શહેરના ઢેબર રોડ પર અટીકા ફાટક પાસે યુવાન પર બુટલેગર અને તેમના પુત્ર અને પુત્રીએ હુમલો કરી બળાત્કારના ગુનામાં ફીટ કરી દેવાની ધમકી આપતા ભક્તિનગર પોલીસે ગુનો નોંધી કાર્યવાહી કરી છે.
વિગત મુજબ, વાવડી પાસે પુનિતનગર શેરી નં.11માં રહેતા સંજય કનુ પીઠવાએ નોંધાવેલી ફરિયાદમાં આરોપીમાં બુટલેગર કાના ગઢવી, કાના ગઠવીનો દીકરો અને તેમની પુત્રીનું નામ આપતા જણાવ્યું હતું કે, બપોરના સમયે પોતે અટીકા ફાટક પાસે મિત્ર ભીમભાઇ તેમજ રાજુભાઇ સાથે ઉભો હતો ત્યારે કાના ગઢવીના પુત્રએ પાઇપ માથામાં ઝીંકી દીધો હતો. તેમને રોકવા જતા તેમણે બીજો ઘા પગ પર ઝીંકી દીધો હતો.
જેથી સંજયભાઇ નીચે પડી ગયા હતા અને થોડીવારમાં કાનો ત્યાં આવ્યો હતો અને તેણે ફડાકા ઝીંકી તને મારીને દાટી દઇશ તેવી ધમકી આપી હતી. તેમજ થોડીવારમાં તેમની પુત્રીએ આવી અને કાઠલો પકડી કહ્યું કે, તને હું ખોટા બળાત્કારના કેસમાં ફીટ કરાવી દઇશ. જેથી ઇજાગ્રસ્ત યુવકને સારવાર માટે સિવિલમાં ખસેડવામાં આવ્યો હતો.અને આ મામલે પોલીસે ગુનો નોંધ્યો છે.
