NCCની સી-સર્ટિફિકેટનું પેપર ફૂટ્યુ : પરીક્ષા રદ
ગુજરાતમાં વધુ એક પેપર ફૂટતા પરીક્ષાર્થીઓમાં રોષનો માહોલ
ગુજરાતમાં વારંવાર પેપર લીક થવાના બનાવોને કારણે ભરતી પ્રક્રિયામાં પારદર્શિતા અંગે ચિંતા છે ત્યાં આજે વધુ એક પેપર લીક થતાં ભારે ચર્ચા જાગી છે. આજે લેવાનારી NCCની સી-સર્ટીફીકેટ પરીક્ષાનું પેપર લીક થઇ જતા આખા રાજ્યની પરીક્ષા રદ કરવામાં આવી છે. રાજકોટમાં આ પરીક્ષા વિરાણી સાયન્સ કોલેજમાં યોજાનારી હતી અને પરીક્ષાર્થીઓ યુનિફોર્મમાં સજ્જ થઇને કેન્દ્ર ઉપર પહોંચી ગયા હતા પણ છેલ્લી ઘડીએ પેપર લીક થયાનું બહાર આવતા આ પરીક્ષા રદ કરવામાં આવી હોવાનું જાહેર કરવામાં આવ્યું હતું.
સુત્રોના જણાવ્યા અનુસાર, પરીક્ષા યોજાવાની હતી તેના એક કલાક પહેલા લીક થયેલું પેપર બહાર આવ્યું હતું, ત્યારબાદ પરીક્ષા રદ કરવામાં આવી હતી.
રાજકોટની જેમ ભાવનગરમાં પણ NCC સી.સર્ટિફિકેટની 448 જેટલા કેડેટ પરીક્ષા આપવાના હતા. સી.સર્ટિફીકેટ સાથે નેવલ અને એરફોર્સને લગતી પરીક્ષા યોજાવાની હતી. ભાવનગર અને અમરેલીમાંથી 448 ઉમેદવારો એનસીસી પ્રમાણપત્ર પરીક્ષામાં બેસવાના હતા.
બીજી તરફ વલસાડમાં આવેલી શાહ એન.એચ કોમર્સ કોલેજમાં બી.કોમનું એકાઉન્ટના 5માં સેમેસ્ટરનું પેપર લીક થયું હોવાના આક્ષેપ સાથે વિદ્યાર્થીઓએ હોબાળો કર્યો હતો. મોટી સંખ્યામાં વિદ્યાર્થીઓ પ્રિન્સિપલની ઓફિસ પર પહોંચીને સુત્રોચ્ચાર કર્યા હતા સાથે જ પેપર લીક થવાની ઘટનાને લઈને કોલેજના શિક્ષકની સંડોવણીના આક્ષેપો કરવામાં આવ્યા હતા.
