રાજકોટ : ટીપી સ્કીમમાં સાગઠિયાનું વધુ એક કારસ્તાન: નાના રસ્તાની પણ કરી નાખી 40% કપાત !
- માધાપર ગામ મહાપાલિકામાં ભળતાં જ સાગઠિયાને ભાવતું મળી ગયું’ને ટીપી સ્કીમ તૈયાર કરી આચર્યું કૌભાંડ: નિયમ પ્રમાણે મુખ્ય રસ્તા ઉપર જ ૪૦% કપાત કરી શકાય
- સરકારે તમામ રસ્તાનો ફરી સર્વે કરી સુધારા સાથે ટીપી સ્કીમ તૈયાર કરવા આપ્યો આદેશ
વોઈસ ઓફ ડે, રાજકોટ
મહાપાલિકાના તત્કાલિન ટાઉન પ્લાનિંગ ઓફિસર અને હાલ જેલના સળિયા પાછળ ધકેલાયેલા એમ.ડી.સાગઠિયાના કૌભાંડો પૂરા થવાનું નામ જ લઈ રહ્યા નથી. સાગઠિયાએ પોતાના દસેક વર્ષના કાર્યકાળમાં અનેક ગેરરીતિઓ આચરીને ઘર ભર્યું છે ત્યારે હવે તેના પાપ છાપરે ચડીને પોકારી રહ્યા છે. એમ.ડી.સાગઠિયાએ નાના રસ્તામાં પણ ૪૦% કપાત કરી નાખી બિલ્ડરો તેમજ ભાગીદારોને ખટાવવા માટે કીમિયો કર્યો હતો પરંતુ તેની આ કારસ્તાની સરકારના ધ્યાને આવી જતાં આખી ટીપી સ્કીમ નવેસરથી તૈયાર કરવા આદેશ આપ્યો હોવાનું જાણવા મળી રહ્યું છે.
અગાઉ `રૂડા’માં અને થોડા વર્ષો પહેલાં મહાપાલિકામાં ભળેલા માધાપર ગામ માટે ટાઉન પ્લાનિંગ સ્કીમ તૈયાર કરવાનો સરકાર તરફથી આદેશ છૂટતાં જ સાગઠિયા આણી ટોળકીની દાઢ ડળકી હતી અને પછી કપાતનું કારસ્તાન શરૂ થયું હતું. નિયમ પ્રમાણે કોઈ પણ ટીપી સ્કીમ તૈયાર થાય એટલે મુખ્ય રસ્તાઓ ઉપર જ ૪૦% કપાત કરવાની થાય છે પરંતુ સાગઠિયા એન્ડ કંપનીએ નાની-નાની શેરીઓને પણ કપાતમાં દર્શાવી દઈને બિલ્ડરો તેમજ ભાગીદારોના ગજવા ભરવા પ્રયાસ કરાયો હતો.
વધુમાં જાણવા મળ્યા પ્રમાણે જમીન માલિકની જમીનના ૪૦% જમીન રસ્તા માટે કપાતમાં લેવામાં આવતી હોય છે. નિયમ પ્રમાણે ૪૦% કપાતમાં ફક્ત મુખ્ય માર્ગો જ લેવાના હોય છે પરંતુ માધાપર ટીપી સ્કીમ નં.૧૧માં મુખ્ય રોડ-રસ્તાની સાથે સાથે નાના રસ્તાઓને પણ કપાતમાં ગણી લેવામાં આવ્યા હતા. એકંદરે નાના રસ્તાઓ પણ જમીન માલિકોને કપાતના નામે બાદ આપી દેવામાં આવ્યા છે.
