પૂર્વ મંત્રી વલ્લભભાઈ પટેલ હત્યા કેસ: અનિરુદ્ધસિંહ (હડમતીયા)નો હાઇકોર્ટમાંથી પણ નિર્દોષ છુટકારો
પડધરીના હડમતીયા ગામે વર્ષ 1989 ચૂંટણી સભામાં તત્કાલીન આરોગ્ય મંત્રી વલ્લભભાઈ પટેલને એક યુવકે છરીના ઘા ઝીંકી હત્યા કરી હતી.આ કેસમાં તપાસમાં હડમતીયાના અનિરુદ્ધસિહ ચંદુભા જાડેજા વિરુદ્ધ ગુનો નોંધાયો હતો. કેસ ચાલવા પર આવતાં વર્ષે 1996માં સેશન્સ કોર્ટે આરોપીને નિર્દોષ જાહેર કરતો ચુકાદો આપ્યો હોય જેની સામે સરકાર દ્વારા હાઈકોર્ટમાં અપીલ કરતા અદાલતે સેશન્સ કોર્ટનો આદેશને કાયમી રાખ્યો હતો.
આ કેસની વિગત એવી છે કે, પડધરીના હડમતીયા (જં.) ગામે તે વખતના ગુજરાત રાજ્યના રાષ્ટ્રીય કોંગ્રેસ પાર્ટીના તાકતવર નેતા અને તત્કાલીન હેલ્થ મીનીસ્ટર વલ્લભભાઈ પોપટભાઈ પટેલે ચૂંટણીલક્ષી કાર્યક્રમનું આયોજન કરેલ હતું અને તે અંગેનું કેમ્પેઈન ચલાવતા હતાં. તા.21/11/1989 ના રોજ ચૂંટણી સભાનું આયોજન પછી તે વખતના તાલુકા પંચાયતના પ્રમુખ ડો. ડાહ્યાભાઈ પટેલે કરેલ હતું. બનાવના દિવસે રાત્રિના આઠેક વાગે તેઓએ ગામના ચોરે આવેલ રામજી મંદિરે સભા લીધેલ તે વખતે તેમના સમર્થક હેમુભા તખુભા જાડેજા અને બીજા આગેવાનો હાજર હતાં. આ ચૂંટણીલક્ષી સભા પૂરી થતાં પછી આશરે નવ-સવા નવ વાગે હેલ્થ મીનીસ્ટર વલ્લભભાઈ પટેલ તેમના પગરખાં પહેરતા હતાં તે વખતે એક નવયુવાને ત્યાં અચાનક આવી જઈ છરી વડે છએક જેટલાં વલ્લભભાઇ ઉપર ઘા કરી પ્રાણઘાતક હુમલો કરેલ અને આ શખ્સ ત્યાંથી નાસી ગયો હતો.
પાછળથી આ હુમલાખોર તરીકે હડમતીયા (જં.) ના શખ્સ અનિરુદ્ધસિહ ચંદુભા જાડેજા હોવાનું ખુલેલ હતું. વલ્લભભાઈને રાજકોટ સિવિલ હોસ્પિટલે ખસેડી ત્યાં તેમનું ડી.ડી. નોંધાયેલ અને ચાલુ સારવારે તેઓનું અવસાન થયેલ હતું. બનાવની ફરીયાદ હેમુભા તખુભા જાડેજાએ આપેલ હતી અને ફરીયાદ ઉપરથી આજાણ્યા શખ્સો વિરુદ્ધ હત્યાનો ગુનો દાખલ થયેલ હતો. જે કેસની તપાસ પી.એસ.આઈ. વી.વી.ગોહિલે સંભાળી હતી અને તેઓએ જામખંભાળીયા જઈને આરોપી અનિરુદ્ધસિહ ચંદુભા જાડેજાની ધરપકડ કરી હતી. પોલીસે તપાસ દરમીયાન સંખ્યાબંધ સાહેદોના નિવેદનો નોંધેલા હતા અને જરૂરી પંચનામાંઓ કરેલા હતા. સ્થાનિક પોલીસની તપાસ દરમીયાન આ તપાસમાં સી.બી. આઈ. પણ જોડાયેલ હતી અને તેમણે પણ તપાસની કામગીરીમાં સાથ-સહકાર આપેલ હતો.
સિન આ કેસ ચાલવા પર આવતા વર્ષ 1996 માં સેશન્સ કોર્ટે આરોપી અનિરુદ્ધસિહ જાડેજાને શંકાનો લાભ આપી છેડી મુકવા હુકમ કર્યો હતો. સેશન્સ કોર્ટના ચુકાદાને પડકારી સરકાર તરફે ગુજરાત હાઈકોર્ટમાં અપીલ કર્યા બાદ બંને પક્ષકારોની વિગતવાર દલીલો અને રજૂઆતોને અંતે હાઈકોર્ટે આરોપીને નિર્દોષ ઠેરવી સરકારની અરજી ફગાવી દીધી હતી.આ કેસમાં આરોપી વતી હાઈકોર્ટમાં યોગેશ લાખાણી, ધર્મેશ દેવનાની, તેમજ રાજકોટના ગૌરાંગ ગોકાણી રોકાયેલા હતા.
