જામનગરમાં યુવાનની હત્યાનો ચોંકાવનારો કિસ્સો સામે આવ્યો છે. પ્રેમિકાને પામવા તેના પતિની કારની ઠોકરે હત્યા કરાઈ છે. મૂળ જામનગર જિલ્લાના કાલાવડના અને હાલ આશીર્વાદ એવેન્યુ-01, બહુચરકૃપા, બહુચરકુપા, રણજીતસાગર રોડ, જામનગર ખાતે છેલ્લા આઠ વર્ષથી રહેતા રવી મારકણા નામના 30 વર્ષીય યુવાનની પત્ની રિન્કલને અગાઉ તેના ઘરની સામે જ રહેતા આરોપી અક્ષય છગનભાઇ ડાંગરીયા સાથે પ્રેમ સંબંધ હતો. આ પ્રેમ સંબંધને પરિણામે રવિ અને રીંકલ વચ્ચે અવારનવાર ઝઘડા થતા હતા. ઝઘડાનો ખારા રાખી અને બંનેએ પતિને પતાવી દેવાનું કાવતરું ઘડી કાઢ્યું હતુ અને પ્રેમીએ કારની ોકર મારી યુવકની હત્યા કર્યાના બનાવથી ચકચાર મચી છે. ત્યારે પોલીસે આ પ્રેમી પંખીડાની ધરપકડ કરી છે.
શું છે સમગ્ર મામલો ?
ગઈકાલે પોણા પાંચેક વાગ્યાના સમયગાળામાં રવિ ધીરજલાલ મારકણા નામનો યુવાન પોતાનું બુલેટ મોટરસાયકલ જીજે 27 ડીજે 9310 લઈ જામનગરથી કાલાવડ ગયો હતો. બીજી તરફ અગાઉથી જ તૈયારી આરોપી અક્ષય તેની કાર સાથે આગોતરા આયોજનમાં હતો. આરોપીએ રવીની બાઈકનો પિછો કર્યો હતો. રવિ પોતાનુ બુલેટ લઇ કાલાવડથી જામનગર ઘરે જતો હતો આ વેળાએ વીજરખી ડેમ નજીક આવેલ મોગલ |માતાજીના મંદિર પાસે આરોપી અક્ષયે તેની જીપથી અકસ્માત કર્યો હતો. રવિની બુલેટને પાછળથી ફૂટબોલ કરી રવિને કચડી નાખ્યો હતો.
આજથી આશરે છએક મહીના પહેલા રવિએ બુલેટ મોટર સાઈકલ લીધી હતી. જે બુલેટ મોટર સાઇકલ ઘરે ઘરે પોતાના પિતાને બતાવવા અને માતાજીના દર્શન કરવા માટે ગઇકાલ તા.06/૦4/2025ના સવારના સાડા દશેક વાગ્યે કાલાવડ ગયો હતો. જ્યારે તેની પત્ની ઘરે જ રોકાયેલ હતી. રવિ પોતાના કુળદેવીના દર્શન કરી ગામડે જમીને બપોરના ચારેક વાગ્યે જામનગર આવવા માટે રવાના થયો હતો. દોઢ કલાક જેટલો સમયગાળો થઈ ગયો હોવા છતાં રવિ ઘરે ન પહોંચતા રવિના માતા પિતા જામનગર દીકરાના ઘરે ગયા હતા.
જ્યાં રવિની પત્નીને રવી બાબતે પૂછતા રવિની પત્ની રિકલે કહ્યું કે મારે અક્ષય સાથે સંબંધ હોય જેને લઇને ઝઘડા થતા હોવાથી મેં અક્ષયને ફોન કરીને જણાવેલ કે, રવિ ઘરેથી બુલેટ લઈને નીકળેલ છે. આજે મોકો છે કામ પતાવી નાખ તેમ કહેતા અક્ષયએ કહેલ કે, હું મારી ફોરવ્હીલ લઈને કાલાવડ જાવ છુ પછી તને ફોન કરું તેમ કહી તે તેની જીપકમ્પાસ કાર નંબર -20–8262 ની લઈને રવિની પાછળ પાછળ કાલાવડ ગયેલ અને ત્યારબાદ બપોરના અક્ષયનો ફોન આવેલ અને કહેલ કે, હું કાલાવડની બહાર રવિની રાહ જોઈને ઉભો છુ રવિ હજી સુધી નીકળેલ નથી તેમ વાત કરેલ ત્યાર બાદ સાંજના પોણા પાંચેક વાગ્યે મને અક્ષયનો ફોન આવેલ અને વાત કરેલ કે, કાલાવડ-જામનગર રોડ પર મોગલ માતાજીનુ મંદીર આવેલ છે ત્યાં રોડ પર મેં મારી ફોરવ્હીલ કારથી રવિના બુલેટને પાછળથી ઠોકર મારી દીધેલ છે અને રવિને કાનમાંથી અને માથામાંથી લોહી નીકળી ગયેલ છે લગભગ મરી ગયેલ છે. બાદમાં ધીરજલાલના જમાઈ પ્રશાંતભાઈનો ફોન આવેલ અને વાત કરેલ કે, રવિનુ એકસીડન્ટ થયેલ છે.
કાલાવડના કૃષ્ણનગર એક વિસ્તારમાં રહેતા ધીરજલાલ ઉર્ફે મહેતાજી મોહનભાઈ મારકણા નામના મૃતક યુવાનના પિતાએ પંચકોસી એ ડિવિઝન પોલીસ મથકમાં ફરિયાદ કરતા પોલીસે આરોપી અક્ષય છગનલાલ ડાંગરિયા અને રિકલ રવિ મારકણા સામે હત્યા સહિતની કલમો હેઠળ ગુનો નોંધ્યો હતો. ત્યારે આજ રોજ પોલીસે બંને પ્રેમી પંખીડાને પકડી પાડયા છે. રવીના લગ્ન 2017ની સાલમાં થયા હતા અને રવીને સંતાનમાં જીયાન નામનો દોઢ વર્ષનો દીકરો છે.
