તહેવારો ટાણે જ રાજકોટના હરિહર ચોકમાં વાહનચાલકોની ‘માઠી દશા’ શરૂ : 7 મહિના કરતા વધુ સમય સુધી રહેશે તકલીફ

નવરાત્રિનો તહેવાર ચાલી રહ્યો છે જે પૂર્ણ થયા બાદ તુરંત દિવાળીનું પર્વ આવી રહ્યું હોવાથી આ દિવસોમાં ખરીદી માટે આખો દિવસ ચહલ-પહલ જોવા મળતી હોય છે. જો કે મહાપાલિકા તંત્રને તહેવારો ટાંકણે જ શહેરના મુખ્ય માર્ગોને બંધ કરવાની કબુદ્ધિ સૂઝી હોય તેવી રીતે અનેક વિસ્તારોને જોડતાં હરિહર ચોકને એક-બે સપ્તાહ નહીં બલ્કે સાત મહિના કરતા વધુ સમય સુધી બંધ કરવાનો નિર્ણય લેવામાં આવતાં અહીંથી પસાર થતાં વાહનચાલકોની `હારાકીરી’ મતલબ કે આમ-તેમ જવાનું શરૂ ગયું છે. તંત્રએ શનિવારથી જ હરિહર ચોકમાં આડશ ગોઠવી દેતા લોકોએ તકલીફ વેઠવી પડી હતી.

વોર્ડ નં.2માં આવતા હરિહર ચોક પાસે નવું બોક્સ કલ્વર્ટ તેમજ વોંકળા ફરતે રિટેઈનિંગ વોલ બનાવવાનું કામ તહેવારો ઉપર જ હાથ પર લેવામાં આવતા ચૌધરી હાઈસ્કૂલથી હરિહર ચોક તરફ આવતા રસ્તા પર આડશ ગોઠવી દેવામાં આવી છે. જ્યારે હરિહર ચોક પાસે જ્યાં અગાઉ ઘોડાગાડી સ્ટેન્ડ હતું ત્યાં પણ પતરાની આડશ મુકી દેવામાં આવી છે. હાલ તો અહીં ટુ-વ્હીલર પસાર થઈ શકે તેટલી જગ્યા રાખવામાં આવી છે પરંતુ ટૂંક સમયમાં જ આ રસ્તો પણ બંધ કરી દેવામાં આવનાર હોવાનું જાણવા મળ્યું હતું.

આ પણ વાંચો :‘ હું મારી મેચ ફી ભારતીય સૈન્યને સમર્પિત કરું છું…’ એશિયા કપ જીત્યા બાદ કેપ્ટન સૂર્યકુમાર યાદવની મોટી જાહેરાત

વળી, હરિહર ચોકથી અભિનવ, મોહમ્મદી રેસિડેન્સી, ગુરુપ્રસાદ એપાર્ટમેન્ટ સહિતના રહેઠાણ સુધી પહોંચવા માટે હરિહર ચોક પાસે જ ઢાળ આવેલો છે જેને `તકિયા’ તરીકે ઓળખવામાં આવે છે તેને બંધ કરી દેવાતા લોકોએ નાછૂટકે કાં તો આલ્ફ્રેડ હાઈસ્કૂલ ચોક અથવા ચૌધરી હાઈસ્કૂલ સુધી લાંબું થવું પડ્યું છે. એકંદરે તહેવારો સમયે જ આ પ્રકારે મુખ્ય રસ્તો બંધ થઈ જવાથી અનેક લોકોને હાલાકી પડશે તેમાં શંકાને કોઈ સ્થાન નથી.