રાજકોટમાં નકલી નોટ છાપવાનું કારસ્તાન ઝડપાયું: 3 લાખનું દેણું ઉતારવા યુ-ટ્યુબ પરથી નોટ બનાવવાનું શીખ્યો,પોલીસે દરોડો પાડી શખ્સને ઝડપ્યો
રાજકોટના રૈયાધાર વિસ્તારમાં ગૌશાળા નજીક મફતિયાપરામાં ઓરડી ભાડે રાખી નકલી નોટ છાપવાના કારસ્તાન પર સ્પેશ્યલ ઓપરેશન ગ્રુપ (SOG)એ દરોડો પાડી 100 અને 200ના દરની 73 નકલી નોટ સાથે 29 વર્ષીય યુવકને પકડી પાડ્યો હતો. પ્રાથમિક પૂછપરછમાં જાણવા મળ્યા પ્રમાણે યુવક ઉપર 3 લાખનું દેણું થઈ જતાં ઉતારવા માટે આ ગોરખધંધો શરૂ કર્યો હોવાનું રટણ કર્યું હતું.
SOG પીઆઈ એસ.એમ. જાડેજા, પીએસઆઈ વી.કે. ઝાલા, એએસઆઈ રાજેશ બાળા, હેડ કોન્સ્ટેબલ સિદ્ધરાજસિંહ જાડેજા, અરુણ બાંભણિયા, ઉપેન્દ્રસિંહ ઝાલા, જયદીપસિંહ ચૌહાણ સહિતની ટીમને બાતમી મળી હતી કે મફતિયાપરામાં ઓરડીની અંદર નકલી નોટ છાપવામાં આવી રહી હતી. બાતમીના આધારે દરોડો પાડતાં નૈતિક મહેન્દ્રભાઈ અગ્રાવત (ઉ.વ. 29, રહે. મફિતયાપરા) નોટનું છાપકામ કરી રહ્યો હતો. નૈતિકની ધરપકડ કરતાં જ તે પોપટ બની ગયો હતો. તેણે જણાવ્યું કે તે ટ્રાવેલ્સની બસમાં ડ્રાઈવર અને ક્લિનર તરીકે કામ કરે છે પરંતુ મર્યાદિત પગાર હોય તેના ઉપર થઈ ગયેલું 3 લાખનું દેણું ભરપાઈ કરી શકતો ન હોય લેણદારોની ઉઘરાણીથી કંટાળી નકલી નોટ છાપવાના રવાડે ચડી ગયો હતો. તપાસમાં એવું પણ સામે આવ્યું છે કે નોટ છાપવા માટે પ્રિન્ટર-સ્કેનર, કાગળ સહિતની ખરીદી કરવા માટે એક વ્યક્તિએ રોકાણ પણ કર્યું હતું જેની પણ શોધખોળ ચાલી રહી છે. પોલીસે નૈતિકના કબજામાંથી 38 નંગ 100 તેમજ 200ના દરની નોટ તેમજ 35 નંગ 100ના દરની નોટવાળા પેપર, પ્રિન્ટર, પેન્સીલ, કટર, ફુટપટ્ટી, A-4 સાઈઝના કાગળ, મોબાઈલ, લાઈટ બિલ સહિત કુલ 23100 રૂપિયાનો મુદ્દામાલ કબજે કર્યો છે. નૈતિક સામે અગાઉ યુનિવર્સિટી અને ગાંધીગ્રામ પોલીસ મથકમાં પણ ગુના નોંધાયેલા છે.
બે નકલી નોટ રિક્ષાચાલક, શાકભાજીવાળા પાસે વટાવી પણ લીધી
નૈતિકે એક સપ્તાહ પહેલાં 100 અને 200ના દરની નકલી નોટ છાપવાનું શરૂ કર્યું હતું. આ પછી ટ્રાયલ કરવા માટે તેણે 100ના દરની બે નોટ વટાવવા પ્રયત્ન કર્યો હતો. આ નોટ તેણે રિક્ષાચાલક અને શાકભાજીવાળા પાસે વટાવી લીધી હતી. એકંદરે નોટ ચાલી જતાં નૈતિકની હિંમત વધી ગઈ હતી અને તેણે પછી મોટાપાયે નોટ છાપવાનું શરૂ કરી દીધું હતું. જો કે વધુ નોટ વટાવે તે પહેલાં જ પોલીસે તેને પકડી પાડયો હતો.
નૈતિકના પિતા સરકારી કર્મચારી, કાકા પોલીસમેન
પોલીસ તપાસમાં એવું પણ સામે આવ્યું છે કે નૈતિક અગ્રાવતના પિતા મહેન્દ્રભાઈ સરકારી કર્મચારી છે. જો કે તેમણે બીજા લગ્ન કરેલા છે. જ્યારે તેના કાકા જૂનાગઢ ખાતે પોલીસ વિભાગમાં ફરજ બજાવે છે. નૈતિક રાજકોટ-અમદાવાદ પાટે ચાલતી ટ્રાવેલ્સ બસમાં ડ્રાઈવર અને ક્લિનરનું કામ કરે છે. નૈતિક પકડાતાં જ તેની બહેન પોલીસ મથકે દોડી ગઈ હતી અને રડવા લાગી હતી સાથે સાથે નૈતિકને આવું કરવાની શું જરૂર હતી? ક્યાંય મોટું બતાવવા જેવા ન રહેવા દીધા સહિતના વેણ પણ કહ્યા હતા.
યુ-ટ્યુબ ઉપરથી નોટ બનાવવાનું શીખ્યો
નૈતિક અગ્રાવત છેલ્લા ઘણા સમયથી યુ-ટ્યુબ ઉપર નકલી નોટ છાપવાના વીડિયો જોઈ રહ્યો હતો. આ વીડિયોના આધારે તેણે એક સપ્તાહ પહેલાં નોટ છાપવાનું શરૂ કર્યું હતું. નૈતિકે છાપેલી નોટ 80% અસલ જ હોવાનું પોલીસ સૂત્રોએ જણાવ્યું હતું. નોટ છાપવાના બેનંબરી ધંધામાં એક વ્યક્તિએ તેની મદદ પણ કરી હોવાનું સામે આવ્યું છે.
