PUCના દરમાં 10 થી 50 રૂપિયાનો વધારો: રાજ્યના સેન્ટર સંચાલકોની રજૂઆત બાદ લેવાયો નિર્ણય
રાજ્યના વાહન વ્યવહાર વિભાગે પોલ્યુશન અન્ડર કંટ્રોલ (PUC)ના દરમાં વધારો જાહેર કર્યો છે. આ સર્ટિફિકેટ મેળવવા માટે હવે વાહન ચાલકે રૂપિયા 10 થી 50 સુધીનો વધારો ચૂકવવો પડશે. રાજ્યભરમાં કાર્યરત પી.યુ.સી. સેન્ટરના સંચાલકોની વારંવારની રજૂઆત બાદ આ નિર્ણય લેવામાં આવ્યો છે. સુત્રો અનુસાર, સરકારે આઠ વર્ષ બાદ પી.યુ.સી.માં વધારો કર્યો છે.
વાહનવ્યવહાર વિભાગ દ્વારા આ અંગે સત્તાવાર નોટિફિકેશન જાહેર કરી દેવાયું છે. જેમાં ટુ-વ્હીલર, થ્રી-વ્હીલર, કાર તેમજ ડીઝલ અને હેવી મોટર વાહનો માટે પીયુસીના નવા દર નક્કી કરવામાં આવ્યા છે. વિભાગે સ્પષ્ટ સૂચના આપી છે કે પીયુસી સેન્ટરના સંચાલકો નિયત ફી સિવાય એક પણ રૂપિયા વધારાના વસૂલ કરી શકશે નહીં. નિયમ ભંગ થવાના કેસમાં આરટીઓ કચેરી દ્વારા કાર્યવાહી કરવામાં આવશે.
નવા દર મુજબ ટુ-વ્હીલર માટે અગાઉ 30 રૂપિયા વસૂલવામાં આવતા હતા, જેમાં 20નો વધારો કરીને હવે 50 રૂપિયા લેવામાં આવશે. થ્રી-વ્હીલર માટે જૂનો દર 50 રૂપિયા હતો, જે હવે 10 રૂપિયા વધારીને 60 રૂપિયા કરવામાં આવ્યો છે. કાર માટે અગાઉ રૂપિયા 80 ફી હતી, જેમાં સીધો 50નો વધારો કરીને 130 રૂપિયા કરવામાં આવ્યા છે. જ્યારે ડીઝલ અને હેવી મોટર વાહનો માટે અગાઉ 1-00રૂપિયા વસૂલવામાં આવતા હતા, તેમાં પણ રૂપિયા 50નો વધારો કરીને હવે 150 રૂપિયા ફી નક્કી કરવામાં આવી છે.
આ પણ વાંચો :રાજકોટમાં બ્રિજ, હોર્ડિંગ, થાંભલા ઉપર લટકતાં વાયર ચાર દિવસમાં દૂર કરો: મહાપાલિકાનો એજન્સીઓને આદેશ
વાહનવ્યવહાર વિભાગના જણાવ્યા અનુસાર, પીયુસી સેન્ટરો દ્વારા વાહનનું સર્ટિફિકેટ ઇશ્યૂ કરતી વખતે તેની તમામ વિગતો ઓનલાઇન અપલોડ કરવી ફરજિયાત છે. જોકે, ઘણા પીયુસી સેન્ટરો દ્વારા આ નિયમનું યોગ્ય રીતે પાલન થતું ન હોવાનું સરકારના ધ્યાનમાં આવ્યું છે. કેટલાક સેન્ટરો માત્ર સમયમર્યાદા મુજબ બિનચકાસણી સાથે ઓનલાઇન સર્ટિફિકેટ ઇશ્યૂ કરી દેતા હોવાનું અગાઉ તપાસમાં બહાર આવ્યું હતું.
સૂત્રોના જણાવ્યા અનુસાર, પીયુસી સેન્ટરોના સંચાલકો દ્વારા લાંબા સમયથી ભાવ વધારો કરવાની માગ કરવામાં આવી રહી હતી. મશીનોની જાળવણી, સોફ્ટવેર ખર્ચ અને કામગીરીના ખર્ચમાં વધારો થતો હોવાની રજૂઆત ઉચ્ચ સ્તરે કરવામાં આવી હતી. આ રજૂઆતને ધ્યાનમાં રાખીને રાજ્ય સરકારે ભાવ વધારો મંજૂર કર્યો હોવાનું માનવામાં આવે છે.
