ગુજરાતના નવા ડીજીપી પસંદ કરવા સરકારની કવાયત શરૂ : આ નામ છે ચર્ચામાં,300 અધિકારીની બદલીની પણ ચર્ચા

રાજ્ય સરકારે નવા ડીજીપીની પસંદગી માટે કવાયત શરુ કરી છે. હાલના ડીજીપી વિકાસ સહાયને જે છ માસનું એક્સટેન્શન આપવામાં આવ્યું છે તે આવતા મહિને પૂરું થાય છે એટલે સરકારે નવા ડીજીપી માટે તૈયારી શરુ કરી છે. સુત્રોના જણાવ્યા અનુસાર, જે રીતે 1989 બેચના આઈ.એ.એસ. અધિકારી સુનયના તોમર મુખ્ય સચિવ માટેની રેસમાં પાછળ રહી ગયા તે જ રીતે પોલીસ વિભાગમાં પણ કેટલાક અધિકારી આ પ્રકારની ચર્ચા કરી રહ્યા છે. સિનીયોરીટીની દ્રષ્ટીએ જોઈએ તો 1991ની બેચના આઈ.પી.એસ. અધિકારી શમશેરસિદ્ધ સૌથી મોટા દાવેદાર છે.

હાલમાં તેઓ બોર્ડર સિક્યુરીટી ફોર્સમાં એડીશનલ ડીજીના પદ ઉપર છે. પરંતુ તેઓ માર્ચ-2026માં નિવૃત થવાના છે. આ સંજોગોમાં તેમનીપસંદગી થવી મુશ્કેલ જણાય છે. રાજ્યમાં ડીજીપીના પાંચ પદ છે અને મુખ્ય પોસ્ટ માટે ડૉ. કે.એલ.એન. રાવનું નામ ચર્ચામાં છે. તેઓ ઓક્ટોબર 2027માં નિવૃત થવાના છે એટલે સરકાર માટે તેમની દાવેદારી સુરક્ષિત વિકલ્પ હોઈ શકે છે.આ સિવાય 1993 બેચના જી.એસ.મલિક અને ડો.નીરજા ગોટરૂના નામ પણ રેસમાં છે.

આ પણ વાંચો :દિલ્હી બ્લાસ્ટમાં મૃત્યુઆંક વધીને 12 ઉપર પહોંચ્યો : લાલ કિલ્લો બંધ,ગુજરાત સહિત અનેક રાજ્યોમાં હાઇ એલર્ટ,ઠેર-ઠેર નાકાબંધી

જી.એસ.મલિક નવેમ્બર 2028માં અને ગોટરૂ 2029માં નિવૃત થવાના છે. આ બાબત પણ તેમની ફેવરમાં જઈ શકે છે. હવે જોવાનું એ રહે છે કે, રાજ્ય સરકાર પોલીસ ખાતાની કમાન કોને સોંપે છે. દરમિયાન પોલીસ ખાતામાં બદલીનો ઘાણવો પણ ગમે ત્યારે નીકળી શકે છે. ખાસ કરીને એસ.પી., ડીવાય.એસ.પી. અને ઇન્સ્પેક્ટરોની બદલી તોળાઈ રહી છે. સુત્રો અનુસાર, ઓછામાં ઓછા 300 અધિકારીની બદલી થવાની છે. કેટલાક અધિકારી તો પ્રમોશનની પણ લાંબા સમયથી રાહ જોવે છે અને હવે નવું વર્ષ તેમના માટે સારા સમાચાર લઈને આવી શકે છે.