મેઘરાજાની તોફાની બેટિંગ : ચોમાસાના પ્રથમ રાઉન્ડમાં જ 11 ડેમ હાઇએલર્ટ પર, ગુજરાતની જીવાદોરી સમાન નર્મદા ડેમ 51% ભરાયો

ગુજરાતવાસીઓએ અનહદ ગરમી સહન કર્યા બાદ હવે રાજ્યમાં મેઘરજાની પધરામણી થઈ છે અને સાર્વત્રિક વરસાદ વરસી રહ્યો છે. ભાવનગર, બોટાદ, સુરેન્દ્રનગર સહિતના જિલ્લામાં મેઘરાજાની ધમાકેદાર એન્ટ્રી થયા બાદ તોફાની બેટિંગ પણ કરી રહ્યા છે ત્યારે ચોમાસાની શરૂઆતમાં જ રાજ્યના 11 ડેમ હાઇએલર્ટ પર છે. ગુજરાતની જીવાદોરી સમાન  નર્મદા ડેમ પણ 51% ભરાઈ ગયો છે. અત્રે ઉલ્લેખનીય છે કે રાજ્યના મોટા ભાગના જિલ્લામાં ઉનાળાના અંતમાં નર્મદા નદીનું પાણી પૂરું પાડવામાં આવે છે.

હજુ તો મેઘરાજાએ રાજ્યમાં પોતાની પહેલી ઈનીગ શરૂ કરી છે ત્યારે પ્રથમ રાઉન્ડમાં જ ડેમમાં, નદીમાં સરોવરમાં નવા નીરની આવક થઈ છે તેમજ પ્રથમ વરસાદમાં જ ડેમોની સ્થિતિ સારી જોવા મળી રહી છે. હાલમાં 11 ડેમ હાઇઍલર્ટ પર છે, જ્યારે 13 ડેમ ઍલર્ટ પર અને 10 ડેમ વોર્નિંગ પર મૂકવામાં આવ્યા છે.

છેલ્લા 24 કલાકમાં વરસાદ  

છેલ્લા 24 કલાકમાં ગુજરાતના 33 જિલ્લાઓના 227 તાલુકાઓમાં વરસાદ નોંધાયો છે. આંકડાની વાત કરવામાં આવે તો, છેલ્લા કલાકમાં રાજ્યમાં 22.67 મિમિ વરસાદ નોંધાયો છે. જેમાં સૌથી વધારે સૌરાષ્ટ્રમાં 17.18 ટકા વરસાદ પડ્યો છે. જ્યારે ઉત્તર ગુજરાતમાં સૌથી ઓછો 5.75 ટકા વરસાદ પડ્યો છે. ગુજરાતમાં અત્યારે જે વરસાદ પડ્યો તે ટકાવારીમાં સરેસાર 10.46 ટકા થયા છે. સૌથી વધુ વરસાદ બોટાદના બરવાળામાં 7 ઇંચ અને સુરેન્દ્રનગરના સાયલામાં 6.3 ઇંચ નોંધાયો છે.

આ પણ વાંચો : સૌરાષ્ટ્રમાં સાર્વત્રિક મેઘમહેર : રાજકોટના 9 સહિત સૌરાષ્ટ્રના 22 ડેમોમાં આવ્યા નવા નીર

ડેમોમાં પાણીની સ્થિતિ

સરદાર સરોવર નર્મદા ડેમમાં હાલનો સંગ્રહ 172267 MCFT છે, જે તેની કુલ સંગ્રહ ક્ષમતાના 51.56% જેટલો છે.

રાજ્યના કુલ 206 ડેમ પૈકી 9 ડેમ 100% ભરાયેલા છે.

* 25 ડેમ 70%થી 100% વચ્ચે ભરાયેલા છે.

* 22 ડેમ 50%થી 70% વચ્ચે ભરાયેલા છે.

* 55 ડેમ 25%થી 50% વચ્ચે ભરાયેલા છે.

* જ્યારે 95 ડેમ 25%થી નીચે ભરાયેલા છે.

રાજ્યમાં શરૂઆતથી જ સારો વરસાદ વરસી રહ્યો છે જેના લીધે ખેડૂતોમાં ખુશીની લહેર જોવા મળી રહી છે.