શિક્ષણ વિભાગની 9 વેબસાઈટનું કરાયું રિ-લોન્ચિંગ : વેબસાઈટમાં શિક્ષણલક્ષી ઠરાવો, નીતિઓ વગેરેની માહિતી ઝડપી-સરળતાથી મળશે
શિક્ષણ વિભાગ અને તેના હસ્તકના 8 ખાતાના વડાની કચેરીઓ સહિત કુલ 9 જેટલી વેબસાઈટનું ગાંધીનગર ખાતેથી રિ-લોન્ચિંગ કરવામાં આવ્યું હતું. આ પ્રસંગે ઉચ્ચ-ટેકનીકલ શિક્ષણ મંત્રી ઋષિકેશભાઈ પટેલતેમજ પ્રાથમિક, માધ્યમિક, પ્રોઢ શિક્ષણ રાજ્ય મંત્રી પ્રફુલભાઈ પાનસેરીયા ઉપસ્થિત રહ્યા હતા.
આ પ્રસંગે ઋષિકેશભાઈ પટેલે જણાવ્યું હતું કે,વિકસિત ગુજરાત 2047ના ભાગસ્વરૂપે ડિજિટલ ઈન્ફ્રાસ્ટ્રક્ચર તૈયાર કરવું એ રાજ્ય સરકારની પ્રાથમિકતા છે. જે અંતર્ગત આજે રૂ. 50.11 લાખના ખર્ચે તૈયાર કરવામાં આવેલી શિક્ષણ વિભાગ અને વિભાગ હસ્તકની અદ્યતન વેબસાઇટનું રિ-લોન્ચિંગ કરીને જાહેર જનતા માટે ખુલ્લી મૂકવામાં આવી છે. મંત્રીએ વધુમાં ઉમેર્યું કે, આ વેબસાઈટ દ્વારા રાજ્યના નાગરિકો અને વિદ્યાર્થીઓને શિક્ષણલક્ષી અગત્યના ઠરાવો, નીતિઓ, પરિપત્રો વગેરેની માહિતી ડિજિટલ સ્વરૂપે ઝડપી અને સરળતાથી મળી રહેશે.
વધુ વિગતો આપતા પ્રફુલભાઈ પાનસેરીયાએ કહ્યું હતું કે, આ વેબસાઈટ થકી શિક્ષણલક્ષી યોજનાઓ, વિદ્યાર્થીઓ માટે શિષ્યવૃતિની માહિતી, રાજ્ય સરકારની શિક્ષણ ક્ષેત્રની નવિન પહેલો વગેરેની માહિતી સરળતાથી મળી રહેશે. આજે રિ-લોન્ચ કરવામાં આવેલી 9 વેબસાઇટમાં કમિશનર ઉચ્ચ શિક્ષણ, નિયામક એન.સી.સી.ની કચેરી, નિયામક પ્રાથમિક શિક્ષણની કચેરી, નિરતંર શિક્ષણ અને સાક્ષરતા નિયામકની કચેરી, રાજ્ય પરીક્ષા બોર્ડ, ગુજરાત ઇન્સ્ટિટ્યૂટ ઓફ એજ્યુકેશન ટેકનેલોજી, ગુજરાત રાજ્ય શાળા પાઠ્યપુસ્તક બોર્ડ તથા ગુજરાત શૈક્ષણિક સંશોધન અને તાલીમ પરિષદ વિભાગનો સમાવેશ થાય છે.
આ પણ વાંચો : જો રાજકોટ સિવિલ હોસ્પિટલ આગળ આવે તો ‘અંગદાન’ અભિયાનને મળશે વેગ: 60 ટકા દર્દીઓ રાહમાં
આ વેબસાઈટ રિ-લોન્ચિંગ કાર્યક્રમમાં ઉચ્ચ-ટેકિન્કલ શિક્ષણ વિભાગના અધિક મુખ્ય સચિવ સુનયના તોમર, પ્રાથમિક-માધ્યમિક શિક્ષણ અગ્ર સચિવ મુકેશ કુમાર, ઉચ્ચ શિક્ષણ કમિશનર દિલિપ રાણા સહિત ઉચ્ચ અધિકારીઓ ઉપસ્થિત રહ્યા હતા.
