RMCને 51 વર્ષ પૂરાઃ સુવિધા ઓછી, દુવિધા વધુ મળી! સમસ્યા ગણી ન શકાય,સુવિધા ગણવી હોય તો આંગળીના વેઢે જ ગણી શકાય

રાજકોટ મહાનગરપાલિકાની સ્થાપનાને આજે 52 વર્ષ પૂર્ણ થઈ ચૂક્યા છે. 1973માં આપણને આ દરજ્જો મળ્યો હતો. મહાપાલિકાનું મુખ્ય કામ લોકોને વધુમાં વધુ સુવિધા મળી રહે તેના ઉપર ધ્યાન કેન્દ્રીત કરવાનું હોય છે પરંતુ આ બાવન વર્ષ દરમિયાન શહેરીજનોને સુવિધા ઓછી અને દુવિધા વધુ મળી છે તે વાતનો ઈનકાર અત્યારે રાજકોટવાસીઓ કરી જ ન શકે, કરી જ શકે અને ન જ કરી શકે…! નળ, ગટર, લાઈટ, આવાસ, સફાઈ, પાણી સહિતની પ્રાથમિક સુવિધાના નામે અત્યારે ઘણાખરા વિસ્તારો સાથે રીતસરની મજાક થઈ રહી છે આમ છતાં અધિકારીઓ અને પદાધિકારીઓ એ.સી.ચેમ્બરમાં બેસીને રાજકોટને `લીવેબલ રાજકોટ’ બનાવવાના શેખચીલ્લી સમાન સ્વપ્ન સેવી રહ્યા છે તે આ લખનાર રાજકોટીયન્સનું જ નહીં બલ્કે દરેક શહેરીજનનું દૂર્ભાગ્ય ગણાશે.

શહેરીજનનની સૌથી પહેલી જરૂરિયાત પૂરતું પાણી મળી રહે તેની હોય છે. અત્યારે શહેરમાં 20 મિનિટ દૈનિક પાણી વિતરણ તો થઈ રહ્યું છે પરંતુ અનેક વિસ્તારમાં ધીમા ફોર્સથી પાણીનું વિતરણ, ડહોળા પાણીનું વિતરણ થવાની ફરિયાદ મળ્યા વગર રહેતી નથી. બાવન વર્ષની અંદર મહાપાલિકા એક નવો જળસ્ત્રોત ઉભો કરી શકી નથી. દર વર્ષે બજેટમાં હજારો કરોડો રૂપિયાની મસમોટી જાહેરાત કરવામાં આવે છે પરંતુ છેલ્લે તો રાજકોટે સરકાર પાસેથી વેચાતું પાણી જ લેવું પડે છે તે સૌથી મોટી કરુણતા આ શહેરની છે. શહેરની વસતીમાં વધારો થઈ રહ્યો છે અને બિનસત્તાવાર રીતે અત્યારે વસતી 24 લાખ આસપાસ પહોંચી ગઈ છે આમ છતાં વર્ષો જૂના ડેમ ઉપર જ પાણીનો આધાર રાખવો પડી રહ્યો છે. તંત્રએ આટલા વર્ષમાં માત્ર પાણીના ટાંકા નાના-મોટા કરવા અથવા તેમાં સામાન્ય વધારો કરવા સિવાય કશું જ કર્યું નથી.

