ગાંઠિયા-જલેબી-મિઠાઈ ઉપર રાજકોટની ‘સર્જિકલ સ્ટ્રાઈક’ : એક કિલોથી લઈ દસ કિલો સુધીના ઑર્ડર: ધંધાર્થીઓને ‘તડાકો’ બોલી ગયો
દશેરાનું પર્વ હોય અને ગાંઠિયા-જલેબી-મિઠાઈ ઉપર તડાપીટ ન બોલે એવું રાજકોટ જ નહીં બલ્કે આખા ગુજરાતમાં ક્યાંય બની શકે જ નહીં ! દર વર્ષની જેમ આ વર્ષે ઉપર નવ દિવસ સુધી મન ભરીને રાસ લીધાં બાદ દશેરા નિમિત્તે રાજકોટીયન્સે ગાંઠિયા-જલેબી અને અવનવી મિઠાઈ ઉપર રીતસરની `સર્જિકલ સ્ટ્રાઈક’ કરીને તહેવારને `યાદગાર’ બનાવી દીધો હતો.
સવારે ૬:૩૦ વાગ્યાથી જ શહેરના સદર બજાર, ભક્તિનગર, પેલેસ રોડ, એસ્ટ્રોન ચોક, અમીન માર્ગ સહિતના વિસ્તારોમાં ફરસાણની દુકાનો ઉપર લાં…બી લાઈનો લાગેલી જોવા મળી હતી. દશેરાના દિવસે લાઈનમાં ઉભું રહેવું પણ એક `ગર્વ’ની ક્ષણ હોય લોકો હોંશેહોંશે ગોઠવાઈ ગયા હતા અને પોતાના વારાની આતૂરતાથી રાહ જોઈ રહ્યા હતા. એકંદરે એક કિલોથી લઈ દસ કિલો સુધીના ગાંઠિયા-જલેબી તેમજ મિઠાઈના ઑર્ડર એક બાદ એક આવી રહ્યા હોવાથી ધંધાર્થીઓને પણ `તડાકો’ બોલી ગયો હતો અને સૌના ચહેરા ખુશીથી છલકાઈ ઉઠ્યા હતા.
