાઈલ નંબર પોલીસને આપશે તેવું આશિષે પોલીસને જણાવ્યું હતું ! એકંદરે વીડિયો આવી ગયા બાદ આશિષ ડાભી દ્વારા સ્કૂલ સંચાલકને ન્યુઝ પ્લેટના સ્વરૂપમાં મોકલી બ્લેકમેઈલ કરવાનું શરૂ કરાયું હતું. આ પછી એજાઝ ગોરી અને ધર્મેશ દોશીની તેમાં એન્ટ્રી થઈ હતી અને ત્રણેયે મળીને ખંડણીનો ખેલ શરૂ કર્યો હતો. એકંદરે અત્યાર સુધી પોલીસની તપાસમાં આશિષને વીડિયો આપનાર ભરવાડ શખસ મિસ્ટર ઈન્ડિયા હોવાનું સામે આવ્યું છે !

`ક્રાઈમ બ્રાન્ચ હોય તો શું થયું ?’ કથિત પત્રકારોએ શેખી પણ હાંકી’તી

પોલીસ સૂત્રોએ જણાવ્યું કે જે જગ્યા પર એક લાખની ખંડણી લેવાની હતી તે સમર્પણ હોસ્પિટલ કે જે ફરિયાદીના મીત્રની છે ત્યાં એજાઝ અને ધર્મેશ દોશી પહોંચ્યા હતા. જો કે તેના પહેલાં ક્રાઈમ બ્રાન્ચની ટીમ ત્યાં તૈનાત થઈ ગઈ હતી અને જેવા પૈસા લીધાં કે બન્નેને દબોચી લેવાયા હતા. બન્નેને પકડ્યા બાદ પોલીસે ક્રાઈમ બ્રાન્ચના સ્ટાફ તરીકેની ઓળખ આપી તો લાજવાને બદલે ગાજીને `ક્રાઈમ બ્રાન્ચ હોય તો શું થયું ?’ તેવી શેખી પણ હાંકી’તી !!

બોગસ પત્રકારનો ભોગ બનેલા ડર્યા વગર ક્રાઈમ બ્રાન્ચનો સંપર્ક કરે

ક્રાઈમ બ્રાન્ચ દ્વારા પ્રજાજોગ એવી અપીલ પણ કરવામાં આવી હતી કે આ ત્રિપૂટી અથવા તો આવા કોઈ બોગસ પત્રકારનો ભોગ બન્યા હોય તો એવા લોકો ડર્યા વગર ક્રાઈમ બ્રાન્ચનો 63596 29896 ઉપર સંપર્ક કરી શકે છે. આ અંગેની માહિતી આપનારનું નામ અને ઓળખ ગુપ્ત રાખવામાં આવશે પરંતુ પોલીસ દ્વારા એક દાખલો બેસે તેવી સજ્જડ કાર્યવાહી કરવામાં આવશે.