રાજકોટમાં લાયન સફારી પાર્કનું અડધું કામ પૂરુંઃ જાણો ક્યારે ખુલ્લો મુકાશે આ પાર્ક, જીપમાં બેસીને થશે સિંહ દર્શન

રાજકોટમાં પ્રવાસનને વેગ આપવા તેમજ શહેરીજનોને હરવા-ફરવા માટેનું વધુ એક નઝરાણું મળી રહે તે માટે પ્રદ્યુમન પાર્ક ઝૂની બાજુમાં જ આવેલી મહાપાલિકાની 29 હેક્ટર જગ્યા ઉપર એશિયાટિક લાયન સફારી પાર્ક બનાવવાની જાહેરાત તત્કાલિન મ્યુનિસિપલ કમિશનર આનંદ પટેલ દ્વારા કરાઈ હતી. કેન્દ્ર સરકારની ઝૂ ઓથોરિટી દ્વારા મંજૂરી અપાયા બાદ આ પાર્કના નિર્માણનું કાર્ય પૂરજોશમાં શરૂ કરી દેવાયું હતું. સાત તબક્કામાં શરૂ કરાયેલા આ કામના ચાર તબક્કાનું કામ પૂર્ણ થઈ ગયું હોવાનું જાહેર કરવામાં આવ્યું છે.

આ અંગે ઈજનેરી સૂત્રોએ જણાવ્યું કે નિર્માણ કાર્ય પૂર્ણ કરવાની સમયમર્યાદા જૂન-2026 છે પરંતુ માર્ચ-2026 સુધીમાં જ કામ પૂર્ણ થઈ જાય તેવું લાગી રહ્યું છે. સાત તબક્કામાંથી ચેઈનલિન્ક ફેન્સીંગ તેમજ કમ્પાઉન્ડ વોલ, ઈન્સ્પેક્શન પાથ, ઈન્ટરનલ રોડ, ટુ-વે ગેઈટનું કામ પૂર્ણ કરવામાં આવ્યું છે. જ્યારે પ્રાણીઓ માટેનું નાઈટ શેલ્ટર (રાત્રિના સમયે રહેવાની સુવિધા), જીએસઆર, એન્ટ્રન્સ પ્લાઝા સહિતનું કામ હજુ ચાલી રહ્યું છે. જે ચાર તબક્કા પૂર્ણ કરવામાં આવ્યા છે તેના પાછળ 27.57 કરોડનો ખર્ચ થવા પામ્યો છે.

આ પણ વાંચો : અભિષેક શર્માએ યુવરાજ સિંહનો રેકોર્ડ તોડી રચ્યો ઇતિહાસ : પાકિસ્તાન સામે રમી તોફાની ઇિંનગ, જાણો કઈ સિદ્ધિ હાંસલ કરી

અહીં સહેલાણીઓને ફરવાનું સ્થળ તો મળી જ રહેશે સાથે સાથે સાસણમાં જે પ્રકારે સિંહદર્શન થાય છે તે રાજકોટમાં જ કરી શકાશે. આ ઉપરાંત સિંહ સંરક્ષણ-સંવધનના પ્રયત્નમાં પણ વધારો થઈ શકશે. પ્રાણીઓ માટે અહીં પીવાના પાણીના તળાવ બનશે તો ખુલ્લામાં પ્રાણીઓ વિહાર કરી શકે તેમજ તેમનું લોકેશન ટ્રેસ કરવા માટે ઈન્ટર કનેક્ટેડ રોડ પણ બનાવવામાં આવશે. લાયન સફારી પાર્કમાં વિશાળ પાર્કિંગ વ્યવસ્થા, રેસ્ટીંગ શેડ, બાળકો માટેનું પ્લે ગ્રાઉન્ડ, ફૂડ કોર્ટ સહિતની સુવિધા પણ ઉભી કરવામાં આવશે.