રાજકોટમાં ડ્રાયફ્રુટની આયાતને બ્રેક: ઈરાની મામરો બદામનો ભાવ 6000 સુધી પહોંચ્યો, જો યુદ્ધ લાબું ચાલે તો સિંગ-ગોળ ખાવા પડશે!

જો યુદ્ધ આમને આમ ચાલુ રહેશે તો કદાચ શિંગ અને ગોળ ખાવાનો વારો આવશે..સંભવ:એ દિવસો દૂર નહી રહે…આવી ધારણા રાજકોટનાં ડ્રાયફ્રૂટ્સનાં વેપારીઓ કરી રહ્યા છે.હાલમાં સુકામેવા ખાસ કરીને ઈરાનથી આવતી મામરો બદામ,મૂનકા દ્રાક્ષ,પિસ્તા અને દુબઈની ખજૂરની આવક સદંતર બંધ થઈ ગઈ છે.

વૈશ્વિક સ્તરે ચાલી રહેલા યુદ્ધના માહોલની અસર હવે સ્થાનિક બજારોમાં સ્પષ્ટ રીતે દેખાવા લાગી છે. ખાસ કરીને સુકામેવાના વેપારમાં મોટો ઝાટકો લાગ્યો છે. રાજકોટના ડ્રાયફ્રૂટ્સ વેપારીઓ મુજબ, ઈરાન અને અન્ય દેશોમાંથી આવતી આયાત સંપૂર્ણપણે બંધ થતાં ભાવોમાં 25 થી 35 ટકાનો વધારો નોંધાયો છે.

રાજકોટના જાણીતા દાદાજી ડ્રાયફ્રૂટ્સના વેપારી દીપકભાઈ અને વિવેકભાઈ મૃગે જણાવ્યું હતું કે, શરૂઆતમાં માત્ર 15 થી 20 ટકા ભાવવધારાની આશંકા હતી, પરંતુ યુદ્ધ લાંબુ ચાલતાં સપ્લાય ચેઇન સંપૂર્ણપણે ખોરવાઈ ગઈ છે. ઈરાની પિસ્તા, મૂનકા દ્રાક્ષ, અફઘાનિસ્તાનની ચમન કિસમિસ, મમરો બદામ, ખારેક અને અંજીર જેવા સુકામેવામાં ભારે વધારો નોંધાયો છે.

આ પણ વાંચો: નવી પ્રવાસન નીતિ: હોટલ બાંધકામ માટે હળવા નિયમો અને ઝડપી મંજુરી! કર પ્રોત્સાહન, લીકર પરમિટમાં છૂટછાટ સહિતના લાભ આપવા કવાયત

બદામના ભાવમાં તો સૌથી મોટો ઉછાળો જોવા મળ્યો છે. અગાઉ 2400 થી 3600 રૂપિયા પ્રતિ કિલો મળતા બદામ હવે 3600 થી 6000 રૂપિયા સુધી પહોંચી ગયા છે. દીપકભાઈએ જણાવ્યું હતું કે અમારી પાસે 6 મહિનાનો સ્ટોક છે જ્યારે રાજકોટમાં વેપારીઓએ 4 થી 6 મહિનાનો સ્ટોક ઉપલબ્ધ છે.

કિરણ ડ્રાયફ્રૂટ્સના વેપારી હિતેશભાઈએ જણાવ્યું હતું કે, હાલ મમરો બદામનો ભાવ 3500-3600 થી વધીને 4000-4400 સુધી પહોંચી ગયો છે. દ્રાક્ષ 700 થી 900 રૂપિયા પ્રતિ કિલો, પિસ્તામાં 150 રૂપિયાનો વધારો થઈ 1500 થી 1600 સુધી અને અમેરિકન બદામમાં પણ વધારો નોંધાયો છે. કાજુના ભાવ પણ અસરગ્રસ્ત થયા છે, જે બહેરીનથી આવતો સપ્લાય ખોરવાતા 1100 થી 1300 રૂપિયા સુધી વેચાઈ રહ્યો છે.