વાઇબ્રન્ટ સમિટમાં આવતા મહેમાનોને રાજકોટની ઓળખ બતાવાશે: ગાંધી મ્યુઝિયમ,ડોલ્સ મ્યુઝિયમ સહિતના સ્થળોની વિઝિટ કરાવાશે
રાજકોટમાં આગામી તા.10 થી 12 જાન્યુઆરી દરમિયાન મળનારી વાઈબ્રન્ટ સમિટમાં આવનારા મહાનુભાવોને રાજકોટની ઓળખ કરાવવા માટે વિવિધ કાર્યક્રમો ઘડી કાઢવામાં આવ્યા છે. ખાસ કરીને આ મહાનુભાવોને તા. 11 અને 12 દરમિયાન રાજકોટની જુદી જુદી વિરાસતની મુલાકાત કરાવવામાં આવશે. વહીવટી તંત્રના સુત્રોએ `વોઈસ ઓફ ડે’ને જણાવ્યું હતું કે, આ સમિટમાં દેશ વિદેશના ઉદ્યોગપતિઓ, રોકાણકારો અને વિવિધ ક્ષેત્રનાં નિષ્ણાતો આવનાર છે.
આ સમિટના ટાઈમિંગ સિવાયના સમયમાં આ મહેમાનોને રાજકોટ અને આસપાસના સ્થળોની વિઝિટ કરાવવામાં આવશે. તા. 10મીએ સવારે અને સાંજે એમ બે સમય મહાનુભાવોને રાજકોટથી 65 કિલોમીટર દુર રામપરા સેન્ચ્યુરીની મુલાકાત કરાવવામાં આવશે. જ્યાં મુક્ત રીતે વિહરતા સિંહોને જોઈ શકાશે.
આ ઉપરાંત તા.11 અને 12 એમ બે દિવસ જુદા-જુદા સમયે રાજકોટના ગાંધી મ્યુઝીયમ, વોટસન મ્યુઝીયમ, ડોલ્સ મ્યુઝીયમ અને કબા ગાંધીના ડેલાની મુલાકાતે લઈ જવામાં આવશે. ગાંધી મ્યુઝીયમમાં રાત્રીના સમયે લાઈટ એન્ડ સાઉન્ડ શોનું આયોજન પણ કરવામાં આવ્યુ છે.
મારવાડી યુનિવર્સીટીમાં યોજાનારી વાઈબ્રન્ટ સમિટનો સમય 11થી બપોરે 5 વાગ્યા સુધીનો છે . આ પહેલાના અને પછીના સમયમાં આ બધી વિઝિટ કરાવાશે. આ સુત્રોએ કહ્યું હતુ કે, બધા મહાનુભાવોને જુદા-જુદા સ્થળે લઈ જવા માટે વાહનની વ્યવસ્થા મારવાડી યુનિવર્સીટીથી જ કરવામાં આવી છે. યુનિવર્સીટી કેમ્પસમાં પણ સાંસ્કૃતિક કાર્યક્રમનું આયોજન કરવામાં આવ્યું છે.
