રાજકોટમાં ખેલાયો ખૂની ખેલ : લોધિકાના પારડી ગામે યુવકને છરીના ઘા ઝીંકી મોતને ઘાટ ઉતાર્યો, પરિવારમાં કલ્પાંત
રાજકોટ જિલ્લામાં ગુનેગારોને પોલીસનો કોઈ ડર જ ના રહ્યો હોય તેમ ચોરી, લૂંટફાટ, હત્યા અને છેડતી જેવા બનાવોમાં ચિંતાજનક વધારો જોવા મળી રહ્યો છે. એવામાં રાજકોટના લોધિકાના પારડી ગામે હત્યાની ઘટના સામે આવી છે જેમાં જેતપુરના દિલીપ મકવાણા નામના યુવકને છરીના ૯ ઘા ઝીંકી મોતને ઘાટ ઉતરતા ચકચાર મચી જવા પામી છે. યુવક અહીં સસરાના ઘરે પત્નીને મૂકવા આવ્યો’ને ખુની ખેલ ખેલાયો હતો. ત્યારે પત્નીના પૂર્વ પ્રેમી પર શંકા પોલીસે શરૂ તપાસ શરૂ કરી છે.
મળતી વિગતો અનુસાર 28 વર્ષીય યુવક રવિની પારડીના પૂલ પાસે છરીના ૯ ઘા ઝીંકી હત્યા કરાયેલી લાશ મળી આવતાં અરેરાટી વ્યાપી ગઇ છે. કણકોટના મુળ વતની અને દોઢ મહિના પહેલા જ લોધીકા તાબેના પારડી ગામની યુવતિ સાથે લવમેરેજ કર્યા હતા. ત્યારે યુવતિના પુર્વ પ્રેમીએ હત્યા કર્યાની શંકા પરિવારજનોએ વ્યક્ત કરતાં પોલીસે તપાસનો ધમધમાટ શરૂ કર્યો છે.
પારડીના પૂલ પાસે કરાઈ હત્યા
મુળ કણકોટની એકલવ્ય સોસાયટી મફતીયાપરામાં રહેતો રવિ દિલીપભાઇ મકવાણા (ઉ.વ.૨૮) હાલમાં પારડી ગામે રૂમ રાખીને પત્નિ પૂજા ઉર્ફ પૂનમ સાથે રહેતો હતો. રાતે તેની લાશ પારડીના પૂલ પાસે પડી હોવાની જાણ થતાં શાપર પોલીસ મથકના પીએસઆઇ વી. જી. જેઠવા સહિતના સ્ટાફે દોડી જઇ તપાસ શરૂ કરી હતી અને મૃતદેહને પોસ્ટમોર્ટમ માટે રાજકોટ ખસેડયો હતો.
દોઢ મહિના પહેલા જ કર્યા હતા પ્રેમ લગ્ન
બનાવની જાણ થતાં હત્યાનો ભોગ બનનાર રવિના માતા હંસાબેન, પિતા દિલીપભાઇ હીરાભાઇ મકવાણા સહિતના પરિવારજનો હોસ્પિટલે દોડી આવ્યા હતાં. પરિવારજનોએ કહ્યું હતું કે-રવિ બે બહેનનો એકનો એક મોટો ભાઇ હતો અને અગાઉ છુટક મજૂરી કરતો હતો. તેણે દોઢ મહિના પહેલા જ પારડીની પૂજા ઉર્ફ પૂનમ સાથે પ્રેમ થઇ જતાં બંનેએ લવમેરેજ કર્યા હતાં. એ પછી બંને થોડા દિવસ કણકોટ અમારી સાથે રહ્યા હતાં. બાદમાં જેતપુરમાં કારખાનામાં કામ મળ્યું હોઇ ત્યાં રૂમ રાખીને રહેવા જવાનું કહીને કણકોટથી જેતપુર રહેવા ગયા હતાં. જો કે ત્યાંથી બે ત્રણ દિવસ પહેલા જ બંને ફરી પારડી પૂજાના માવતરના ગામમાં રૂમ રાખીને રહેતાં હતાં.
યુવાન દિકરાની હત્યાથી પરિવારમાં કલ્પાંત
ગત રાતે રવિને કોઇપણ રીતે બોલાવી જઇ કે દગાથી આંતરીને હત્યા કરી નાખવામાં આવી હતી. તેના શરીર પર અલગ અલગ જગ્યાએ તિક્ષ્ણ હથીયારના આઠથી નવ જેટલા ઘા છે. માતા-પિતાએ આક્ષેપ કર્યો હતો કે રવિએ જેની સાથે લવમેરેજ કર્યા હતાં એ પૂજાના પ્રથમ લગ્ન અનીડાવાછડાના યુવાન સાથે થયા હતાં. પહેલા લગ્નથી તે એક સંતાની માતા બની હતી. એ પછી તેણીએ છુટાછેડા લીધા હતાં અને બાદમાં ઉપલેટાના આહિર શખ્સ સાથે મૈત્રીકરારથી રહેતી હતી. છેલ્લે અમારા દિકરા રવિ સાથે દોઢેક મહિના પહેલા પ્રેમલગ્ન કર્યા હતાં. આ વાત તેણીના પુર્વ પ્રેમી એવા ઉપલેટાના શખ્સને ગમતી ન હોઇ જેથી તેણે અગાઉ રવિને મારી નાખવાની ધમકી પણ આપી હતી. આથી અમને શંકા છે કે પૂજાના પુર્વ પ્રેમીએ જ આ હત્યા કરી છે. શાપર પોલીસે આ મામલે ગુનો નોંધવા અને આરોપી અંગે તપાસ કરવા તજવીજ હાથ ધરી છે. યુવાન દિકરાની હત્યાથી પરિવારમાં કલ્પાંત સર્જાયો છે.
