સોલાર વોટર હીટિંગ સિસ્ટમમાં ISI માર્ક વાળી ટેન્ક ફરજીયાત : રાજકોટ જિલ્લાના 80 ઉત્પાદકોને અપાઈ ISI માર્કો લેવા માટેની પ્રક્રિયાની સમજ
ભારત સરકાર દ્વારા સોલાર વોટર હિટિંગ સિસ્ટમમાં ફિટ કરવામાં આવતી પાણીની ટેન્ક માટે ISI માર્ક ફરજીયાત બનાવ્યો છે ત્યારે રાજકોટમાં સોલાર વોટર હિટિંગ સિસ્ટમમાં ફિટ થતી ટેન્ક બનાવવાના 80 જેટલા એકમો આવેલ હોવાથી બ્યુરો ઓફ ઇન્ડિયન સ્ટાન્ડર્ડ્સ એટલે કે ભારતીય માનાંક બ્યુરો દ્વારા ટેન્ક ઉત્પાદકો માટે એવેરનેસ કાર્યક્રમ યોજી વહેલી તકે ISI માર્કો લેવા માટેની પ્રક્રિયાની સમજ આપી હતી.
આ પણ વાંચો : શિક્ષણમાં ડિજિટલ ક્રાંતિ : A.Iની મદદથી રાજકોટમાં ડ્રોપઆઉટની સંભાવના ધરાવતા 3206 બાળકોની કરાઈ ઓળખ
પ્રાપ્ત વિગતો મુજબ ભારત સરકાર દ્વારા ગ્રાહકોને ગુણવતાયુક્ત ઉત્પાદનો મળી રહે તે માટે બ્યુરો ઓફ ઇન્ડિયન સ્ટાન્ડર્ડ્સ મારફતે સોના અને ચાંદીના દાગીનાથી લઈ અન્ય ઘર વપરાશની વસ્તુઓ તેમજ ફાયર સિસ્ટમ સહિતની વસ્તુઓમાં ગ્રાહક સુરક્ષાને ધ્યાનમાં રાખીને પ્રોડક્ટ સર્ટિફિકેશન ફરજીયાત બનાવવામાં આવ્યું છે. જેમાં ભારત સરકારે હવેથી સોલાર વોટર હિટિંગ સિસ્ટમમાં ફિટ થતી ટેન્કમાં પણ ISI માર્ક ફરજીયાત કર્યો હોવાથી રાજકોટ શહેર અને જિલ્લામાં આવી ટેન્ક બનાવતા એકમો માટે જનજાગૃતિ માટે કાર્યક્રમ યોજ્યો હતો.
ઉલ્લેખનીય છે કે, રાજકોટ શહેર અને જિલ્લામાં સોલાર વોટર હિટિંગ સિસ્ટમમાં ફિટ થતી ટેન્ક બનાવવાના 80 જેટલા એકમો આવેલા છે અને સરકારના દિશાનિર્દશ મુજબ એપ્રિલ માસમાં ISI માર્ક લેવાની કાર્યવાહી માટેની આખરી મુદત હોવાથી ઉત્પાદકોએ મુદત વધારવા માંગણી કરી હતી સાથે જકેન્દ્ર સરકારને ISI માર્ક લેવામાં કરાવવા પડતા ટેસ્ટ સહિતની બાબતો અંગે પણ ભારતીય માનાંક બ્યુરો સમક્ષ રજુઆત કરતા તમામ બાબતો અંગે ઉદ્યોગકારોને જરૂરી માર્ગદર્શન આપવામાં આવ્યું હતું.
