અમારી ‘તાકાત’જતી રહી…મિસ યુ સર : સ્વ.વિજયભાઈ રૂપાણીને પુજીત રૂપાણી ટ્રસ્ટનાં બાળકોએ રડતી આંખે આપી શ્રદ્ધાંજલિ

વિદાય એક યુગપુરુષની…મિસ યુ સર…તમો અમારી સ્મૃતિમાં સદા અમર રહેશો…ની ભાવભીની લાગણી સાથે પુજીત રૂપાણી મેમો.ટ્રસ્ટનાં બાળકોએ રડતી આંખે સ્વ.વિજયભાઈ રૂપાણીને વિદાય આપી હતી.સવારથી બાળકો અને કર્મચારીઓ શ્રદ્ધા સુમન અર્પણ કરવા માટે હાજર રહ્યા હતાં.

ઉલ્લેખનીય છે કે, ઝુંપડપટ્ટીમાં રહેતા બાળકો અને કચરો વીણતા બાળકોનાં જીવનમાં શિક્ષણની જ્યોત જલાવવા સ્વ.વિજયભાઈએ તેમના પુત્ર પુજીતની યાદમાં પુજીત રૂપાણી ટ્રસ્ટ 21 વર્ષ પૂર્વે બનાવ્યું હતું.જ્યાં બધા જ બાળકોમાં વિજયભાઈને તેમનો લાડકવાયો દીકરો પુજીત જોવા મળતો તેવું વિજયભાઈએ અનેક વખત કહ્યું હતું.

આ બાળકોના ઉજ્જવળ ભવિષ્ય માટે સારી સ્કૂલોમાં અભ્યાસ સહિતનો શિક્ષણ માટેનો તમામ ખર્ચ પુજીત રૂપાણી ટ્રસ્ટ ઉઠાવતું,3000 જેટલા રાંકનાં રતન અત્યારે ડોકટર, સી.એ.એન્જિનિયર તો કોઈ સારી ઉચ્ચ પદવી પર નોકરી કરી વિજયભાઈના સ્વપ્નને સાકાર કરી રહ્યા છે.

ગઈકાલે અહીં રહી અભ્યાસ કરી ચુકેલા વિદ્યાર્થીઓ પણ વિજયભાઈ ને શ્રદ્ધાંજલિ પાઠવવા માટે આવ્યા હતા જેમાં પુજીત રૂપાણી ટ્રસ્ટની પ્રથમ બેચની પ્રથમ વિદ્યાર્થીની રહી ચૂકેલી યુવતીએ ભાવુકતાથી કહ્યું હતું કે,સરની વિદાય અમારા માટે કારમી છે.

આ પણ વાંચો : સ્વ.વિજય રૂપાણીની શ્રદ્ધાંજલિ યાત્રામાં મહિલાઓએ ઓમ નમઃ શિવાય મંત્રોચ્ચાર કર્યા : ‘વિજયભાઈ અમર રહો’ના નારા લાગ્યા. રાજકોટ હિબકે ચડ્યું

શબ્દોમાં વર્ણન કરવું શક્ય નથી,જેમનાં સાથથી અમે મજબુત સમજતાં હતાં,અમારી તાકાત જતી રહી છે.પુજીત રૂપાણી ટ્રસ્ટ પાસેથી અંતિમયાત્રા નીકળી હતી.જ્યાં બાળકો “મિસ યુ સર”સાથે રડી પડ્યાં હતાં.અહીં તાજેતરમાં બાળકો સાથે વિજયભાઈ એ લીધેલી છેલ્લી તસ્વીર મુકવામાં આવી હતી,આ તસવીર જોઈને સૌ કોઈની આંખ ભીંજાઈ ગઈ હતી.