પટેલ દંપતિનો પ્લાન ફેલ : અબુધાબીથી આવેલા દંપતી પાસેથી 13 કરોડની લક્ઝરી ઘડીયાલો અમદાવાદ એરપોર્ટ પર જપ્ત
અબુધાબીથી અમદાવાદ આવેલા એક પટેલ દંપતિ પાસેથી કસ્ટમ અધિકારીઓએ વિદેશી બનાવટની ૧૩ કરોડની કીમતની બે લક્ઝરી ઘડિયાલો પકડી પાડી છે. રાજસ્થાનના પ્રતાપગઢના રહેવાસી દંપતી વહેલી સવારે અબુ ધાબીથી બે અલગ અલગ ફ્લાઇટ્સમાં અમદાવાદ એરપોર્ટ પર ઉતર્યા હતા. એક એર અરેબિયા અને બીજી ઇન્ડિગો દ્વારા આવ્યા હતા.
સૌ પહેલા પત્નીએ હવાઇમથકમાંથી બહાર નીકળવાનો પ્રયાસ કર્યો હતો અને તેના કાંડામાં રૂમાલ બાંધવાને કારણે કસ્ટમ્સ અધિકારીઓને શંકા થઈ હતી. તેની તપાસ કરતાં 11.70 કરોડની ઘડિયાળ મળી આવી હતી. તેનો પતિ પણ રૂ 1.29 કરોડની વિદેશી વૈભવી ઘડિયાળ પહેરીને મળી આવ્યો હતો.
પ્રાથમિક પૂછપરછમાં બંનેએ ઘડિયાલ પોતાની માલિકીનો દાવો કર્યો હતો. જો કે, બાદમાં આ ઘડિયાલોની દાણચોરી કરવાનો પ્રયાસ કર્યો હોવાનું સ્વીકાર્યું હતું. આ દંપતીએ જણાવ્યું હતું કે તેમના કાકાએ તેમને ઘડિયાળો અમદાવાદ લાવવા કહ્યું હતું, જ્યાં તેઓ તેમને અન્ય વ્યક્તિને સોંપવાના હતા. દંપતીની ધરપકડ કરવામાં આવી હતી અને તપાસ શરૂ કરવામાં આવી હતી. દંપતીની ટ્રાવેલ હિસ્ટ્રીની તપાસ ચાલી રહી છે.
જપ્ત કરાયેલી લક્ઝરી ઘડિયાળો સ્વિસ કંપનીઓની લિમિટેડ એડિશન ઘડિયાળો છે. એક ઓડિમાર્સ પિગુએટ રોયલ ઓક ગ્રીન લિમિટેડ એડિશન છે, જે રોયલ ઓક પરિવારનો ભાગ છે, જેનું ઉત્પાદન કંપની દ્વારા 1972થી કરવામાં આવે છે. તેમાં 18 કેરેટ સોનું અને મૂલ્યવાન હીરા છે. બીજી ઘડિયાળ રિચર્ડ મિલે છે, જે અબજોપતિઓ, હસ્તીઓ અને હોલીવુડ અને બોલિવૂડના સ્ટાર્સ દ્વારા પહેરવામાં આવતી વૈભવી સ્વિસ બ્રાન્ડ છે
