રાજકોટ એરપોર્ટ પર ઇન્ટરનેશનલ ફલાઈટની ઉડાન માટે પ્રક્રિયા ‘ફાસ્ટટ્રેક’ પર: આજે કસ્ટમનાં ડે.કમિશ્નરની વિઝીટ
રાજકોટ એરપોર્ટ પર ઇન્ટરનેશનલ ફલાઈટની ઉડાન માટેની પ્રક્રિયા “ફાસ્ટટ્રેક”પર હાથ ધરવામાં આવશે.20 દિવસ પૂર્વે ઇમિગ્રેશનની કામગીરી પુરી થઈ જતાં આજે જામનગર કસ્ટમની ટીમ વિઝીટ કરવા આવી રહી છે.વર્ષ 2026ની શરૂઆત સાથે ઇન્ટરનેશનલ ફલાઈટની ઉડાન માટેની દિશામાં એરપોર્ટ ઓથોરિટીએ ગતિવિધિઓ તેજ કરી છે.
જામનગર કસ્ટમ વિભાગના ડેપ્યુટી કમિશ્નર રેણુ ડામોર અને ટીમ આજે હીરાસર એરપોર્ટ આવશે.જ્યાં બપોરે 12 વાગ્યે કસ્ટમ ટીમનાં અધિકારીઓ નિરીક્ષણ કરી ઓથોરિટી સાથે મિટિંગ કરશે.જેમાં કસ્ટમ ડિપાર્ટમેન્ટની જરૂરિયાત મુજબનું ઈન્ફ્રાસ્ટ્રક્ચર અને ઇકવિપમેન્ટ સહિતનાં મુદ્દાઓ પર એરપોર્ટ ડાયરેક્ટર સાથે ચર્ચાઓ થશે.
આ પણ વાંચો :રેલવેએ ગર્ડર મુકવા મંજૂરી ન આપતાં રાજકોટના સાંઢિયા પુલ નિર્માણમાં ફરી વિઘ્ન : જાન્યુ.સુધીમાં કામ પૂર્ણ થશે કે કેમ? તંત્ર ધંધે લાગ્યું
27 જુલાઈ 2023 નાં વડાપ્રધાન મોદીના હસ્તે હીરાસર ઇન્ટરનેશનલ એરપોર્ટનું લોકાપર્ણ કરવામાં આવ્યું હતું.અઢી વર્ષ બાદ પણ હજુ સુધી ઇન્ટરનેશનલ ફલાઈટ શરૂ થઈ નથી,1400 કરોડનાં ખર્ચે 2500 એકરમાં અલગ અલગ ફેઈઝમાં ઇન્ટરનેશનલ એરપોર્ટનું નિર્માણ થશે.જેમાં અત્યારે 1 ફેઈઝ બની ગયો છે.આગામી 25 વર્ષને ધ્યાને રાખી તબક્કાવાર એરપોર્ટનું ડેવલપમેન્ટ થશે.
એરપોર્ટ પર શું સમસ્યા છે..? દરરોજ 30 પેસેન્જરો પાસેથી પ્રતિભાવ
એરપોર્ટ ઓથોરિટી ઓફ ઇન્ડિયાએ પેસેન્જરોને શું સમસ્યા છે એ જાણવા દરરોજ 30 પેસેન્જરો પાસેથી પ્રતિભાવ લેવામાં આવી રહ્યા છે.જેની સમીક્ષા કરી તેનો ઉકેલ આવે એ માટે પ્રયત્નો થઈ રહ્યા છે.
ઓથોરિટીનો એકરાર,મોબાઈલ નેટવર્ક અને વાઇફાઇની સુવિધાનો અભાવ
ટર્મિનલ પર અવારનવાર વાઈ ફાઈ અને મોબાઈલ નેટવર્ક મળતું નથી એવી ફરિયાદો ઉભી થઇ હતી જેનો ખુદ ઓથોરિટીએ એકરાર પણ કર્યો છે.હવેથી વાઈ ફાઈ એક્સસનો સમય 45 મિનિટથી વધારીને 4 કલાક કરવામાં આવ્યો છે.આખરે આ સમસ્યાનો ઉકેલ ગણતરીનાં સમયમાં થઈ જશે તેવી ખાતરી આપ્યા બાદ આજે બીએસએનએલ નાં અધિકારીઓ આ ઉકેલ લાવશે.જ્યારે મોબાઈલ કનેકટીવીટી માટે ઇન બિલ્ડીંગ સોલ્યુશન્સ માટે ફરીથી ટેન્ડરીંગ શરૂ કરવામાં આવ્યું છે.
પેસેન્જર્સને સ્ટારબક્સ અને નેસકેફેની કોફીની જ્યાફ્ત લઈ શકશે:આવતા સપ્તાહથી આઉટલેટ શરૂ થશે
એરપોર્ટ પર ખાસ કરીને પેસેન્જરોની ફરિયાદ હતી કે,ટર્મિનલમાં ફૂડ માટેની ખાસ વ્યવસ્થા નથી.માંડ એકાદ આઉટલેટ છે જ્યાં પણ વધુ ઓપશન ન હોવાથી ફૂડ એન્ડ બેવરેજ સુવિધા માટે આગામી તા.10 ડિસેમ્બરએ સ્ટાર બક્સનાં કાફેટએરિયા અને આવતા સપ્તાહમાં નેસકેફે નો પ્રારંભ થશે.
