રાજકોટમાં પકડાયો તે પહેલાં ચાર વખત હાઈબ્રિડ ગાંજો વેચાઈ ગયો: ગાંજો સાચવવા ખાસ ફ્લેટ રાખ્યો’તો, નશાનું મોટું નેટવર્ક ખુલશે

રાજકોટના પુષ્કરધામ મેઈન રોડ પર જે.કે. ચોકમાં પટેલ રેસ્ટોરન્ટ નજીકથી એસઓજીએ ધ્રુવ સંજયભાઈ જોષી (ઉ.વ. 26) ને 2.42 લાખની કિંમતના 69.380 ગ્રામ હાઈબ્રિજ ગાંજા સાથે ઝડપી પાડ્યો હતો. પાંચ દિવસના રિમાન્ડ પર લીધા બાદ વધુ 10.36 લાખની કિંમતનો 269 ગ્રામ ગાંજો મળી આવ્યો હતો અને કુલ 13 લાખનો ગાંજો અત્યાર સુધીમાં કબજે થયો છે.

તપાસ દરમિયાન ધ્રુવે કબૂલ્યું કે તે પહેલાં અંદાજે 4 વખત ગાંજાની ખેપ મારી ચૂક્યો છે. પોલીસ ફ્લેટ પર પહોંચી ત્યારે શરૂઆતમાં કશું મળ્યું નહોતું, પરંતુ કબાટમાં બનાવેલા ચોરખાનામાંથી ગાંજો મળી આવ્યો હતો.

આ પણ વાંચો: રાજકોટના જંગલેશ્વરના 1358 દબાણકારો મામલે હવે ગમે ત્યારે થશે ધડાકો: મહેસુલ પંચ દ્વારા ગમે ત્યારે ચૂકાદો જાહેર કરશે

ધ્રુવનું કહેવું છે કે તે ગાંજો મુંબઈથી લાવ્યો હતો અને સપ્લાયર સુધી પહોંચવા માટે પોલીસ વધુ તપાસ કરી રહી છે. તેણે આ પણ સ્વીકાર્યું કે તે પહેલાં અંદાજે 200 ગ્રામ જેટલો ગાંજો કોલેજીયનને વેચી ચૂક્યો છે.

એસઓજી પીઆઈ એસ.એમ. જાડેજા અને પીએસઆઈ વી.વી. ધ્રાંગુની ટીમે ધ્રુવને ઝડપી પાડ્યો હતો. તેણે પોતાનું સરનામું શિવતલ પાર્ક, શેરી નં. 2, શિવશક્તિ સોસાયટી, બ્લોક નં. 9 બતાવ્યું હતું. રિમાન્ડ દરમિયાન વધુ પૂછપરછમાં ધ્રુવે જણાવ્યું કે કાલાવડ રોડ પર અમરનાથનગર મેઈન રોડ, ગીરીરાજ હોસ્પિટલ પાછળ પિતાંબરભાઈ સાથે ભાડે લીધેલા ફ્લેટમાં 269 ગ્રામ ગાંજો છુપાવ્યો હતો.