શહેરમાં દરરોજ વાહનોની સંખ્યામાં વધારો થઈ રહ્યો છે પરંતુ રસ્તા સાંકળા હોવાને લીધે વારંવાર અકસ્માત, ટ્રાફિકજામ થઈ રહ્યા હોય મહાપાલિકા દ્વારા એક બાદ એક બ્રિજ બનાવવામાં આવી રહ્યા છે. આ પ્રમાણે મહાપાલિકા દ્વારા મહિલા કોલેજ અન્ડરબ્રિજ, રેલનગર અન્ડરબ્રિજ, કેકેવી ચોક ઓવરબ્રિજ, સિવિલ હોસ્પિટલ ચોક ઓવરબ્રિજ, ગોંડલ રોડ, આમ્રપાલી અન્ડરબ્રિજ બનાવવામાં આવ્યા છે પરંતુ આ પૈકી એકમાત્ર સિવિલ હોસ્પિટલ ચોક ઓવરબ્રિજ જ એવો છે જ્યાં વાહનો સુખરૂપ પસાર થઈ શકે છે આ સિવાય તમામ બ્રિજ ઉપરથી ચાલવું એટલે જોખમ સાથે લઈને ચાલવા જેવું બની ગયું છે જે તંત્રના વિઝન સામે પ્રશ્નાર્થ ઉભા કરી રહ્યું છે કેમ કે તંત્ર દ્વારા આ બ્રિજ લાંબા ગાળાના આયોજનના ભાગરૂપે જ બનાવવામાં આવ્યા છે.

શહેરીજનોની બીજી સૌથી મોટી જરૂરિયાત ઘરનું ઘર મળી રહે તેની હોય છે. કેન્દ્ર-રાજ્ય સરકાર દ્વારા મહાપાલિકાને અબજો રૂપિયાની ગ્રાન્ટ આવાસ યોજનાઓ માટે ફાળવવામાં આવી છે જેના થકી તંત્રએ આવાસ યોજના તૈયાર પણ કરી છે આમ છતાં અત્યારે એક પણ આવાસ યોજનામાં સમસ્યા ન હોય તેવું બતાવવાની કોઈનામાં હિંમત નથી. અરે, સમસ્યા તો છોડો હજારો આવાસ ખાલી પડ્યા છે આમ છતાં તેની ફાળવણી કરવાનું મુહૂર્ત શાસકો કે અધિકારીઓ કાઢી શક્યા નથી તેનાથી શરમજનક વાત બીજી કઈ હોઈ શકે ?

ફલાણો રસ્તો પહોળો કરવાનો છે, ઢીકણો રસ્તો પહોળો કરવાનો છે તેવી જાહેરાતો, દાવાઓ વારંવાર અધિકારીઓ અને પદાધિકારીઓના મોઢે સાંભળી ચૂક્યા છીએ પરંતુ મહત્તમ લોકો જ્યાંથી પસાર થાય છે તે એક પણ રસ્તો હજુ સુધી પહોળો કરાયો નથી. અધિકારીઓ અને પદાધિકારીઓને જ્યારે આ વિશે પૂછાય ત્યારે ફલાણો વિસ્તાર લાઈન ઓફ પબ્લીક સ્ટ્રિટ હેઠળ મતલબ કે કપાતમાં છે અને તેની ફાઈલ તૈયાર કરાઈ છે જેના ઉપર કામ ચાલી રહ્યું છે તેવા જવાબ સિવાય ઠોસ પ્રતિક્રિયા અપાઈ જ નથી.

શહેરની જૂની-ઐતિહાસિક શાકમાર્કેટ જેવી કે જ્યુબિલી, લાખાજીરાજ સહિતની માર્કેટની કાયાપલટ કરવાનું લગભગ એક બાળક પુખ્તવયનું થઈ જાય ત્યાં સુધી સાંભળી છે પરંતુ વાસ્તવિક્તા એ છે કે હજુ સુધી ટેન્ડર સિવાય કશું જ આગળ વધી શક્યું નથી. દર વર્ષે બજેટ જાહેર થાય ત્યારે આ માર્કેટનું નવીનિકરણ કરવાની જાહેરાત કરી દેવાય છે પરંતુ જાહેરાત કર્યા બાદ શાસકો અને અધિકારીઓ આખરે શું થયું તે જોવાની તસ્દી લેતાં નથી.

આ ઉપરાંત શહેરમાં ઉભરાતી ગટરનું પાણી રસ્તા ઉપર વહી જવું, કોલ સેન્ટરમાં ફોન ન ઉપડવા, સરખો જવાબ ન મળવા સહિતની અનેક સમસ્યાઓ એવી છે જે ગણવા બેસીએ તો ગણી શકાય એમ નથી જેની સામે સુવિધા ગણવી હોય તો આંગળીના વેઢે ગણી શકાય તેટલી જ છે…!!

