સિરામિક ગ્રુપ પર ITના દરોડા : 3 કરોડની રોકડ મળી, રાજકોટ-મોરબીમાં લેવીસ,મેટ્રો ગ્રુપ પર ઇન્વેટીગેશન વીંગનું મોટું ઓપરેશન
રાજકોટ ઇન્કમટેક્સએ આ વર્ષનું સુપર સર્ચ ઓપરેશન હાથ ઘરી એક સાથે 40 સ્થળોએ તવાઈ ઉતારી હતી.મોરબીનાં જાણીતા લેવીસ અને મેટ્રો સીરામીક ગ્રુપ પર દરોડા પાડ્યા હતા જેમાં રાજકોટ સહિત ગુજરાતનાં 250 જેટલા અધિકારીઓ,ટેક્નિકલ ટીમ સાથે પોલીસ કાફલો જોડાયો છે.મંગળવારથી શરૂ કરેલું સર્ચ ઓપરેશન આખું સપ્તાહ ચાલશે તેવું આઈ.ટી.સૂત્રોએ જણાવ્યું હતું.
રાજકોટ ઇન્વેસ્ટિગેશન વીંગનાં જોઈન્ટ કમિશનરનાં નેતૃત્વમાં સમગ્ર ઓપરેશન પાર પાડવામાં આવ્યું છે. ગઈકાલે વહેલી સવારે મોરબીમાં નીચી માંડલ પાસે આવેલ લેવીસ,લીવા,મેટ્રો,મોર્ડન,ઇડનહિલ ગ્રુપની ફેકટરી,બંગલો,ઓફિસ તેમજ રાજકોટમાં નાના મવા રોડ સહિત 40 જેટલી પ્રીમાઇસ પર દરોડા સાથે તપાસનો ઘમધમાટ શરૂ કર્યો છે.મુખ્ય તપાસમાં ધીરુભાઈ રોજમાળા,જીતુભાઇ રોજમાળા,મોરબીમાં બાંધકામ ક્ષેત્રએ જોડાયેલા અને સીરામીક એસો.નાં પૂર્વ પ્રમુખ રાજુભાઇ ધમાસણા સહિત તેના ભાગીદારો અને એકાઉન્ટન્ટ્સ રડાર પર આવ્યાં છે.
પ્રથમ દિવસે દરોડાની કાર્યવાહી શરૂ કર્યાની ગણતરીની કલાકોમાં રાજકોટમાં રહેતાં ભાગીદારને ત્યાંથી 3 કરોડની રોકડ મળી આવી હતી.40 જેટલા સ્થળોએથી કરોડોના બિનહિસાબી વ્યવહારો સાથે ગોલ્ડ,ડાયમન્ડની જવેલરી આઈ.ટી.ની ટીમને મળી આવ્યું હોવાનું જાણવા મળી આવ્યું છે.રાજકોટની ટીમએ છેલ્લા 5 મહિનાથી આ ગ્રૂપના હિસાબી વ્યવહારોને તપાસ્યા હતા.મહિનાઓનાં હોમવર્ક પછી કરચોરી પકડવામાં સફળતા મળી છે.રાજકોટ અને મોરબીમાં સીરામીક,કોટન અને કન્સ્ટ્રકશનનાં વ્યવસાય સાથે સંકળાયેલા ગ્રૂપ પર દરોડાથી સૌરાષ્ટ્રભરમાં ઉદ્યોગકારોમાં ફફડાટ ફેલાઈ ગયો છે.
ટાઇલ્સમાં ઓછો પ્રોફિટ બતાવ્યો ને આઈ.ટી.ની નજરે ચડ્યાં
લેવીસ ગ્રૂપને ત્યાં ઇન્કમટેક્સ વિભાગે દરોડા પાડ્યા છે.સૂત્રોએ કહ્યું કે,આ સીરામીક ગ્રુપ દ્વારા ટાઇલ્સ પર પ્રોફિટ ઓછો દર્શાવીને ટેક્સચોરી થતી હોવાનું સામે આવ્યું હતું,જ્યારે અન્ય ટાઇલ્સ કંપનીઓ દ્વારા પ્રોફિટ બતાવવામાં આવતો જેની સામે આ ગ્રુપએ ખૂબ ઓછો દર્શાવી કરોડોની ટેક્સચોરી થતી હોવાની વાત સામેં આવી છે.
રાજકોટની ટીમને દરોડા પૂર્વે અમદાવાદ તેડાવાઈ
મોરબી અને રાજકોટમાં 40 જેટલી જગ્યાએ આવકવેરાના ઓપરેશન પહેલા માર્કેટમાં ગંધ ન આવે એ માટે રાજકોટની 8 જેટલી ટીમને સોમવારે સાંજે અમદાવાદ મોકલી દેવાઈ હતી.સર્ચ ઓપરેશનને એકદમ ગુપ્ત રાખવામાં આવ્યું હતું.અમદાવાદ ડિનર પૂરું કરીને ફરી રાજકોટ ને ત્યાંથી મોરબી લાવવવામાં આવી હતી.
