ઈ સાલા કપ નામદુ…RCBએ રચ્યો ઇતિહાસ, WPLમાં સતત બીજા વર્ષે બન્યું ચેમ્પિયન, વિરાટ કોહલી-અનુષ્કાએ પાઠવ્યા અભિનંદન
વિમેન્સ પ્રિમીયર લીગ (WPL)ના ફાઈનલ મુકાબલામાં રોયલ ચેલેન્જ બેંગ્લોરની ટીમે દિલ્હી કેપિટલ્સને છ વિકેટે હરાવીને પોતાની બીજી ટ્રોફી જીતી હતી. બીજી બાજુ સળંગ ચોથો ફાઈનલ રમી રહેલી દિલ્હી ટીમે ફરી એકવાર ખાલી હાથે પરત ફરવું પડયું હતું. આ મેચમાં દિલ્હી ટીમે પહેલાં બેટિંગ કરતાં નિર્ધારિત 20 ઓવરમાં ચાર વિકેટ ગુમાવીને 203 રન બનાવ્યા હતા. જવાબમાં સ્મૃતિ મંધાના અને જ્યોર્જિયા વૉલની ધમાકેદાર ઈનિંગે આ લક્ષ્યાંકને નાનો સાબિત કરી દીધો હતો અને બેંગ્લુરુએ અંતિમ ઓવરમાં જ મેચ પોતાના નામે કરી લીધી હતી.
204 રનના લક્ષ્યાંકનો પીછો કરતા RCBની શરૂઆત ખરાબ રહી હતી. બીજી જ ઓવરમાં ગ્રેસ હેરિસને નવ રન બનાવ્યા બાદ ચિનેલ હેનરીએ બોલ્ડ કરી હતી. આ પછી જ્યોર્જિયા વૉલ અને સ્મૃતિ મંધાનાએ 165 રનની રેકોર્ડતોડ ભાગીદારી કરી દિલ્હીના હાથમાંથી મેચ ખુંચવી લીધી હતી. જો કે અંતિમ ઓવર આવવા સુધી વૉલ 79 અને મંધાના 87 રન બનાવીને આઉટ થઈ ગઈ હતી.
અંતિમ ઓવરમાં જીત જીત માટે RCBને 10 રનની જરૂર હતી. દિલ્હી વતી શ્રી ચરણી બોલિંગ કરવા આવી. સામે રાધા યાદવ હતી અને તેણે ઓવરના બીજા અને ચોથા બોલે ચોગ્ગો લગાવીને મેચ પૂર્ણ કરી હતી.
આ પહેલાં કેપ્ટન જેમિમા રાડ્રિગ્સની આગેવાનીમાં બેટરોના શાનદાર પ્રદર્શનથી દિલ્હી કેપિટલ્સે ચાર વિકેટે 203 રન બનાવ્યા હતા. જેમિમાએ 37 બોલમાં આઠ ચોગ્ગાની મદદથી 57 રનની ઈનિંગ રમી હતી. જ્યારે લૉરા વૌલ્વાર્ટ (44 રન) અને ચિનેલ હેનરી (અણનમ 35 રન)એ ચોથી વિકેટ માટે 24 બોલમાં 55 રનની ભાગીદારી કરી ટીમના સ્કોરને 200 રનને પાર પહોંચાડી હતી. જેમિમાએ વોલ્વાર્ટ સાથે મળી ત્રીજી વિકેટ માટે 76 રન ઉમેર્યા હતા.
કોહલીએ ટીમને અભિનંદન આપ્યા
વિરાટ કોહલીએ પોતાની સત્તાવાર પોસ્ટમાં લખ્યું કે RCB ફરી એકવાર ચેમ્પિયન બન્યું છે અને ટીમે એવું પ્રદર્શન કર્યું છે જેના પર દરેક ચાહકને ગર્વ થવો જોઈએ. તેમણે કેપ્ટન સ્મૃતિ મંધાનાની પ્રશંસા કરી અને મહિલા ટીમ, સપોર્ટ સ્ટાફ અને મેનેજમેન્ટને આ નોંધપાત્ર અને યાદગાર વિજય માટે અભિનંદન આપ્યા.
“તમે આ જીતના હકદાર છો”
પોતાના સંદેશમાં, કોહલીએ કહ્યું કે ટીમ આ વિજયને સંપૂર્ણપણે લાયક હતી અને ખેલાડીઓએ આ ક્ષણનો સંપૂર્ણ આનંદ માણવો જોઈએ. તેમણે RCB ચાહકોના પ્રેમ અને સમર્થનની પણ ખાસ પ્રશંસા કરી. વિરાટના આ સંદેશથી ટીમનું મનોબળ વધ્યું જ નહીં પરંતુ RCB ચાહકો માટે ભાવનાત્મક ક્ષણ પણ બની ગઈ.
અનુષ્કાએ પણ કર્યા વખાણ
2024 પછી આ બીજી વખત છે જ્યારે બેંગ્લોરની ટીમે WPL ટ્રોફી જીતી છે. ત્યારે વિરાટ કોહલીએ પોસ્ટ શેર કરીને ટીમને અભિનંદન આપ્યા હતા જ્યારે અનુષ્કા શર્માએ સ્ટોરી શેર કરીને અભિનંદન આપતા કહ્યું હતું કે RCB વિમેન્સે ફરી કરી બતાવ્યું, History repeated”
આ પણ વાંચો :આ પણ વાંચો :આવકવેરાની જૂની ટેક્સ સિસ્ટમ બંધ નહી થાય: સીબીડીટીના ચેરમેને કરી સ્પષ્ટતા, નવી કર વ્યવસ્થામાં 88 ટકા કરદાતા
WPL ફાઇનલમાં સૌથી વધુ વ્યક્તિગત સ્કોર
87 (41) – સ્મૃતિ મંધાના VS દિલ્હી કેપિટલ્સ, વડોદરા, 2026
79 (54) – જ્યોર્જિયા વોલ VS દિલ્હી કેપિટલ્સ, વડોદરા, 2026
66 (44) – હરમનપ્રીત કૌર VS દિલ્હી કેપિટલ્સ, બ્રેબોર્ન, 2025
60* (55) – નેટ સાયવર-બ્રન્ટ VS દિલ્હી કેપિટલ્સ, બ્રેબોર્ન, 2023
57 (37) – જેમીમાહ રોડ્રિગ્સ VS RCB, વડોદરા, 2026
WPLમાં સૌથી વધુ ભાગીદારી (કોઈપણ વિકેટ માટે)
165 – સ્મૃતિ મંધાના અને જ્યોર્જિયા વોલ (RCB) VS દિલ્હી કેપિટલ્સ, વડોદરા, 2026
162 – મેગ લેનિંગ અને શેફાલી વર્મા (દિલ્હી કેપિટલ્સ) VS RCB, બ્રેબોર્ન, 2023
146 – જેસ જોનાસેન અને શેફાલી વર્મા (દિલ્હી કેપિટલ્સ) VS RCB, બેંગલુરુ, 2025
142 – સ્મૃતિ મંધાના અને જ્યોર્જિયા વોલ (RCB) વિ દિલ્હી કેપિટલ્સ, નવી મુંબઈ, 2026
140 – બેથ મૂની અને લૌરા વોલ્વાર્ડ (ગુજરાત જાયન્ટ્સ) વિ આરસીબી, દિલ્હી, 2024