ચાર મહાનગરમાંથી ત્રણનો જ વિકાસ થઈ શકે, રાજકોટના `કહેવાતા’ ધુરંધરો પાસે વિઝન નથી ?

ગુજરાતમાં અત્યારે મુખ્ય ચાર મહાનગર છે જેમાં અમદાવાદ, વડોદરા, સુરત અને રાજકોટ સમાવિષ્ટ છે. અમદાવાદ, વડોદરા અને સુરત વધી રહેલી વસતી, લોકોની જરૂરિયાત પ્રમાણે સુવિધા આપવા એક વિઝન સાથે નક્કર કામગીરી કરે છે પછી ભલે તે વહેલી-મોડી હોય પરંતુ એક વખત સુવિધા મળી જાય એટલે લોકોએ પાછું વળીને જોવું ન પડે તેવી કાર્યવાહી કરે છે પરંતુ વાત જ્યારે રાજકોટની આવે ત્યારે અહીંના કહેવાતા ધુરંધરો જેમાં શાસકો અને અધિકારીઓ બન્ને આવી જાય છે તેઓ પાણીમાં બેસી જતાં હોવાથી શહેરીજનો વિઝનની મોટી તૂટ હોવાનું અનુભવી રહ્યા છે.

મેયર, મ્યુ.કમિશનર સહિતના વિદેશમાં સુવિધા જોવા જાય, આવ્યા બાદ શું આપી દીધું ?

મેયર હોય કે મ્યુનિસિપલ કમિશનર હોય વર્ષમાં એકાદ-બે વખત અલગ-અલગ દેશમાં લોકોને કેવી સુવિધા મળે છે તે જોવા માટે જતાં જ હોય છે સાથે સાથે દેશના અન્ય રાજ્ય જેમાં બેંગ્લોર સહિતના સમાવિષ્ટ છે ત્યાં પણ જાય છે પરંતુ જેવા તેઓ રાજકોટ આવે એટલે `ભલા માણસ ત્યાંથી સુવિધા અહીં સાકાર કરવી ઘણી અઘરી છે’ કહીને બેસી જતાં હોવાને કારણે માત્રને માત્ર દેશ-વિદેશ પ્રવાસના નામે ખર્ચ સિવાય બીજું કશું મળતું નથી.

હદ ન કહેવાય ? નાકરાવાડી ડમ્પીંગ સાઈટ પર કચરાનો ઢગલો હજુ સુધી દૂર નથી થયો !

સ્વચ્છતા સર્વેક્ષણ આવે એટલે રાજકોટની ભાગોળે નાકરાવાડી ખાતે આવેલી ડમ્પીંગ સાઈટમાં કચરાનો લાખો કિલોનો ઢગલો દર વર્ષે માર્કસ કાપી જાય છે. આવું પાછલા ઘણા વર્ષથી થઈ રહ્યું છે આમ છતાં તંત્રવાહકો કચરાનો ઢગલો દૂર કરાવી શક્યા નથી. શું આ લાપરવાહીની હદ ન કહેવાય ? જ્યારે પણ આ વિશે પૂછવામાં આવે ત્યારે ટેન્ડર પ્રક્રિયામાં છે તેવા જવાબ સિવાય બીજું કશું મળતું નથી.

અટલ સરોવર મળ્યું પણ સ્માર્ટ સિટી હજુ ઘણું દૂર

રાજકોટવાસીઓ ફરી શકે તે માટે મહાપાલિકા દ્વારા રૈયા સ્માર્ટ સિટી ખાતે અટલ સરોવર તૈયાર કરાયું છે જેનું સંચાલન ખાનગી એજન્સીને સોંપી દેવાયું છે. બીજી બાજુ અહીં સ્માર્ટ સિટી બનશે તેવી જાહેરાત કરાયાના વર્ષો વીતી જવા છતાં હજુ સુધી આ કામ કેટલે અંશે પૂર્ણ થયું છે અને ક્યારે પૂરું થશે તે કહેવાની સ્થિતિમાં અત્યારે કોઈ જ નથી.