રાજકોટમાં આટલી બધી ઠંડી પડી રહી છે ?? વાંચીને જ ‘ટાઢ’ ચડી જાય તેવી મનપાની 27 સલાહ
ઠંડીમાં બહાર જવાનું ટાળો, શરીરના અંગ ઠંડીને કારણે સુન્ન થઈ જાય તો તુરંત ડૉક્ટર પાસે દોડો:ચુસ્ત કપડાં ન પહેરો, ઠંડીથી પ્રભાવિત શરીરના ભાગને મસાજ ન કરો વગેરે વગેરેહજુ તો ઠંડી શરૂ થઈ છે ત્યાં મહાપાલિકાએ માર્ગદર્શિકા બહાર પાડી દીધી
રાજકોટમાં હજુ ફુલગુલાબી મતલબ કે માણવા જેવી ઠંડી પડી રહી છે અને તેમાં પણ બપોરે તો ઠંડી ઓછી અને ગરમી વધુ અનુભવાઈ રહી છે ત્યારે રાજકોટનું તાપમાન જાણે કે માઈનસમાં ચાલ્યું ગયું હોય તેવી રીતે મહાપાલિકા દ્વારા લોકોને ઠંડીથી બચવા માટે ૨૭ જેટલી સલાહ આપવામાં આવી છે જે અમુક લોકોને તો વાંચીને જ ‘ટાઢ’ ચડી જાય એવી છે !!
મહાપાલિકા દ્વારા જાહેર કરાયેલી માર્ગદર્શિકામાં અમુક સલાહ તો ઉનાળા-ચોમાસામાં આપવામાં આવે એવી જ છે જ્યારે ઠંડી સંબંધિત જે સલાહ આપવામાં આવી છે જેમાં શરીરના અંગ ઠંડીને કારણે સુન્ન (કામ કરતા બંધ થઈ જાય) તો તુરંત ડૉક્ટર પાસે જવા, ચુસ્ત કપડાં ન પહેરવા, ઠંડીથી પ્રભાવિત શરીરના ભાગને મસાજ ન કરવા, કોવિડ-૧૯ સહિતના રોગથી બચવા માસ્ક પહેરવા, ડાયાબિટીસ, હાઈ બીપી, શ્વાસ સંબંધિત રોગના દર્દીઓએ ખાસ ધ્યાન રાખવા.
અતિશય ઠંડીમાં પર્યાપ્ત વેન્ટીલેશન હોય ત્યારે જ રૂમ હિટરનો ઉપયોગ કરવા, બંધ રૂમને ગરમ કરવા કોલસાનો ઉપયોગ ન કરવા, પાલતું પ્રાણીઓને ઘરમાં જ રાખવા, શીત લહેરમાં ભારે ઠંડીના કારણષ લાંબા સમય સુધી સંપર્કમાં રહેવાથી ચામડી સખત અને સુન્ન થઈ શકે છે. હાથ-પંજા, નાક, આંગળીઓ જેવા શરીરના ભાગો પર લાલ ફોલ્લા થઈ શકે છે. શરીરનો ભાગ મરી જવાથી ત્વચાની લાલાશ કાળી થઈ શકે છે તે ખૂબ જ જોખમી અને ખતરનાક છે જેને ગેંગરીન રોગ કહેવાય છે. આવું જણાય તો તુરંત સારવાર લેવા પણ કહેવાયું છે.
